الداعى مەرزىمدە بۋراباي جانە قاراسۋ كولدەرىن تازالاۋ باستالادى. بۇل تۋرالى «24 kz» حابارلادى.
نەگىزى 2040 جىلعا دەيىن ەلىمىزدەگى 17 كولدى تازالاۋعا مەملەكەت قازىناسىنان 2 ملرد. تەڭگە ءبولىندى. ال قورشاعان ورتانى قورعاۋ مينيسترلىگى كەلەر جىلدان باستاپ وسى جوبانى جۇزەگە اسىرۋعا كىرىسەدى. جوسپارعا سايكەس, 2016 جىلعا دەيىن 3 كول تازالانىپ بولۋى ءتيىس.
مامانداردىڭ كولدەردى بالشىقتان تازارتۋدى قولعا الۋى جايدان-جاي ەمەس. ويتكەنى, بىرقاتار كولدىڭ سۋى تارتىلىپ بارادى. ماسەلەن, بالقاش كولى شولەيت اۋماقتا بولعاندىقتان, ونىڭ كليماتى شۇعىل كونتينەنتتى بولىپ كەلەدى. ءارى ونداعى سۋدىڭ بۋلانۋى وتە جوعارى دەڭگەيدە. ال سوڭعى كەزدە مۇنداعى ەكولوگيالىق احۋال ناشارلاپ كەتتى. ونىڭ باستى سەبەبى, قاراتال, لەپسى, اقسۋ وزەندەرىنىڭ سۋى بالقاش كولىنە جەتپەي, سۋارمالى ەگىستەرگە جىبەرىلۋىندە. تاعى ءبىر ەسكەرەتىن جاعداي, بۇرىنعى كەزدە اياگوز, بيەن, سارقاند جانە باسقان وزەندەرى بالقاشقا قۇيىپ, ونىڭ دەڭگەيىن بىرقالىپتى ۇستاپ تۇراتىن ەدى. قازىر اتالعان وزەندەر بالقاشقا قۇيۋىن توقتاتقان.
جالپى, بۇدان بۇرىن بىرنەشە بۇقارالىق اقپارات قۇرالدارى وسى كولدىڭ تارتىلىپ بارا جاتقانىنا بايلانىستى ماسەلە كوتەرگەن بولاتىن. سونىڭ بىرىندە بالقاش ەكوجۇيەسىنىڭ ناشارلاۋىنا ىلە وزەنى بويىنا سالىنعان قاپشاعاي سۋ قويماسىنىڭ اسەر ەتكەنى ايتىلعان. مۇنان وزگە ىلە وزەنىن قورەكتەندىرىپ وتىرعان شەلەك وزەنى بارتوعاي بوگەتىمەن بوگەلىپ, وندا 300 مىڭ تەكشە مەتر سۋ جيناقتالعان. ءارى ۇلكەن الماتى كانالى سالىنىپ, شەلەك وزەنى ىلەگە قۇيۋىن توقتاتتى. سۋ سالاسى توڭىرەگىندەگى مامانداردىڭ دەرەگىنە جۇگىنسەك, 1965-1990 جىلدار ارالىعىندا ىلە-بالقاش الابىن اۋىل شارۋاشىلىعىنا بارىنشا پايدالانۋمەن, بالقاشقا قۇياتىن سۋدىڭ كولەمى 25 پايىزعا ازايىپ كەتكەن. ىلەنىڭ ورتا جانە تومەنگى ساعاسىندا شارىن كۇرىش, شەڭگەلدى كوكونىس, اقدالا كۇرىش القاپتارى پايدا بولىپ, بالقاشتىڭ تابيعي تەپە-تەڭدىگىن بۇزدى. سوندىقتان ەلىمىز ماماندارى الدىمەن كولدەردى بالشىقتان تازارتۋ ماسەلەسىن رەتتەپ, سوسىن ونىڭ باستاۋ الاتىن ساعاسىنا جان ءبىتىرۋدى كوزدەپ وتىر...
دانيار تۇيمەباي.