ەلىمىزدە بيىلعى ءبىرىنشى جارتىجىلدىعىنىڭ قورىتىندىسى بويىنشا وڭدەۋ ونەركاسىبىنىڭ ءوسىمى 4,8% (5,8 ترلن تەڭگە) قۇرادى. وڭدەۋ ونەركاسىبىنىڭ نەگىزگى كاپيتالىنا سالىنعان ينۆەستيتسيالار كولەمى وتكەن جىلدىڭ سايكەس كەزەڭىمەن سالىستىرعاندا 6,1% ۇلعايىپ, 373,1 ملرد تەڭگەگە جەتتى. بۇل تۋرالى يدم ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
الەمدى جايلاعان پاندەميانىڭ سالدارىنان حالىقارالىق ساۋداعا بايلانىستى شەكتەۋلەر ناتيجەسىندە وڭدەۋشى ونەركاسىپ ءونىمى ەكسپورتىنىڭ كولەمى قاڭتار-مامىردا 18,6% ازايىپ, 5,2 ملرد اقش دوللارىن قۇرادى.
سونىمەن قاتار 1 توقساننىڭ قورىتىندىسى بويىنشا سەكتوردا جۇمىسپەن قامتىلعاندار سانى 601,4 مىڭ ادامدى قۇراپ, وتكەن جىلدىڭ ءتيىستى كەزەڭىمەن سالىستىرعاندا 1,4% ارتتى.
2020 جىلعى 1 شىلدەدەگى جاعداي بويىنشا وڭدەۋشى ونەركاسىپتىڭ 16,4 مىڭ كاسىپورنى جۇمىس ىستەيدى.
يندۋستريالاندىرۋ كارتاسى اياسىندا, جىل سوڭىنا دەيىن 17 مىڭنان استام تۇراقتى جۇمىس ورنى قۇرىلىپ, 160 جوبانى جۇزەگە اسىرۋ جوسپارلانعان. ءبىرىنشى جارتىجىلدىعىنىڭ قورىتىندىسى بويىنشا شامامەن 900 جۇمىس ورنى قۇرىلۋىمەن جالپى قۇنى 23,7 ملرد تەڭگەگە 4 جوبا ىسكە قوسىلدى.
پاندەميا كەزىندە جەكە قورعانىس قۇرالدارىنا (جقق) دەگەن سۇرانىستىڭ ارتۋىنا بايلانىستى 4 جاڭا جوبا ىسكە قوسىلدى. سونداي-اق, بيىل شىعىس قازاقستان وبلىسىندا اقتوعاي ءموز-نىڭ قايتا وڭدەۋ قۋاتىن كەڭەيتۋ, جامبىل وبلىسىندا مينەرالدى تىڭايتقىشتار وندىرەتىن زاۋىت سالۋ, اۇمولا وبلىسىندا جاڭا وڭدەۋ كەشەنىنىڭ قۇرىلىسى جانە تاۋ-كەن بايىتۋ كومبيناتى قۇرىلىسى, قاراعاندى وبلىسىندا شينالار شىعاراتىن زاۋىت سالۋ سياقتى ت.ب. ءىرى جوبالار ىسكە اسىرىلىپ جاتىر.
2019 جىلى تاۋارلار بويىنشا جەرگىلىكتى قامتۋ ۇلەسى 519,8 ملرد.تەڭگەگە ۇلعايدى. مەملەكەتتىك ساتىپ الۋ مەن ساتىپ الۋداعى جەرگىلىكتى قامتۋ ۇلەسىن ارتتىرۋ ماقساتىندا مينيسترلىك جانىنان قۇرامىنا ورتالىق جانە جەرگىلىكتى اتقارۋشى ورگاندار, "اتامەكەن" ۇكپ, "سامۇرىق-قازىنا" ۇاق" جانە سالالىق قاۋىمداستىقتاردىڭ وكىلدەرى ەنگىزىلگەن جۇمىس توبى قۇرىلدى. جۇمىس توبى اي سايىن جەرگىلىكتى قامتۋ مونيتورينگىن جۇرگىزەدى. بۇگىندە جوعارى يمپورتقا تاۋەلدىلىك بايقالاتىن وڭدەۋ ونەركاسىبىندە جەرگىلىكتى قامتۋ ۇلەسىن ارتتىرۋ ماقساتىندا جالپى سوماسى 1,6 ترلن تەڭگەگە 73 جوبانى ىسكە قوسۋ جوسپارلانۋدا. بۇل ءوز كەزەگىندە وڭدەۋ ونەركاسىبىنىڭ يمپورتىن 2025 جىلعا قاراي 20% ازايتادى.
جاڭا جوبالاردى ەنگىزۋ ىشكى نارىقتاعى بىرقاتار دايىن تاۋار پوزيتسيالارىن ۇلعايتۋعا مۇمكىندىك بەرەدى. ەەو كەلىسىمى اياسىندا وتاندىق ءوندىرىس اۆتوموبيلدەرىن جانە ەلەكتروتەحنيكالىق جابدىقتاردى مەملەكەتتىك ساتىپ الۋ بويىنشا 2 جىلعا باسىمدىق بەلگىلەندى. بۇدان باسقا, مەملەكەتتىك ساتىپ الۋدىڭ ارنايى ءتارتىبى شەڭبەرىندە باعا ۇسىنىستارىن سۇراتۋ تاسىلىمەن مەملەكەتتىك ساتىپ الۋدى جۇزەگە اسىرۋ ءۇشىن وتاندىق تاۋار وندىرۋشىلەر تىزبەسى بەكىتىلدى.
جەر قويناۋىن پايدالانۋشىلار مەن ولاردىڭ مەردىگەرلەرىنىڭ قاتتى پايدالى قازبالاردى ءوندىرۋ جونىندەگى وپەراتسيالاردى جۇرگىزۋ كەزىندە پايدالانىلاتىن تاۋارلاردى, جۇمىستار مەن كورسەتىلەتىن قىزمەتتەردى ساتىپ الۋ قاعيدالارىنا وزگەرىستەر ەنگىزىلدى.
بۇگىنگى تاڭدا قازاقستاندا 13 ارنايى ەكونوميكالىق ايماق (اەا) جۇمىس ىستەيدى. ولاردا 23 مىڭنان استام جۇمىس ورنى قۇرىلدى. بيۋدجەتكە سالىق ءتۇسىمى 180 ملرد. تەڭگەنى قۇرادى. ءونىم ءوندىرۋ كولەمى 2,9 ترلن تەڭگەنى قۇرادى. بارلىق اەا ينفراقۇرىلىمىن سالۋعا ارنالعان بيۋدجەتتىك شىعىندار 344 ملرد تەڭگەنى قۇرادى. بۇل رەتتە وڭدەۋ ونەركاسىبىنە تارتىلعان ينۆەستيتسيالار كولەمى شامامەن 1,1 ترلن تەڭگەنى قۇراپ, بيۋدجەتتەن بولىنگەن 1 تەڭگەگە 3 تەڭگەدەن استام جەكە ينۆەستيتسيا تارتىلدى.
اەا تيىمدىلىگىن ارتتىرۋ ءۇشىن ءۇش جىلدىق كەزەڭگە ارنالعان دامۋ ستراتەگيالارىن پىسىقتاۋ جۇرگىزىلۋدە,سونداي-اق 3 اەا-نىڭ اۋماقتارى كەڭەيتىلدى. جەڭىل ونەركاسىپتى دامىتۋ ءۇشىن «وڭتۇستىك» اەا اۋماعىن كەڭەيتۋ ماسەلەسى قاراستىرىلۋدا. اەا قىزمەتىنىڭ جاڭا تۇرلەرى ەنگىزىلىپ, 20-دان استام جاڭا باسىم ءتۇرىن ەنگىزۋ پىسىقتالۋدا. زاڭنامالىق اكتىلەرگە تۇزەتۋلەر دايىندالدى. «قورعاس» شىحو اەا تيىمدىلىگىن ارتتىرۋ بويىنشا كەشەندى جوسپار ازىرلەنۋدە.