ىندەتتىڭ كەڭ تارالۋىن تەجەۋ ءۇشىن ەنگىزىلگەن قاتاڭ كارانتين رەجىمى ناتيجەسىن بەرە باستادى. الايدا «اۋزى كۇيگەن ۇرلەپ ىشەدى» دەگەندەي ساقتىق شارالارىن ۇستانۋدى ۇمىتۋعا بولمايدى. سوندىقتان ەپيدەميالىق احۋالدىڭ تۇراقتانعانىنا قاراماستان شەكتەۋ شارالارى تاعى ەكى اپتاعا جالعاسادى.
ۇكىمەت باسشىسىنىڭ ورىنباسارى ەرالى توعجانوۆ ورتالىق كوممۋنيكاتسيالار قىزمەتى الاڭىندا بۇگىندە ىندەت جۇقتىرۋدىڭ تاۋلىكتىك ءوسىمى 4 پايىزدان 1,7 پايىزعا تومەندەگەنىن, دەرتتەن جازىلعانداردىڭ سانى 66 پايىزعا جەتكەنىن مالىمدەدى.
سونداي-اق جەدەل جاردەمدى شاقىرۋ سانى 40 پايىزعا, ونىڭ ىشىندە كوروناۆيرۋسقا بايلانىستى شاقىرۋ 52 پايىزعا ازايدى. اۋرۋحانالارداعى جاتاتىن ورىنداردىڭ قولدانۋ دەڭگەيى 90 پايىزدان 40 پايىزعا تومەندەپ وتىر. وسىعان بايلانىستى جەتى وڭىردە قوسىمشا 15 پروۆيزورلىق ستاتسيونار جابىلدى. جەدەل جاردەم شاقىرعانداردىڭ سانى 40 پايىزعا, ونىڭ ىشىندە پنەۆمونيا بويىنشا 35 پايىزعا تومەندەدى.
«اۋرۋحانالار مەن ەمحانالاردا ءبىر ايلىق ءدارى-دارمەك قورلارى قۇرىلدى. بۇدان باسقا بولشەك ساۋدا نارىعىن قولداۋ ءۇشىن شەتەلدەن 10 ملن-عا جۋىق ءدارى-دارمەك قازاقستانعا جەتكىزىلدى. ناتيجەلەر – جاقسى. دەگەنمەن بوساڭسۋعا ەشبىر نەگىز جوق. كەرىسىنشە, نەگىزگى ماقساتىمىز – جەتكەن جەتىستىكتەردى ءارى قاراي جەتىلدىرۋ. وسى رەتتە پرەزيدەنتىمىزدىڭ تاپسىرماسىنا وراي, پرەمەر-ءمينيستردىڭ توراعالىعىمەن وتكەن مەملەكەتتىك كوميسسيا كارانتيندى ەكى اپتاعا ۇزارتۋعا شەشىم قابىلدادى», دەدى ە.توعجانوۆ.
پرەمەر-ءمينيستردىڭ ورىنباسارى كارانتين شارالارى اياقتالعاننان كەيىن ءبىرىنشى كەزەكتە جۇمىسى جانداناتىن كاسىپكەرلىك سۋبەكتىلەرىنىڭ الدىن الا ءتىزىمى جاسالعانىن اتاپ ءوتتى. بۇل – ويىن-ساۋىق ورتالىقتارى, ساۋدا ۇيلەرى, جابىق ساناتتاعى ازىق-ت ۇلىكتىك جانە ازىق-ت ۇلىكتىك ەمەس بازارلار, بالالاردىڭ كوررەكتسيالىق كابينەتتەرى, ءبىلىم بەرۋ ورتالىقتارى, بالالاردى دامىتۋ ورتالىقتارى, توپتىق ۇيىرمەلەر (بەس بالادان اسپاۋى كەرەك), بالالاردىڭ مەكتەپكە دەيىنگى مەكەمەلەرى (كەزەكشى توپ رەجىمىندە جۇمىس ىستەۋگە رۇقسات), ءسان-سالوندارى, كوسمەتيكالىق قىزمەت كورسەتەتىن ورتالىقتار (الدىن الا جازىلۋ بويىنشا). الداعى ەكى اپتادا كاسىپكەرلىكتىڭ وسى سۋبەكتىلەرى كۇشەيتىلگەن دايىندىق جۇمىستارىن جۇرگىزۋى كەرەك.
ءاربىر نىسان بويىنشا سانيتارلىق رەجىمنىڭ ناقتى شارالارى قابىلدانادى. 5 تامىزعا دەيىن دەنساۋلىق ساقتاۋ مينيسترلىگى جۇمىسى جانداناتىن نىساندارعا قويىلاتىن سانيتارلىق تالاپتاردى ازىرلەپ, جاريالايدى. ول بويىنشا كاسىپكەرلىك نىساندارى سانيتارلىق ماسكالىق رەجىم, الەۋمەتتىك قاشىقتىق, سانيتايزەرلەر بويىنشا تالاپتاردى قاتاڭ ساقتاۋعا مىندەتتەلەدى.
ودان ءارى دەنساۋلىق ساقتاۋ ءمينيسترى الەكسەي تسوي ءوزى باسقاراتىن ۆەدومستۆونىڭ ۋاكىلەتتى ورگاندارمەن بىرلەسىپ, شەكتەۋ شارالارىن, ونىڭ ىشىندە كارانتيندى بۇزعانى ءۇشىن ادامداردى اكىمشىلىك جاۋاپكەرشىلىككە تارتۋ ءتارتىبىن ازىرلەگەنىن ايتتى.
«وڭ ديناميكاعا, ونىڭ ىشىندە كوروناۆيرۋس ينفەكتسياسى بويىنشا اۋىرۋ مەن ءولىم-ءجىتىم كورسەتكىشتەرىنىڭ ناشارلاماۋىنا حالىقتىڭ ءجۇردىم-باردىم قاراماۋى ۇلكەن اسەرىن تيگىزەدى. قاراپايىم عانا ماسكا تاعۋ سياقتى الدىن الۋ شاراسى اۋرۋ قاۋپىن 30%-عا تومەندەتەدى. وسىعان سايكەس دەنساۋلىق ساقتاۋ مينيسترلىگى ازاماتتاردى قوعامدىق ورىنداردا ءاردايىم ماسكا تاعىپ جۇرۋگە مىندەتتەيتىن بۇيرىق شىعاردى. ءبىز حالىقارالىق تاجىريبەنى زەرتتەدىك. قازاقستاندا عانا ەمەس, بىرقاتار شەت مەملەكەتتە جابىق ءۇي-جايلاردا دا, اشىق اۋادا دا مىندەتتى تۇردە ماسكا تاعۋ ەنگىزىلگەن. مىسالى, ماسكا تاعۋدى مىندەتتەۋ بۇگىندە اقش-تىڭ 43 شتاتىندا, پولشادا, اۋستراليادا, سلوۆاكيادا, ۆەتنامدا قاراستىرىلعان. ينفەكتسيانىڭ تارالۋىن ازايتۋداعى ماسكانىڭ تيىمدىلىگى تۋرالى كوپتەگەن پىكىرتالاستار تۋىندايدى. ناتيجەسىندە ءبارىبىر ماسكانىڭ پايداسى بارىنا كوز جەتكىزەمىز. عالىمدار الەۋمەتتىك اراقاشىقتىققا قوسا حالىقتىڭ ماسكانى ۇدايى قولدانۋى پاندەميا كەزىندە جاعدايدى باقىلاۋدا ۇستاۋعا سەپتىگىن تيگىزەدى دەگەن توقتامعا كەلدى», دەدى ا.تسوي.
مىندەتتى تۇردە ماسكا تاعۋ تۋرالى بۇيرىق رەسمي جاريالانعان كۇننەن باستاپ كۇشىنە ەنەدى جانە نورمالاردى ورىنداماعان جەكە جانە زاڭدى تۇلعالارعا ايىپپۇل سالىنادى.
ءباسپاسوز جيىنىندا پرەمەر-ءمينيستردىڭ ورىنباسارى ەرالى توعجانوۆ جۋرناليستەردىڭ ساۋالىنا وراي كارانتيننىڭ مەرزىمى ۇزارتىلعان ەكى اپتادا 42 500 تەڭگەنىڭ جارتىسى تولەنەتىنىن ايتتى.
«مەملەكەت باسشىسى قاسىم-جومارت توقاەۆتىڭ تىكەلەي تاپسىرماسى بار. ەكى اپتاعا كارانتين سوزىلدى. تولەم بەرىلەدى. بىراق 42 500 تەڭگەنىڭ جارتىسى 21 250 تەڭگە تولەنەدى. 17 تامىزدا سانيتارلىق تالاپتارعا ساي كەلەتىن نىساندار جۇمىسقا كىرىسەدى. الداعى ەكى اپتادا وسى اشىلۋ شاراسىنا دايىندىق جۇرگىزىلەدى», دەدى ە.توعجانوۆ.