جامبىل اتىنداعى قازاق مەملەكەتتىك فيلارمونياسى 2020 جىلعى 11-تامىز بەن 11-قىركۇيەك ارالىعىندا "Philharmonic Online Fest" ونلاين-فەستيۆالىن ۇسىنادى, - دەپ حابارلايدى Egemen.kz.
فەستيۆال اياسىندا كورەرمەندەر فيلارمونيانىڭ تانىمال تالانتتى سوليستەرى - قازاقستاننىڭ ەڭبەك سىڭىرگەن قايراتكەرى عابيت نەسىپباەۆ, گۇلجان ۇزەنباەۆا, ەرمەك قۇرماناەۆ, ءامىر بيسەنعاليەۆ, مايا سەپپ, سونداي–اق مۋزىكالىق ۇجىمدار - مەملەكەتتىك اكادەميالىق سيمفونيالىق وركەسترىن, قر مەملەكەتتىك حور كاپەللاسىن, ع. جۇبانوۆا اتىنداعى مەملەكەتتىك ىشەكتى اسپاپتار كۆارتەتىنىڭ كونتسەرتىن فيلارمونيانىڭ الەۋمەتتىك جەلىدەگى رەسمي Youtube ارناسى ارقىلى ونلاين فورماتتا تاماشالاي الادى.
ءىس-شارانىڭ ماقساتى - كورەرمەندەرگە فيلارمونيانىڭ كونتسەرت زالىنا بارۋعا مۇمكىندىك جوق كارانتين كەزەڭىندە ونلاين فورماتتا, الەمدىك كلاسسيكالىق مۋزىكانىڭ ەڭ ۇزدىك ۇلگىلەرىن تاماشالاۋعا, سونداي-اق فيلارمونيا مۋزىكانتتارىنىڭ شىعارماشىلىعىمەن تانىسۋعا مۇمكىندىك بەرۋ.
فەستيۆال باعدارلاماسىندا قازاقستاندىق جانە شەتەلدىك كومپوزيتورلاردىڭ شىعارمالارى بار.