ساۋدا جانە ينتەگراتسيا مينيسترلىگىنىڭ مالىمەتىنشە, وتاندىق تاۋارلاردىڭ سىرتقى نارىقتا جىلدام تارالۋىنا ەلەكتروندى كوممەرتسيا سەپتىگىن تيگىزىپ كەلەدى. ۆەدومستۆو باسشىسى باقىت سۇلتانوۆ تسيفرلى ساۋدا الاڭدارىن ارتتىرۋ باعىتىندا "ينتەرنەت-ەكسپورتتاۋشى مەكتەبى" باعدارلاماسى ىسكە قوسىلعانىن ايتتى.
بۇعان قوسا Alibaba پلاتفورماسى ارقىلى 50 قازاقستاندىق كاسىپورىن ونىمدەرىن ەكسپورتتاۋعا مۇمكىندىك الدى دەپ ناقتىلادى مينيستر.
"16 تاۋار پوزيتسياسى بويىنشا باسىمدىق بەرىلىپ, ولاردى جاڭا نارىقتاردا ىلگەرىلەتۋ ءۇشىن تىڭ شەشىمدەر ازىرلەنەدى. جىل باسىنان بەرى Kazakh Export جەلىسى بويىنشا 39 وتاندىق ەكسپورتتاۋشىعا قولداۋ كورسەتىلدى. ونىڭ ىشىندە 26-سى توتەنشە جاعداي كەزەڭىندە 6 ملرد تەڭگەدەن استام قاراجاتقا ساقتاندىرۋ قولداۋىنا يە بولدى", دەدى ب.سۇلتانوۆ.
اتالعان مينيسترلىك 2025 جىلعا قاراي تاۋارلار مەن قىزمەتتەردىڭ شيكىزاتتىق ەمەس ەكسپورتىن 41 ملرد دوللارعا دەيىن ارتتىرۋدى كوزدەپ وتىر. بىلتىر بۇل كورسەتكىش 24,7 ملرد دوللار كولەمىندە بايقالدى.