ماسكەۋدىڭ باتىس قاپتالىنداعى بيريۋلەۆ اۋدانىنداعى جۇرتتى بىرنەشە كۇن بويى كوشەگە شىعارعان وقيعانىڭ سەبەبى – 25 جاسار ەگور ششەرباكوۆتى وسىنداعى كوكونىس قويماسى ماڭىندا ولتىرگەن ادامنىڭ كىم ەكەنى انىقتالدى. ول ورحان زەينالوۆ ەسىمدى ازەربايجان جىگىتى بولىپ شىقتى. بۇل تۋرالى يتار-تاسس حابارلادى.
«انىقتالعان مالىمەتتەر بويىنشا, ۆوسترياكوۆ تۇيىعىنداعى جاس جىگىتتى ولتىرۋگە قاتىستى وقيعانىڭ باستى قاھارمانى بەلگىلى بولدى. ول ازەربايجاننىڭ تۋماسى ورحان زەينالوۆ ەسىمدى جىگىت. قازىر كۇدىكتىنى ۇستاۋدىڭ بارلىق شارالارى قاراستىرىلىپ جاتىر», - دەلىنگەن پوليتسيا حابارلاماسىندا.
ەگور ششەرباكوۆ 10 قازان كۇنى تۇندە ءولتىرىلدى. بەلگىسىز بىرەۋ ونى قىزىنىڭ كوزىنشە دەنەسىنىڭ بىرنەشە جەرىنە پىشاق سالىپ ولتىرگەن.
وسى وقيعادان كەيىن باتىس بيريۋلوۆودا تۇرعىنداردىڭ جيىنى ءوتىپ, ولار جاس جىگىتتى ءولتىرۋشىنى تاۋىپ بەرۋدى تالاپ ەتتى. ولار سونداي-اق وسى اۋداندا تۇراتىن بارلىق ميگرانتتاردى تەكسەرۋدى تالاپ ەتى. وسىدان كەيىن ۇلتتىق ۇراندار كوتەرگەن توپ «بيريۋزا» ساۋدا ورتالىعىن تالقاندادى. جۇرت كىسى ءولتىرۋشى تاپ وسى جەردە تىعىلىپ جاتىر دەپ ەسەپتەدى.
توبىر ومون-مەن ۇستاستى. وسىعان بايلانىستى 400 ادام قاماۋعا الىندى. ولاردىڭ 70-ىنە اكىمشىلىك شارالار قولدانىلدى.
قازىر تەرگەۋ كوميتەتى بازانىڭ جۇمىسىن بەس كۇنگە توقاتىپ قويىپ, جۇمىس جاساپ جاتىر. ال بيريۋلەۆ اۋدانىنىڭ ىشكى ىستەر ءبولىمىنىڭ باستىعى ورنىنان الىندى.
مۇرات ايتقوجا.