بۇگىن ەلىمىزدە پارلامەنت سەناتىنا دەپۋتات سايلاۋ ناۋقانى ءوتتى. سايلاۋدىڭ الدىن الا قورىتىندىلارى قازاقستان رەسپۋبليكاسى ورتالىق سايلاۋ كوميسسياسىنىڭ سايتىندا جاريالاندى, - دەپ حابارلايدى Egemen.kz.
سەنات دەپۋتاتتىعىنان ۇمىتكەرلەرگە جەرگىلىكتى ءماسليحات دەپۋتاتتارى داۋىس بەردى. جامبىل وبلىسىنان وسى ۋاقىتقا دەيىن وبلىس اكىمىنىڭ ءبىرىنشى ورىنباسارى قىزمەتىن اتقارىپ كەلگەن بەكبولات ورىنبەكوۆ 92,09 پايىز داۋىسپەن پارلامەنت سەناتىنىڭ دەپۋتاتى بولىپ سايلاندى. جامبىل وبلىستىق اۋماقتىق سايلاۋ كوميسسياسىنىڭ توراعاسى سەرعالي ايداپكەلوۆتىڭ حابارلاۋىنشا, سەنات دەپۋتاتتىعىنان ۇمىتكەر بەكبولات ورىنبەكوۆ 163 داۋىس, وكسانا بوريسيۋك 14 داۋىس العان.
بەكبولات ورىنبەكوۆ 1957 جىلى جامبىل وبلىسىندا تۋعان. ءار جىلدارى تالاس اۋدانى, قاراتاۋ قالاسىنىڭ اكىمى, سارىسۋ اۋدانىنىڭ اكىمى, تاراز قالاسىنىڭ اكىمى جانە جامبىل وبلىسى اكىمىنىڭ ءبىرىنشى ورىنباسارى قىزمەتتەرىن اتقارعان.