اتىراۋ وبلىسىندا ەلىمىزدىڭ 9 ميلليونىنشى قازاعىنا تارتۋ ەتىلگەن پاتەردى اكىمدىك قايتىپ العالى جاتىر. بۇل تۋرالى كتك ارناسى حابارلادى.
اتىراۋ وبلىسىندا ەلىمىزدىڭ 9 ميلليونىنشى قازاعىنا تارتۋ ەتىلگەن پاتەردى اكىمدىك قايتىپ العالى جاتىر. بۇل تۋرالى كتك ارناسى حابارلادى.
بۇدان جەتى جىل بۇرىن يندەر اۋدانىنداعى ازەرباەۆتار اۋلەتىندە ەگىز بالالار دۇنيەگە كەلگەن. قازاقستاننىڭ 9 ميلليونىنشى قازاعى اتانعان ءبۇلدىرشىندەرگە ارناپ, سول كەزدەگى اۋدان اكىمدىگى ءۇش بولمەلى پاتەردى سىيعا تارتقان. بىراق ەگىزدىڭ اتا-اناسى ءۇيدى ءالى كۇنگە دەيىن ءوز اتتارىنا اۋدارا الماي كەلەدى.
ەگىزدەردىڭ اتاسى ماقتىم ازەرباەۆ قوس نەمەرەسى دۇنيەگە كەلگەندە جاريالانعان ماقالالاردى مۇقيات ساقتاپ قويىپتى. بارلىعى دا اسەم مەن اسەتكە پاتەر بەرىلگەنىن قۋانا حابارلاپتى. بىراق ازەرباەۆتار اۋلەتى بۇل قۋانىشتىڭ الدامشى ەكەنىن سول كەزدە بىلمەسە كەرەك. اۋدان اكىمدىگى ءۇيدىڭ بيۋدجەتتەن بەرىلگەنىن ايتقانىمەن, جەكەشەلەندىرۋگە جاتپايتىنىن ەسكەرتۋدى «ۇمىتىپ كەتىپتى».
«بۇل ماسەلە بىرنەشە جىلدان بەرى سوزىلىپ كەلەدى. اكىمدىكتىڭ كەسىرىنەن دەپ ويلايمىز. مەملەكەتتىڭ بىزگە بەرگەن پاتەرىن جالعا بەرەم دەگەن شەشىم كابىلداپ وتىر. ول ءۇشىن اي سايىن 3 مىڭ تەڭگە تولەپ وتىرۋ كەرەك. ءبىز مۇنى ساتىپ بەرگەن پاتەر دەپ ەسەپتەيمىز!», – دەيدى ماقتىم ازەرباەۆ.
اسەت پەن اسەم قازىر 1-سىنىپقا بارىپ ءجۇر. ارينە, 9 ميلليونىنشى قازاق رەتىندە العان پاتەرلەرىنىڭ سوڭى داۋعا اينالىپ بارا جاتقانىن بۇلدىرشىندەر بىلمەيدى. ال اۋدان باسشىلىعى جاعدايمەن جاقسى تانىس. ءتىپتى, ماسەلەنى شەشۋگە دە تالپىندىق دەپ سەندىرىپ وتىر. بىراق ەلىمىزدەگى تۇرعىن ءۇي زاڭى سىيعا بەرىلگەن پاتەردى جەكەشەلەندىرۋگە مۇمكىندىك بەرمەيتىن كورىنەدى.
«ماقتىم ازەرباەۆ جولداستىڭ ءۇيدى جەكەشەلەندىرىپ بەرۋ تۋرالى سۇرانىسىن قاناعاتتاندىرۋعا ءمۇمكىندىك جوق. بىراق بولاشاقتا زاڭدا وزگەرىستەر بولعان جاعدايدا بۇل ءوتىنىشتى قاناعاتتاندىرۋعا تىرىسامىز جانە ۇنەمى باقىلاۋدا ۇستايمىز», – دەيدى يندەر اۋدانى اكىمىنىڭ ورىنباسارى ءاليفوللا بالاحمەتوۆ.
اكىمنىڭ ورىنباسارى بولاشاقتى بولجاپ وتىرعاندا ەگىزدەردىڭ اتا-اناسى سىيعا العان پاتەردى اقىرى مەملەكەتكە قايتارۋى ءتيىس. دەگەنمەن, اۋەلدە ءباسىبۇتىن بەرىلمەيدى دەپ ەسكەرتۋدى ۇمىتقان باسشىلىق كىنالارىن تۇسىنگەن بولار, ازىرشە, ءۇيدى پانالاي تۇرۋعا رۇقسات بەرىپتى.
ايتقانداي, ەگىزدەردىڭ وكىل اكەسى اتىراۋعا بەلگىلى كاسىپكەر, ءماجىلىستىڭ بۇرىنعى دەپۋتاتى بولات قونارباي دەگەن ازامات. كەزىندە ءوزىن وكىل اكە جاريالاپ, ءتىپتى «ءبىر اپتا ىشىندە ءۇي تابىڭدار, اقشاسىن ءوزىم تولەيمىن» دەگەن ەكەن. الايدا, ۋادەسىن سول كۇيى ۇمىتقان سياقتى.
قۇرىش نۇرىمبەت.