سوڭعى ءۇش جىلدا ۇزىندىعى 325 شاقىرىم بولاتىن 25 تاۋ جولى اباتتاندىرىلدى. ۇلكەن الماتى شاتقالىنداعى 200 شاقىرىمنان استام تاۋ مارشرۋتتارىن جابدىقتاۋ جوسپارلاندى. ۇلكەن الماتى كولى مەن بۋتاكوۆكا شاتقالىنداعى تانىمال تۋريستىك ورىنداردا كورۋ الاڭدارى ورناتىلادى, فۋرمانوۆ شىڭىنداعى بۇرىلىس قالپىنا كەلتىرىلدى, دەپ حابارلايدى Egemen.kz.
جەكە ينۆەستورلار ەسەبىنەن كىشى الماتى شاتقالىندا ۇزىندىعى 137 شاقىرىم بولاتىن 13 تاۋ مارشرۋتتارى جەتىلدىرىلەتىن بولادى. باعدارلار بويىندا اقپاراتتىق تاقتالار, ستەندتەر, ماڭدايشالار, ورىندىقتار, تىرەۋىشتەر, فوتو ايماق, ءجۇرىس جولدارى جانە جەتى شاقىرىمدىق ەكى كروسس-مارشرۋتتار كيلومەترمەن بەلگىلەنەدى, موتيۆاتسيالىق بيلبوردتار مەن ەسكەرتۋ بەلگىلەرى ورناتىلادى.
"وتكەن جىلى 1000 شاقىرىمنان استام تاۋ جولدارى تسيفرلاندىرىلدى. ساندىق جولدار (60 مارشرۋت) 2GIS كارتالارىندا جەكە مارشرۋتتار بويىنشا سىزىلعان جانە وفلاين رەجيمىندە قول جەتىمدى. بارلىق 60 جول ءۇش تىلگە (اعىلشىن, ورىس, قازاق) اۋدارىلعان. بيىل تسيفرلاندىرۋ جوسپارلانۋدا. ۇزىندىعى 200 شاقىرىمنان اساتىن 15 تاۋ مارشرۋتتارى", دەيدى الماتى قالالىق تۋريزم باسقارماسى باسشىسىنىڭ ورىنباسارى قاليبەك اقىلبەكوۆ.
سونداي-اق ول وتكەن جىلدىڭ سوڭىندا جەكە ينۆەستور وتكەل شاتقالىنداعى سەرۋەندەۋ جولىن جانە الما-اراسان شيپاجايىنىڭ جانىنداعى جىلۋ سەرىپپەسىن جاقسارتۋدى اياقتاعانىن ايتتى. التى وتپەلى كوپىر سالىندى, باسپالداق قالپىنا كەلتىرىلدى, باقىلاۋ پالۋباسى جانە جاتتىعۋ الاڭدارى ۇيىمداستىرىلدى. بيىل وسى جەردە جەكە ينۆەستور "الما-اراسان" شيپاجايى جانىنداعى ايالداما مەن "پروحودنوە" شاتقالىنداعى گاباريتتى قالپىنا كەلتىرۋدى جوسپارلاپ وتىر.
"الماتى ءتۋريزمىن دامىتۋدىڭ مۇمكىندىكتەرى كوپ. الداعى ۋاقىتتا باسىمدىق بەرەتىن باعىت– بۇل الماتى وبلىسىنىڭ تاۋ كلاستەرى. قالالىق كۋرورتتى سالۋ ءۇشىن وتكەن جىلدىڭ ماۋسىم ايىندا جالپى الاڭى جەتى گەكتار بولاتىن تسسكا تاۋ شاڭعىسى كۋرورتى جانە ۇزىندىعى 1,6 شاڭعىمەن جۇگىرۋ قورعانىس مينيسترلىگىنە كوممۋنالدىق مەنشىككە بەرىلدى. بيىل جوعارىدا اتالعان جەرگە تەحنيكالىق-ەكونوميكالىق نەگىزدەمە ازىرلەۋ جوسپارلانۋدا", دەپ تولىقتىردى اقىلبەكوۆ.
بۇدان بولەك, بارىستىڭ پوپۋلياتسياسىن ساقتاۋعا قوعامنىڭ نازارىن اۋدارۋ ءۇشىن جىبەك جولى داڭعىلىنا وسى جانۋاردىڭ مۇسىندەرىن ورناتۋ جوسپارلانۋدا