قادىرلى جەرلەستەرىم, باعا جەتپەس بايلىعىم – حالقىم! قازىر ءبىز اسا اۋىر كەزەڭدە تۇرمىز. مۇنداي سىني شاقتا قازاققا اۋىزبىرلىك اۋاداي قاجەت.
ويتكەنى ماڭگىلىك ەلدىڭ باستى قۋاتى – ونىڭ بىرلىگىندە, قيىندىقتى تاباندىلىقپەن ەڭسەرە الۋىندا. ۇلان بايتاق قازاق جەرىن اق نايزانىڭ ۇشىمەن, اق بىلەكتىڭ كۇشىمەن ساقتاپ قالعان بابالار جەڭىسىنىڭ باستى كىلتى – وسى بىرلىگىندە بولاتىن. الاۋىزدىققا بوي الدىرعان تالاي مەملەكەتتىڭ توز-توز بولىپ, جەر بەتىنەن جوق بولىپ كەتكەنىنە كارى تاريح كۋا. سودان ساباق الۋىمىز كەرەك. ويتكەنى بۇگىنگى ءبىزدىڭ بەتپە-بەت كەلىپ وتىرعان جاعدايىمىز دا مايداننىڭ ءبىر ءتۇرى. قارۋ الىپ سوعىس دالاسىنا شىقپاعانىمىزبەن, اقىل-پاراسات, سانا مەن مادەنيەتتىڭ سىنعا تۇسەر شاعى. سوندىقتان دا پرەزيدەنتىمىز قاسىم-جومارت توقاەۆتىڭ قابىلداپ جاتقان شەشىمدەرىنە تولىق قوسىلىپ, ءبىر جاعادان باس, ءبىر جەڭنەن قول شىعاراتىن اسا جاۋاپتى, كەزەك كۇتتىرمەس كەزەڭگە كەلدىك. قازىرگى جاعدايدا ءبارىمىزدى جەكە باس مۇددەسى ەمەس, تۇتاس ۇلت بولىپ قالۋ ماسەلەسى الاڭداتۋى كەرەك. ال ەڭسەلى ەل بولىپ, قاناتىمىزدى كەڭگە جايۋىمىز قازاقتىڭ اماندىعىنا, ياعني ارقايسىمىزدىڭ ۇلت الدىنداعى جاۋاپكەرشىلىكتى سەزىنۋىمىزگە تىكەلەي بايلانىستى. سەبەبى بۇل جاعدايداعى ءبىزدىڭ ءاربىر سالعىرت ارەكەتىمىز, نەمقۇرايلى نيەتىمىز ەرتەڭ ورنى تولماس وكىنىشكە الىپ كەلۋى مۇمكىن.
راس, قازىر حالىق شاراسىزدىقتان اشۋعا بوي الدىرعان. قورقىنىش پەن ۇرەي باسىم. ول زاڭدى دا. الايدا بۇل ۇرەي تەك ءوز ءومىرى مەن جاقىندارىنىڭ ساۋلىعى ءۇشىن عانا ەمەس, تۇتاس ۇلتتىڭ اماندىعىمەن استاسىپ جاتۋى كەرەك. بىزگە قازىر مەيىرىم اۋاداي قاجەت. ءبىر-بىرىمىزگە دەگەن قامقورلىق, جىلىلىق ءھام اۋىزبىرلىك قانا بۇل اجداھا ىندەتتىڭ قۇرساۋىنان امان الىپ قالا الماق.
ىندەت ەلىمىزدەگى بايلار مەن كەدەيلەر اراسىنداعى تەڭسىزدىكتى, ادامداردىڭ تۇرمىسى اراسىنداعى الشاقتىقتى ايقىن كورسەتىپ بەردى. جۇرەكتى اۋىرتاتىن دا وسى جاعداي. بىزگە ەندى شىنىمەن ويلانۋ كەرەك. ادام بايلىقتى قانشا جيعانىمەن, قاتتالعان قازىناسىن قىزعىشتاي قورىعانىمەن, قارا جەرگە وزىمەن بىرگە الىپ كەتە المايدى. ەسەسىنە, وسىنداي قيىن شاقتا مۇقتاج جاندارعا قول ۇشىن سوزىپ, مول ساۋاپقا كەنەلە الادى. ياعني ءومىردىڭ ءمانى – بايلىقتا ەمەس, دەننىڭ ساۋلىعىندا, ادامزاتتىڭ اماندىعىندا ەكەن. الەمدى جايلاعان مىنا جاعداي سول پەيىلىمىزدىڭ كورىنىسى شىعار بالكىم, كىم ءبىلسىن؟
ويتكەنى بۇگىنگى زاماندا ادامنىڭ پەيىلى تارىلىپ, قۋ دۇنيەنىڭ ق ۇلى بولىپ كەتتى. سونىڭ سالدارىنان مەيىرىم, جۇرەك, جان جىلۋى سىندى ادامي اياۋلى سەزىمدەر, رۋحاني قۇندىلىقتاردىڭ قادىرى دە قۇلدىرادى. بۇل ىندەت وسى نيەتىمىزدى تۇزەپ, ءار ادامنىڭ ءومىر ءمانى تۋراسىندا ويلانۋىنا جىبەرىلگەن سىناق پا دەپ تە ويلايمىن. كۇن سايىن ەستىرتىپ جاتقان ءولىم مەن جوقتاۋ ساي-سۇيەگىڭدى سىرقىراتادى. جاراتقان يەم جاقىندارىمىزدى جوعالتۋدان, قازاقتىڭ قىناداي قىرىلۋىنان ساقتاعاي! ويلانساق ەكەن! تۇيسىكپەن تۇسىنسەك ەكەن. ءار ادام ءوز ارەكەتى, ساقتىق شارالارىن ساقتاۋى ارقىلى كۇللى الەمدى قۇتقارۋعا سەپتەسە الاتىندىعىن ۇعىنسا ەكەن. حالقىم توي-تومالاقتى, جيىن-باسقوسۋلاردى شەكتەي تۇرىپ, ۇلت ساۋلىعىن ءبىرىنشى ورىنعا قويسا دەگەن ۇلكەن تىلەگىم بار.
تۇسىنەمىن, ايلار بويى ءتورت قابىرعاعا قامالىپ وتىرۋ وڭاي ەمەس. بىراق قيىن دا بولسا بۇل سىناققا ءتوزۋىمىز قاجەت. ەلىمىزدىڭ ەرتەڭى, جاستاردىڭ بولاشاعى ءۇشىن! مىنە, 4 ايدان اسا ۋاقىت ۇيدە وتىرمىن. مەن دە ابدەن جالىعىپ كەتتىم. بىراق امال قانشا؟! ءتوزۋىمىز كەرەك! سەبەبى ارقايسىمىزدىڭ ارەكەتىمىزدىڭ ارتىندا ۇلتتىڭ بولاشاعى, بارشا ادامزاتتىڭ اماندىعى تۇر. پرەزيدەنتىمىز قاسىم-جومارت توقاەۆ تا وسى ءبىر قيىن جاعدايدان شىعۋدىڭ جولىن ىزدەپ شىرىلداپ ءجۇر. ەلىمىزدىڭ تىزگىنىن ۇستاعان اردا ازاماتقا ءدال قازىرگى قيىن شاقتا قولداۋ ءبىلدىرۋىمىز كەرەك. ۇلتىمىزدى امان الىپ قالۋ دەيتىن ۇلى يدەيانىڭ, ماعىنالى ماقساتتىڭ توڭىرەگىنە ۇيىسۋىمىز كەرەك. ءاربىر ادام, قىزمەتكەر وسى سىندى ەڭسەرۋ ءۇشىن دە جانىن سالۋى, ادال قىزمەت ەتۋى قاجەت. ولاي بولمايىنشا, جاعدايىمىز قيىن. جولايرىققا كەلىپ تۇرمىز با دەپ تە ويلايمىن كەيدە. وتكەندە پرەزيدەنت ايتقانداي, قازىر توي تويلايتىن ەمەس, تۇتاس ۇلت بولىپ ۇيىسۋدىڭ, امان قالۋدىڭ جولىن ويلاپ, ىزدەيتىن ۋاقىت. قازاقشىلىقتى قويىپ, ادامشىلىققا كوشۋىمىز كەرەك! ويتكەنى الەمدى مەيىرىم مەن ادامشىلىق قانا قۇتقارا الادى! وسىنى ءبىر ساتتە ەسىمىزدەن شىعارماساق ەكەن! اللا لايىم اماندىعىمىزدان ايىرماسىن!
ءاسانالى ءاشىموۆ,
كسرو جانە قازاقستاننىڭ حالىق ءارتىسى, قازاقستاننىڭ ەڭبەك ەرى, مەملەكەتتىك سىيلىقتىڭ لاۋرەاتى