وبلىستىڭ وساكاروۆ اۋدانىنداعى «نايدوروۆسكوە» جشس قارا بيداي مەن قاتتى بيداي گيبريدى – تريتيكالە ءوسىرىپ, الىنعان ءونىمدى ەكسپورتقا شىعاردى, – دەپ حابارلايدى Egemen.kz. وبلىس اكىمىنىڭ ءباسپاسوز قىزمەتىنە سىلتەمە جاساپ.
شارۋاشىلىق باسشىسى پاۆەل لۋششاك تريتيكالە تۇقىمىن ءۇشىنشى جىل سەپكەندەرىن ايتادى.
– كۇزدىك داقىل ءوزىن جاقسى جاعىنان كورسەتتى. بيىل تۇقىمنىڭ بۇل ءتۇرى 750 گا جەرگە سەبىلدى. القاپتىڭ ءبىر بولىگىنە بيدايدىڭ «گروم» جانە «بريگادا» سۇرىپتارى ءسىڭىرىلدى. بۇل – رەسەيلىك سەلەكتسيا. كۇزدىك داقىلداردى جيناۋ 20 شىلدەدە باستالدى. تامىزدىڭ باسىندا العاشقى 700 توننا تريتيكالە تاجىكستانعا جونەلتىلدى. ءونىمدى جەرگىلىكتى قۇس فابريكالارى دا ساتىپ الدى, – دەيدى ول.
ايتا كەتۋ كەرەك, بيىلعى جازدىڭ قۇرعاقشىلىعىنا قاراماستان, كۇزدىك بيداي ءار گەكتاردان 25 تسەنتنەرگە دەيىن ءونىم بەردى. بۇگىنگى كۇندە شارۋاشىلىق بۇل باعىتتى دامىتۋدى ءجون سانايدى. الداعى ۋاقىتتا كۇزدىك القاپتاردى 1 350 گەكتارعا دەيىن ۇلعايتۋ جوسپاردا بار ەكەن.
قازىرگى تاڭدا «نايدوروۆسكوە» جشس زاماناۋي تەحنولوگيالارعا كوبىرەك دەن قويىپ, ءداندى داقىلداردىڭ جاڭا سۇرىپتارىن سىناقتان وتكىزۋدە.
– بىزدە اۋا-رايى قاتال, ال ەگىستىكتىڭ شىعىمى ناشار. سوندىقتان, جاڭا تەحنولوگيالاردى ەنگىزۋدەن باسقا جول جوق. ساپالى تۇقىمسىز, اگروتەحنولوگيالاردى ساقتاماي جانە تىڭايتقىشتاردى قولدانباستان ىلگەرى جىلجۋ ءتىپتى دە مۇمكىن ەمەس. بىزگە وتاندىق سەلەكتسيونەرلەردىڭ كومەگى قاجەت. قازىر ءبىز ءوزىمىزدىڭ القاپتارىمىزدا شەتەلدىك سەلەكتسيانى سىناقتان وتىكىزىپ جاتىرمىز. قاراپ تۇرساڭىز, بۇل دەگەنىڭىز زور شىعىنعا, قاجەتى شامالى تاۋەكەلگە الىپ كەلەتىن شارۋا, – دەيدى شارۋاشىلىق باسشىسى پاۆەل لۋششاك.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.