ەڭبەك قاتىناستارى بولىگىندە كونستيتۋتسيالىق قۇقىقتاردىڭ بۇزىلۋىنا بايلانىستى ماسەلەلەردى ەڭبەك ينسپەكتسياسى قارايدى, دەپ حابارلايدى نۇر-سۇلتان اكىمدىگىنىڭ رەسمي سايتى.
بۇگىن قالا اكىمدىگىندە وتكەن بريفينگتە, نۇر-سۇلتان قالاسىنىڭ قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى م.ا. ەرلان بەردالين كوروناۆيرۋس ينفەكتسياسىنىڭ الدىن-الۋ شارالارى كەزەڭىندەگى ەڭبەك قىزمەتىنىڭ ەرەكشەلىكتەرى تۋرالى ايتتى.
"جالدامالى قىزمەتكەرلەر ءۇشىن 42500 تەڭگە مولشەرىندەگى الەۋمەتتىك جاردەماقى تولەۋگە ءوتىنىشتى جۇمىس بەرۋشىلەر ءوز بەتىنشە بەرەدى. ارينە, بۇل قىزمەتى باس سانيتارلىق دارىگەردىڭ شەكتەۋ شارالارىنا تۇسكەن ۇيىمدار. ايتا كەتۋ كەرەك, بۇل تولەمدەر الەۋمەتتىك ساقتاندىرۋ قورىنان قاراستىرىلعان, ياعني جۇمىس بەرۋشىلەر بۇل ءۇشىن ەشقانداي قارجى تولەمەيدى", – دەدى ە. بەردالين.
الداعى جۇمىستارعا ءتيىستى باقىلاۋ جاساۋ ماقساتىندا نۇر-سۇلتان قالاسى اكىمدىگىمەن قۇرامىنا مۇددەلى مەملەكەتتىك ورگانداردىڭ قىزمەتكەرلەرى كىرگەن شتاب قۇرىلدى.
"ارينە, ەڭبەك قاتىناستارى بولىگىندە كونستيتۋتسيالىق قۇقىقتاردىڭ بۇزىلۋىنا بايلانىستى بارلىق ماسەلەلەردى ەڭبەك ينسپەكتسياسى قارايدى. كۇن سايىن ەڭبەك ينسپەكتسياسىنا 20-دان 40-قا دەيىن ادام كەلەدى. بۇل ماسەلەلەردىڭ كوپشىلىگى جۇمىس بەرۋشىلەرمەن ءتۇسىندىرۋ بارىسىنداعى اڭگىمەلەسۋدەن كەيىن وڭ شەشىمىن تابادى. ولاي بولماعان جاعدايدا قىزمەتكەر سوتقا جۇگىنەدى", – دەدى ە.بەردالين.
ەڭبەك قۇقىقتارىنىڭ بۇزىلۋىنا تاپ بولعان ازاماتتار دوستىق كوشەسى, 13 ۇيدە ورنالاسقان نۇر-سۇلتان قالاسىنىڭ ورتا ساپاسى جانە باقىلاۋ باسقارماسىنا جۇگىنۋگە قۇقىلى.
"جوعارىدا ايتىلعانداردى قورىتىندىلاي كەلە, جۇمىس بەرۋشىلەرگە بۇل جاعداي ەل ءۇشىن وڭاي ەمەس ەكەنىن, سوندىقتان اقىسىز دەمالىستاعى جۇمىسشىلاردىڭ ءتىزىمىن بەرۋ ماسەلەسىنە اسا جاۋاپكەرشىلىكپەن قاراۋىن سۇرايمىز", – دەپ تۇيىندەدى ە.بەردالين.