كانادانىڭ نيۋ-برانسۋيك پروۆينتسياسىنداعى ورمان ۋچاسكەلەرىنىڭ يەسى ايۋدىڭ شابۋىلىنا ەرەكشە ءتاسىل قولدانۋ ارقىلى ءوزىن قورعاپ قالدى. بۇل تۋرالى Segodnya.ua حابارلادى.
«Fedpost» گازەتىنىڭ اقپارى بويىنشا, بىرنەشە ورمان ۋچاسكەلەرىنىڭ يەسى جيل سير ءوز مەنشىگىندەگى جەرلەرىن تەكسەرىپ جۇرگەن. كەنەتتەن ونىڭ الدىنان الىپ ايۋ شىعا كەلەدى. جىرتقىش اڭ وعان بىردەن شابۋىل جاساپ, جەرگە قۇلاتقان.
«كوزىمدى اشقانىمدا, الىپ ايۋدىڭ ۇستىمە ءتونىپ تۇرعانىن كوردىم. جەتكەن جەرىم وسى شىعار دەپ ويلادىم. ونىڭ اقىرعان داۋسىنان تۇلا بويىم تىتىركەنىپ كەتتى, – دەيدى جيل سير. – قانشا تىرىسقانىممەن ونىڭ استىنان شىعۋعا كۇشىم جەتپەدى. ال ايۋ بولسا الىپ قولدارىمەن سوققى جاساي بەردى. سول ساتتە ونىڭ تىلىنە كوزىم ءتۇستى. مەن قولىمدى سوزىپ, ايۋدىڭ تىلىنەن قىسىپ ۇستاپ, بار كۇشىممەن وزىمە قاراي تارتىپ جىبەردىم.
ايۋ ادامنان مۇنداي ارەكەتتى كۇتپەگەن بولسا كەرەك. ول اقىرىپ, ءبىر ساتكە ەسەڭگىرەپ قالعان ەكەن. بۇل ۋاقىتتى ۇتىمدى پايدالانعان ايلاكەر جىگىت ايۋدىڭ قۇشاعىنان سىتىلىپ كەتىپ, اعاشقا شىعىپ ۇلگەرگەن. ونىڭ ارتىنان بارعان ايۋ اعاشتىڭ تۇبىندە ءبىراز تۇرىپ, اقىرى جىگىتتى قويا بەرىپ ءوز جونىمەن كەتكەن. ال جاراقاتتانعان جيل سير ءوز بەتىنشە اۋرۋحاناعا كەلىپ, دارىگەرلەردىڭ كومەگىنە جۇگىنگەن كورىنەدى.
ايدار ورىسباەۆ.