شىعىس قازاقستان وبلىسىنىڭ تارباعاتاي اۋدانىندا نوسەر جاۋىن سالدارىنان ۇيلەردى سۋ باستى. جاڭااۋىل تۇرعىندارىنىڭ ايتۋىنشا, 40 مينۋت تولاسسىز جاۋعان جاڭبىر سالدارىنان تەرىسايرىق وزەنىندەگى سۋ ارناسىنان اسىپ كەتكەن, - دەپ حابارلايدى Egemen.kz.
وعان تاۋداعى وزەن-بۇلاقتاردىڭ سۋى قوسىلىپ, سالدارىنان اۋىلدىڭ ورتالىق كوشەسىندەگى 10-عا جۋىق ءۇيدى سۋ باسقان. شاعىن ەلدى-مەكەندەگى سۋ دەڭگەيى شامامەن 20 سانتيمەتردى قۇراپتى. اۋداندىق ءورت ءسوندىرۋ قىزمەتكەرلەرى سۋدى سورعىزعانشا, تۇرعىندار تۋىستارىنىڭ ۇيىنە جايعاستىرىلعانىن ايتادى. زارداپ شەككەندەر جوق. قازىر ۇيلەردەن سۋ كەتكەن. كوميسسيا كەلگەن شىعىندى انىقتاپ جاتىر.