كارانتين رەجىمىنىڭ كۇشەيۋى ارىنى قاتتى قاۋىپتى ىندەتتىڭ تارالۋ قارقىنىن اجەپتاۋىر السىرەتتى. كۇن وتكەن سايىن وڭىرلەردەگى ەپيدەميالىق احۋال ءبىرشاما تۇراقتالىپ, ساۋىققان ناۋقاستاردىڭ قاتارى ارتتى, اۋرۋحانالار دا اقىرىنداپ بوساي باستادى.
قاتاڭ شەكتەۋ شارالارى ەنگىزىلگەن ءۇش اپتانىڭ ىشىندە ۇدەپ بارا جاتقان ىندەتتىڭ بەتى قايتا باستاعانى بايقالادى. 5 شىلدەدەن باستاپ بۇگىنگە دەيىن 35 951 ادام جامانات ۆيرۋستى جاماعان. بۇدان كۆي-ءدىڭ تارالۋ قارقىنى 29%-عا تومەندەگەنى كورىنەدى.
دەنساۋلىق ساقتاۋ ءمينيسترى الەكسەي تسوي Covid-19 ىندەتىمەن اۋىرۋ جاعدايى تاۋلىگىنە ورتا ەسەپپەن 1600 ادام دەڭگەيىندە تۇراقتانعانىن مالىمدەدى. ۆيرۋس مەڭدەپ, جانى قىسىلعانداردىڭ دا بەتى بەرى قاراي باستادى. كارانتين كەزىندە ساۋىعىپ كەتكەندەردىڭ سانى 63%-عا دەيىن ءوستى. سايكەسىنشە دەنساۋلىق ساقتاۋ جۇيەسىنە تۇسەتىن اۋىرتپالىق ءبىرشاما جەڭىلدەگەن. بۇعان ستاتسيونارلارداعى كەرەۋەتتەردىڭ 43%-عا دەيىن بوساعانى دالەل بولا الادى.
كارانتين شارالارىن جەڭىلدەتۋدىڭ ازىرلەنگەن كريتەريلەرىنە سايكەس مينيسترلىك ينفەكتسيانىڭ رەپرودۋكتيۆتىك كورسەتكىشىن جانە كۆي-دەن ەمدەۋگە بەيىمدەلگەن ينفەكتسيالىق ستاتسيونارلاردىڭ توسەكتىك ورىن قورىنىڭ قامتىلۋ پايىزىن قاداعالايدى. مۇنداعى رەپرودۋكتيۆتىك كورسەتكىش دەگەنىمىز – ءبىر ناۋقاس وقشاۋلانعانعا دەيىن اۋرۋدى جۇقتىراتىن ادامدار سانى. وسىلايشا ءۇش اپتاداعى كارانتين ناتيجەسىندە ينفەكتسيانىڭ رەپرودۋكتيۆتىك كورسەتكىشى 1,2%-دان 0,99%-عا دەيىن تومەندەدى جانە توسەكتىك ورىنداردىڭ قامتىلۋ پايىزى 90%-دان 47%-عا كەمىدى.
دەرتىنە داۋا ىزدەپ دابىل قاققان جۇرتتىڭ دۇربەلەڭى دە باسىلا باستادى. قازىر جەر-جەردە ىندەتتىڭ سالعان ىلاڭى بىرتىندەپ سايابىرسىپ كەلەدى. جالپى, كارانتين رەجىمى وڭ ناتيجە بەرىپ, ەپيدەميالىق جاعدايدىڭ تۇراقتانىپ كەلە جاتقانىن ءوڭىر باسشىلارى دا راستاپ وتىر.
الماتى قالاسىنىڭ اكىمى باقىتجان ساعىنتاەۆتىڭ ايتۋىنشا, مەگاپوليستە كۆي جۇقتىرۋ ءوسىمى 2,2%-عا دەيىن تومەندەدى. قازىرگى كەزدە الماتىدا سovid-19 جۇقتىرعان 10 965 ادام تىركەلگەن. ولاردىڭ 6 341-ءى, ياعني 60%-ى ەمدەلىپ شىققان. كوروناۆيرۋستان 73 ادام قايتىس بولعان. پنەۆمونيا جانە سovid-19 كۇدىگىمەن جەدەل جاردەم شاقىرۋ سانى 4 ەسەگە ازايدى. ستاتسيونارلارعا جاتقىزىلاتىن ادامدار ەكى ەسە تومەندەدى. سونداي-اق ەمحاناعا جۇگىنۋشىلەر سانى دا ەكى ەسە ازايدى.
ال نۇر-سۇلتان قالاسىنىڭ اكىمى التاي كولگىنوۆ ەلوردادا ىندەت ينفەكتسياسىن جۇقتىرعاندىڭ 70%-ى, دالىرەك ايتقاندا 7260 ادام جازىلىپ شىققانىن, سوڭعى ءبىر اپتا ىشىندە ولاردىڭ سانى 1563-ءتى قۇراعانىن اتاپ ءوتتى. كارانتين ەنگىزىلگەن ساتتەن باستاپ قالادا ينفەكتسيا جۇقتىرۋ بويىنشا جاعدايدىڭ تۇراقتالۋى بايقالدى, دەنساۋلىق ساقتاۋ ۇيىمدارىنا تۇسكەن جۇكتەمە ەداۋىر ازايدى. اتاپ ايتقاندا, كۆي بويىنشا جەدەل جاردەمگە جۇگىنۋ 500-دەن 89-عا دەيىن, ياعني التى ەسە كەمىدى. سونىمەن قاتار پنەۆمونيامەن اۋىرىپ جاتقان ازاماتتار سانى ەكى ەسەگە ازايدى, ستاتسيونارلاردىڭ جۇكتەمەسى 99%-دان 38%-عا دەيىن تومەندەدى, رەانيماتسياداعى ادامدار سانى 57%-عا دەيىن ازايعان. ەگەر بۇرىن اۋرۋحانالارعا تاۋلىگىنە 500-گە جۋىق پاتسيەنت تۇسەتىن بولسا, قازىر ولاردىڭ سانى 90-عا دەيىن ازايعان.
سونداي-اق شىمكەنت قالاسىنىڭ اكىمى مۇرات ايتەنوۆ پەن ماڭعىستاۋ وبلىسىنىڭ اكىمى سەرىكباي ترۇموۆ ءوز وڭىرلەرىندەگى جاعدايدىڭ قالىپقا كەلە باستاعانىن ايتىپ وتىر. ءتىپتى اقتاۋ قالاسىندا اۋىرعان ادامداردىڭ ازايۋىنا بايلانىستى 100 ورىندىق №1 پروۆيزورلىق ستاتسيونار جۇمىسىن توقتاتىپتى. بىراق بۇل ستاتسيونار جاعداي ۋشىعا باستاسا كەز كەلگەن ۋاقىتتا ىسكە قوسىلۋعا دايىن تۇر.
وسىلايشا كارانتين رەجىمىنىڭ وڭ سەرپىنى شەكتەۋ شارالارىن كەزەڭ-كەزەڭىمەن جۇمسارتۋعا مۇمكىندىك بار ەكەنىن كورسەتىپ وتىر. ونىڭ ۇستىنە باسىندا سەلقوستىق تانىتقان كوپشىلىك ينفەكتسيانىڭ قاۋپىن سەزىنىپ, ساقتىق شارالارىن قاتاڭ ۇستانىپ جاتقانى تۇسىنىكتى. سوندىقتان ىندەتكە تويتارىس بەرەتىن قۋاتتى ءدارۋ تابىلمايىنشا, ماسكا تاعۋ, تازالىق, الەۋمەتتىك اراقاشىقتىقتى ساقتاۋ ماڭىزىن جوعالتپايدى.