بۇگىن الماتىداعى وڭىرلىك كوممۋنيكاتسيالار قىزمەتىنىڭ الاڭىنداعى ونلاين بريفينگتە الماتى قالالىق موبيلدىلىك باسقارما باسشىسىنىڭ ورىنباسارى ەرنۇر ابجاحان قالانىڭ جاڭادان قوسىلعان ۋچاسكەلەرىندەگى جول ينفراقۇرىلىمى قۇرىلىسى بويىنشا قالا اكىمى تاپسىرمالارىنىڭ ورىندالۋ بارىسى تۋرالى باياندادى.
"شەتكى اۋماقتار بويىنشا 200 شاقىرىم جولدىڭ نەگىزگى بولىگى – بۇل شامامەن 50%-دان استامىنا ورتاشا جوندەۋ جۇرىگىزىلدى. ول الاتاۋ, ناۋرىزباي جانە بوستاندىق اۋداندارى. بۇرىن قاتتى جابىندى بولماعان شاعىن اۋدانداردا جوبالىق-سمەتالىق قۇجاتتارى ازىرلەنۋدە. اتالعان جسق جۇزەگە اسىرىلعاننان كەيىن شامامەن 111 شاقىرىم جول پايدا بولادى", - دەپ اتاپ ءوتتى سپيكەر.
سونىمەن قاتار 9 اۋداندا جسق ازىرلەۋ اياقتالىپ كەلەدى. جالپى بيىلعى جىلى ۇزىندىعى 47,4 شاقىرىم بولاتىن الماتى قالاسىنىڭ 177 كوشەسىندە جاڭا جولدار سالىنۋدا. ونىڭ ىشىندە ۇزىندىعى 18,6 شاقىرىم بولاتىن 112 كوشە بويىنشا جول قۇرىلىسى اياقتالدى. جىل سوڭىنا دەيىن ۇزىندىعى 28,8 شاقىرىم بولاتىن قالعان 65 كوشەنىڭ جولىن سالۋدى اياقتاۋ جوسپارلانۋدا.
جول ينفراقۇرىلىمىنىڭ ساپاسىنا قاتىستى سۇراقتار بويىنشا قالا تۇرعىندارى 1308 نومەرى بويىنشا Open Almaty قوعامدىق قابىلداۋعا جۇگىنە الادى, بولماسا الەۋمەتتىك جەلىلەردەگى الماتى قالاسىنىڭ قالالىق موبيلدىلىك باسقارماسىنىڭ اككاۋنتتارىنا حابارلاسۋعا بولادى.