بيىل قازاقستان 2020 جىلى وتەتىن ارميا حالىقارالىق ويىندارىندا "تانك بياتلونى" كونكۋرسىنا قاتىسۋىمەن شەكتەلەتىن بولادى. قازاقستانداعى ورىن العان ەپيدەميولوگيالىق جانە قاتىسۋشى ەلدەردەگى ورىن العان جاعدايلارعا قاراي قورعانىس مينيسترلىگىنىڭ باسشىلىعى وسىنداي شەشىمگە كەلدى. بۇل تۋرالى مينيسترلىكتىڭ ءباسپاسوز قىزمەتى حابارلادى, - دەپ جازادى Egemen.kz
قازىرگى ۋاقىتتا قازاقستاننىڭ قارۋلى كۇشتەرى كورونوۆيرۋسپەن كۇرەستە حالىققا قول ۇشىن بەرۋ جونىندەگى مىندەتتەردى اتقارۋدا, سونىمەن قاتار جوسپارلى مەرزىمدى اسكەري قىزمەتكە شاقىرۋ وتكىزىلۋدە. بۇل شەشىم حالىقارالىق ءىس-شارالاردى ۇيىمداستىرۋعا جانە وتكىزۋگە ارنالعان ۇنەمدەلگەن قاراجات ەسەبىنە نەگىزدەلگەن.
اتالعان "تانك بياتلونى" ويىنىنا قاتىسۋ بارىسىندا حالىقارالىق سانيتارلىق-ەپيدەميولوگيالىق نورمالار قاتاڭ ساقتالادى: ەكى اپتالىق كارانتين, كورونوۆيرۋسكە ەكى رەت پتسر-تەستىلەۋ جاسالادى.
اسكەري قىزمەتشىلەردىڭ الداعى جارىسقا بارىنشا دايىندالىپ جاتقانىن ايتا كەتكەن ءجون. سايىسقا ىرىكتەۋ وڭىرلىك قولباسشىلىقتار, اسكەر تۇرلەرى مەن تەكتەرى دەڭگەيىندە اسكەري بولىمدەردە جۇرگىزىلدى.
ەڭ ۋاكىلەتتى كوماندالاردىڭ ءبىرى رەتىندە قازاقستان جىل سايىن ارميا حالىقارالىق ويىندارىنا قاتىسىپ كەلەدى. 2019 جىلى شەتەلدە وتكەن باسقا سايىستارعا قاتىسا وتىرىپ, ەلىمىزدە دە ارميا ويىندارىنىڭ ءۇش ءتۇرى وتكىزىلگەن بولاتىن. سونداي-اق, باسقا ەلدەردە 13 حالىقارالىق كونكۋرسقا قاتىستى.
كوپتەگەن جۇلدەلى ورىندار ءبىزدىڭ اسكەري مامانداردىڭ جوعارى كاسىبي دايارلىق دەڭگەيىن كورسەتكەنىن بايقاتتى. وتكەن جىلى قازاقستاندىقتار جالپى كوماندالىق ەسەپتە الەمنىڭ 39 ەلىنەن, اتاپ ايتساق, ەۋروپا, ازيا, ورتالىق جانە لاتىن امەريكا, افريكا ەلدەرى اراسىنان ءۇش التىن, ەكى كۇمىس پەن توعىز قولا مەدالگە الىپ, ءۇشىنشى جۇلدەلى ورىندى يەلەندى. سايىستى وتكىزەتىن ەل ءداستۇر بويىنشا جەڭىسكە جەتەتىنى انىق.
وتكەن جىلى تانك بياتلونىندا وزگە ەلدەر وزدەرىنىڭ ۇلتتىق ارميا ساپىنداعى تانكتەرىن جەتكىزىپ سايىسقا ءتۇسىپ جارىسىپ جاتقاندا, قازاقستاندىق كوماندا سايىستى وتكىزۋشى ەلدىڭ اسكەري تەحنيكاسىندا جارىسىپ, ۇزدىك ۇشتىكتەن كورىندى.
ارميا حالىقارالىق ويىندارى – بۇل ءجاي جارىس ەمەس, اسكەري دايارلىقتىڭ ەرەكشە ءتۇرى, ءتۇرلى ەلدەردىڭ ارميالارىمەن وتەتىن حالىقارالىق وقۋ-جاتتىعۋ, ءتۇرلى جاعدايلارداعى جانە احۋالدارداعى جارىس تۇرىندە اسكەري قىزمەتشىلەردىڭ كاسىبي شەبەرلىكتەرىن شىڭداۋى, ءتۇرلى قارۋ-جاراق پەن اسكەري تەحنيكانى مەڭگەرۋى, ارميانىڭ دايارلىق دەڭگەيىن كورسەتىپ, تاجىريبە الماسۋى. بۇدان وزگە, وسىنداي اۋقىمدى حالىقارالىق سايىستارعا قاتىسۋ جەكە كاسىبي ەپتىلىكتى ارتتىرۋدا اسكەري قىزمەتشىلەرى ءۇشىن مىقتى موتيۆاتسيا بولماق.