ومىرلىك قاجەت جابدىقتار بۇرىنعى "رامادا پلازا" قوناق ۇيىندە ورنالاسقان № 3 قالالىق كوپسالالى اۋرۋحاناعا جەتكىزىلدى. قازىرگى ۋاقىتتا مۇندا كوروناۆيرۋس ينفەكتسياسى بار ءۇش جۇزگە جۋىق ناۋقاس ەم الۋدا, دەپ حابارلايدى covid19.astana.kz سايتى.
"بۇگىن ءبىز نۇر-سۇلتان قالالىق اكىمدىگىنەن 59 وتتەگى كونتسەنتراتورىن الدىق. بۇل ءبىزدىڭ ناۋقاستارىمىزعا ۇلكەن كومەك. جابدىقتار ولاردىڭ ەمدەلۋىنە جانە جاعدايىن جاقسارتۋعا كومەكتەسەدى", – دەيدى №3 كوپسالالى قالالىق اۋرۋحانا ديرەكتورىنىڭ ورىنباسارى جانار كسانوۆا.
بۇرىن حابارلانعانداي, ەلوردا اۋرۋحانالارى مەن ەمحانالارىنا كوروناۆيرۋس پەن پنەۆمونيانى ەمدەۋ ءۇشىن قوسىمشا مەديتسينالىق جابدىقتار ءتۇستى. ولاردىڭ ىشىندە 150 فلۋومەتر, 350-دەن استام وتتەگى كونتسەنتراتورى, تاياۋ كۇندەرى وكپەنى جاساندى جەلدەتۋگە ارنالعان 50 اپپارات كەلىپ تۇسەدى. جاقىن كۇندەرى قالا اۋرۋحانالارى مەن ەمحانالارىنا تاعى 250-دەن استام وتتەگى كونتسەنتراتى, 350 فلۋومەتر, 2 كومپيۋتەرلىك توموگراف جانە ت.ب. جابدىقتار كەلىپ تۇسەدى.