جاس سۋرەتشىلەر اۆسترياعا جولداما الدى

بايقاۋدىڭ سالتاناتتى قۇتتىقتاۋ ءىس-شاراسى باس دەمەۋشى "Edu Stream" كومپانياسىنىڭ EduStream KZ اتتى Youtube ارناسىندا ونلاين ءوتتى.  

بايقاۋ قازاقستان رەسپۋبليكاسى پرەزيدەنتىنىڭ قولداۋىمەن, دۇنيەجۇزىلىك قورشاعان ورتانى قورعاۋ كۇنى اياسىندا, ءبىلىم جانە عىلىم, مادەنيەت جانە سپورت مينيسترلىكتەرىنىڭ قولداۋىمەن, «بالالار  الەمدى بەينەلەيدى» قوعامدىق قورى, باس سەرىكتەس «Edu Stream» كومپانياسىنىڭ جانە «تەحنودوم» مەن «ناستوياششي بۋراتينو» سىندى سەرىكتەستەردىڭ دەمەۋشىلىگىمەن ءوتتى.

2020 جىلدىڭ 1 ءساۋىرى مەن 15 شىلدەسى ارالىعىندا وتكەن بايقاۋعا ەلىمىزدىڭ تۇكپىر-تۇكپىرىنەن ءتورت مىڭنان استام بالا قاتىسقان. قاتىسۋشىلاردىڭ شىعارماشىلىعى  6-8, 9-11, 12-14 جانە 15-17 جاس مولشەرى بويىنشا جىكتەلىپ, ءار توپتان ءۇش جەڭىمپاز انىقتالعان. سونداي-اق باس جۇلدە سىيلىعى تاعى بار.  سونىمەن بايقاۋدىڭ باس جۇلدەسىنە الماتى قالاسىنىڭ تۇرعىنى ماريا يۆانيچەنكو (15 جاس) لايىق دەپ تانىلدى.

باس جۇلدە يەگەرى ماريا يۆانيچەنكو كونكۋرستىڭ باس دەمەۋشىسى «Edu Stream» كومپانياسىنان اۆسترياعا جولداما جانە Apple iPad تابىستالدى. اۆسترياعا ساپار سەرتيفيكاتىن ءار توپتاعى 1-ءشى ورىن يەگەرلەرى دە الدى. بارلىق جەڭىمپاز «تەحنودوم», «ناستوياششي بۋراتينو» كومپانيالارىنىڭ سمارتفون, ساموكات جانە باسقا دا قۇندى سىيلىقتارىن يەلەندى. ىشكى ىستەر مينيسترلىگى كونكۋرسقا قاتىسقان جاسمين نازار, ادەليا احمەت, فاتيما رىزاەۆاعا ارنايى سىيلىق – پلانشەتتەر تابىستادى. سونىمەن قاتار قىسقا بەينە تۇسىرەتىن «LIKEE» عالامدىق پلاتفورماسى, «دوبروۆولنوە وبششەستۆو «ميلوسەرديە» قوعامدىق قورى, «Animal Security» قوعامدىق قورى, «بەلىي بيم» جانۋارلار پاناسىنىڭ ىنتالاندىرۋ سىيلىقتارى دا يەلەرىن تاپتى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.