گرۋزيانىڭ بيلىگى جاقىن كۇندەردە ەندى ەڭبەك تۋرالى كودەكسكە اكەلەردىڭ دە بالا كۇتىمىمەن وتىراتىن دەكرەتتىك دەمالىس الۋى زاڭداستىرىلاتىن تۇزەتۋ ەنگىزۋ ماسەلەسىن قاراستىرىپ جاتىر. بۇل تۋرالى «لەنتا.رۋ» حابارلادى.
«بىزگە گرۋزيا ءۇشىن مۇلدەم جاڭالىق بولىپ تابىلاتىن وسىنداي ماسەلە ۇسىنىلدى. بۇل وتباسى تابىسىنا كەمىرەك زالال كەلۋى ءۇشىن, بالا تۋعاننان كەيىن اتا-انالاردىڭ قايسىسى بالا كۇتىمىمەن قالاتىنى جايىن زاڭداستىرىپ بەرەتىن باپ بولادى», - دەدى وسىعان وراي ادىلەت ءمينيسترى تەا تسۋلۋكاني.
وسىمەن بىرگە, مينيستر ازىرگە اڭگىمەنىڭ ۇسىنىس قالپىندا تۇرعانىن دا ەسكەرتىپ ءوتتى. ول پارلامەنتكە ۇسىنىلعانعا دەيىن ءالى بىرقاتار جەرگىلىكتى جانە حالىقارالىق ۇيىمدار, سونداي-اق بيزنەس قۇرىلىمدارى وكىلدەرىنىڭ تالقىلاۋلارىنان ءوتىپ, كەڭەستەرى تىڭدالادى.
ال وسى تۇستا گرۋزيا پارلامەنتىنە دەكرەتتىك دەمالىستىڭ ۋاقىتى مەن اقىسىنا قاتىستى وزگەرىستەر مەن تولىقتىرۋلار ەنگىزۋ جونىندە بۇدان دا باسقا زاڭ جوباسى كەلىپ ءتۇستى. جوباعا سايكەس, ونىڭ مەرزىمى قازىرگى 477-ءنىڭ ورنىنا 730 كۇنتىزبەلىك كۇن بولۋعا ءتيىس. سونداي-اق اقى تولەنەتىن دەمالىس كۇندەرى سانى 126-دان 183 كۇنگە دەيىن وسپەكشى. مۇنىڭ سوڭى دەكرەتتەگى كىسىلەردىڭ الاتىن اقىلارىنىڭ 1 مىڭ لاريگە (600 دوللار شامالاس) دەيىن كوبەيەتىنىن بىلدىرەدى. جوبا الداعى 2014 جىلدىڭ 1 قاڭتارىنان زاڭ بولىپ جۇزەگە اسادى دەپ كۇتىلۋدە.
مۇرات ايتقوجا.