ارمەنيادان اكەلىنگەن كولىكتەردى تىركەۋ مەرزىمى اياقتالۋعا جاقىن. بۇگىنگى تاڭدا 11 مىڭنان استام اۆتوكولىك تىركەلىپ, قازاقستاندىق ءنومىردى العان. تىركەۋدەن وتپەگەن تاعى 3 مىڭعا جۋىق كولىك بار. ءرۋلى وڭ جاقتا ورنالاسقان 6,5 مىڭ كولىكتىڭ ماسەلەسى دە اشىق كۇيىندە قالىپ وتىر, دەپ حابارلايدى Egemen.kz قازاقپاراتقا سىلتەمە جاساپ.
وسى ماسەلە توڭىرەگىندە قر ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى مۇرات بايمۇقاشەۆ ايتتى. "م.بايمۇقاشەۆ اتاپ وتكەندەي, ارميان نومىرلەرى بار كولىك ماسەلەسىنە ەرەكشە نازار اۋدارۋعا بىرنەشە فاكتور اسەر ەتكەن. «بىرىنشىدەن, ولاردىڭ سانى كوپ بولعانى سونشالىقتى, جول-كولىك وقيعالارى ستاتيستيكاسىنا ءجيى ەنە باستادى. 2019 جىلى ارمەنيادان كەلگەن كولىكتەردىڭ قاتىسۋىمەن 2 مىڭنان استام جول-كولىك وقيعاسى بولدى, ونىڭ 130-ى ادام قازاسىمەن اياقتالدى. ەكىنشىدەن, كولىكتى سەنىمحات ارقىلى ساتىپ العان كەيبىر جۇرگىزۋشىلەر بەينەباقىلاۋ جۇيەلەرى وزدەرىنىڭ نومىرلىك بەلگىلەرىن انىقتاي المايتىنىن ءتۇسىنىپ, جول ەرەجەلەرىن ادەيى بۇزا باستادى. ماسەلەن, 3 ميلليون تەڭگەدەن استام سوماعا 400 رەت زاڭدى بۇزعان جۇرگىزۋشى بار", دەيدى قر ءىىم اكىمشىلىك پوليتسيا كوميتەتىنىڭ توراعاسى. ونىڭ ايتۋىنشا, ارمەنيادان اكەلىنگەن ءرۋلى وڭ جاقتاعى كولىكتەر سانى – 6,5 مىڭ.
"ونىڭ 2 مىڭى ارمەنيادا تىركەلگەنگە دەيىن قايتا جابدىقتالعان. ياعني, ارمەنيادا قازىردىڭ وزىندە بۇل كولىكتەر ءرۋلى سول جاقتاعى كولىك رەتىندە تىركەلگەن. ۇكىمەت شەشىمىمەن بۇل كولىكتەر ارنايى زەرتحانالاردا سىناقتان ءوتۋى كەرەك. دياگنوستيكادان كەيىن اۆتوكولىكتىڭ قازاقستاندىق جولداردا پايدالانۋعا جارامدىلىعى تۋرالى قورىتىندى جاسالادى. اۆتوكولىك يەسىنە ىشكى ىستەر ورگاندارىنىڭ وسى كولىكتى تىركەۋى ءۇشىن نەگىز بولاتىن تەكسەرۋ اكتىسى جاسالادى", دەيدى ول.
سپيكەر اتاپ وتكەندەي, ءرۋلى وڭ جاقتا ورنالاسقان 4,5 مىڭ اۆتوكولىكتىڭ ماسەلەسى اشىق كۇيىندە قالىپ وتىر.
"2008 جىلدان باستاپ قازاقستاندا وڭ ءرۋلدى كولىك قۇرالدارىن تىركەۋگە شەكتەۋ ەنگىزىلگەن بولاتىن. 2015 جىلى قازاقستان كەدەن وداعىنىڭ تەحنيكالىق رەگلامەنتتەرىن راتيفيكاتسيالادى, وندا بۇل شەكتەۋلەر ناقتى كورسەتىلگەن. ارمەنيادان اۆتوكولىك اكەلگەن قازاقستان ازاماتتارى بۇل تىيىم تۋرالى ءبىلدى. مەملەكەتتىك ورگاندار كولىك يەلەرىمەن كەزدەسىپ, قازىر ىمىراعا كەلۋدىڭ شەشىمىن قاراستىرۋدا. وڭ جاقتان باسقارىلاتىن اۆتوكولىكتەردى سول جاقتان باسقارىلاتىن اۆتوكولىككە اينالدىرۋعا تەحنيكالىق جاعداي جاساۋ ءۇشىن جەرگىلىكتى اۆتوكولىك وندىرۋشىلەر, شەتەلدىك كومپانيالاردىڭ رەسمي ديلەرلەرى تارتىلادى. ىشكى ىستەر مينيسترلىگىنىڭ باسشىلىعى بۇل ماسەلەنى ەرەكشە باقىلاۋدا ۇستايدى. سوندىقتان قازىر وسى ساناتتاعى كولىكتەرگە تىركەۋ مەرزىمىن ۇزارتۋ مۇمكىندىگى قاراستىرىلۋدا", - دەيدى مۇرات بايمۇقاشەۆ.