جاعدايدى رەتتەۋدە قابىلدانعان شارالار – كارانتين ەنگىزۋ, احۋالدىق ورتالىق قۇرۋ ماڭىزدى ءرول اتقاردى, دەپ حابارلايدى نۇر-سۇلتان اكىمدىگىنىڭ ءباسپاسوز قىزمەتى.
نۇر-سۇلتان جەدەل جاردەم قىزمەتىنە قوڭىراۋلار سانى ەكى ەسە ازايدى. بۇل تۋرالى قالالىق جەدەل جاردەم ستانتسياسىنىڭ ديرەكتورى مۇرات ورازباەۆ مالىمدەدى.
"بۇگىنگى تاڭدا جەدەل جاردەمگە جۇرگىنگەندەر سانى 2200-ءدى قۇرايدى, كارانتينگە دەيىن 4000-عا جۋىق ءوتىنىش تۇسكەن. سونىمەن قاتار قوڭىراۋلاردىڭ ازايعانى بايقالادى. قازىر كۇنىنە 1400-گە جۋىق قوڭىراۋ تۇسەدى, بۇعان دەيىن ولاردىڭ سانى 3 مىڭعا جۋىق بولعان. ولاردىڭ ىشىندە كوروناۆيرۋس ينفەكتسياسىنا بايلانىستى 500 قوڭىراۋ بولاتىن, بۇگىن تاڭەرتەڭ – 182. ياعني, ءبارى ەكى ەسە ازايدى", – دەيدى م.ورازباەۆ.
جەدەل جاردەم ديرەكتورىنىڭ ايتۋىنشا, ەڭ كوپ جۇكتەمە ماۋسىمنىڭ سوڭىندا تىركەلدى. جاعدايدى رەتتەۋدە قابىلدانعان شارالار – كارانتين ەنگىزۋ, احۋالدىق ورتالىق قۇرۋ, ناۋقاستارعا تەلەفون ارقىلى كەڭەس بەرۋ ماڭىزدى ءرول اتقاردى. دەگەنمەن, دارىگەرلەردىڭ ايتۋىنشا, بوساڭسۋعا ءالى ەرتە.
"الدا كۇز, جرۆي ماۋسىمى. كۆي قايتا ءورشۋى دە مۇمكىن. ءبىز بۇعان دايىن بولۋىمىز كەرەك. ەپيدەميولوگيالىق احۋالدىڭ ناشارلاۋى مۇمكىن ەكەنىن ەسكەرىپ, ءبىز ادامدارىمىزدى, تەحنيكالارىمىزدى دايىنداۋدامىز. اۆتوكولىك پاركىن كەڭەيتۋدەمىز. سونداي-اق, تامىز ايىندا 14 رەانيموبيل كەلەدى دەپ كۇتىلۋدە. مەديتسينا كوللەدجدەرى تۇلەكتەرىنىڭ اراسىنان قىزمەتكەرلەردى قوسىمشا ىرىكتەۋ, ولاردى وقىتۋ جانە دايىنداۋ جۇزەگە اسىرىلۋدا", – دەپ ءتۇسىندىردى ەلوردالىق جەدەل جاردەم ديرەكتورى.
ەستەرىڭىزگە سالا كەتەيىك, حابارلانعانداي, نۇر-سۇلتان ەمدەۋ مەكەمەلەرىندە 360 جاس مامان جۇمىس ىستەي باستايدى. ءار مەديتسينا ۇيىمىندا جاستارعا كەڭەس بەرەتىن اعا مامان بار.