ءبىز قازىر قيىن كەزگە تاپ بولىپ وتىرمىز. تىپ-تىنىش جاتقان ەلگە تۇتقيىلدان جاۋ شاپقانداي كۇيدەمىز. الماتىداعى اعايىنداردى بىلاي قويعاندا, سوناۋ شىمكەنت, تاراز جاقتان قارالى حابارلار كوبەيدى. وسى ءبىر ىندەتتەن باقيلىق بولعان بارشا وتانداستارىمىزدىڭ جاندارى ءجانناتتا شالقىسىن.
بۇل ەلگە عانا ەمەس, مەملەكەت باسىنا دا تۇسكەن سىناق سەكىلدى. قيىن جاعدايلارعا قانشالىقتى دايىن ەكەنىمىزدى كورسەتىپ بەردى. اسىرەسە مەديتسينا جاعىنداعى كەمشىلىكتەرىمىز سورايىپ-سورايىپ كورىنىپ قالعانداي. نە دەسەك تە, حالقىمىزعا توتەننەن كەلگەن بۇل قيىندىقتى ەڭسەرۋىمىز كەرەك. بيلىكتىڭ ايتقان شارالارىن قاتاڭ ساقتاۋىمىز قاجەت. بايقاۋىمشا, وقشاۋلانۋدى تۇسىنبەي جاتقان قاۋىم كوپ. توي-تومالاق ءالى دە بار. ءوز باسىم جاقىندارىمنىڭ ەكى تويىنا تىيىم سالدىم. وسى ۋاقىتتا اللا بارىمىزگە سابىر بەرسىن. اقىل-پاراساتقا جۇگىنەيىك.
مارال ىسقاقباي,
جازۋشى