دەنساۋلىق ساقتاۋ ءمينيسترى ەلجان ءبىرتانوۆ مەديتسينا قىزمەتكەرلەرىن كاسىبي مەرەكەسىمەن قۇتتىقتاپ, Facebook پاراقشاسىندا جازدى, - دەپ حابارلايدى Egemen.kz
"قۇرمەتتى ارىپتەستەر! بارشاڭىزدى كاسىبي مەرەكەمىز – مەديتسينا قىزمەتكەرلەرى كۇنىمەن شىن جۇرەكتەن قۇتتىقتايمىن! COVID-19 پاندەمياسى كەزىندە جۇقپالى اۋرۋلار اۋرۋحاناسىندا, پروۆيزورلىق ستاتسيونار, جەدەل مەديتسينالىق جاردەم ستانتسيالارى مەن جالپى, بارلىق دەنساۋلىق ساقتاۋ ۇيىمدارىندا مەديتسينا قىزمەتكەرلەرى پاتريوتتىق سەزىممەن, جوعارى جاۋاپكەرشىلىكپەن, كاسىبي بىلىكتىلىگىن كورسەتىپ, ەڭبەك ەتۋدە.
قازىر سىزدەر ايانباي ءار پاتسيەنتتىڭ ءومىرىن ساقتاپ قالۋداسىزدار. الدارىڭىزعا كومەك سۇراپ كەلگەن ادام عانا مەديتسينا قىزمەتكەرلەرىنىڭ ناۋقاسقا دەگەن ەرەكشە مەيىرىمىن, ءار پاتسيەنتكە مۇقيات قارايتىنىن قاسيەتى مەن شەبەرلىگىن كورەدى, سەزەدى. تاۋلىك بويى, مەرەكە كۇنى دە الدىڭعى شەپتە جۇرگەن بارلىق مەديتسينا قىزمەتكەرىنە شەكسىز العىس ايتقىم كەلەدى.
قازاقستاندىق دارىگەرلەردىڭ وسىنداي قيىن ۋاقىتتا باسىمىزعا تۇسكەن اۋىرتپالىقتى جەڭە الاتىنىنا سەنىمدىمىن. مەن بۇعان قازىر ارىپتەستەرىمنىڭ قولىندا ەمدەلىپ جاتىپ تاعى كوز جەتكىزدىم - ولار ءوز ءىسىنىڭ كاسىبي شەبەرى. بارشاڭىزعا مىڭ العىس!", دەپ جازدى ەلجان ءبىرتانوۆ.
سونداي-اق مينيستر مەديتسينا سالاسىنداعى وڭ وزگەرىستەردى اتاپ ءوتتى.
"سوڭعى جىلدارى وتاندىق مەديتسينادا كوپ نارسە تۇبەگەيلى وزگەردى: دەنساۋلىق ساقتاۋ سالاسىندا مەديتسينا عىلىمى مەن اقپاراتتىق تەحنولوگيالار دامۋدا, جاڭا جوعارى تەحنولوگيالىق ورتالىقتار سالىندى. جاقىندا عانا ەڭ قىسقا مەرزىمدە, 2 اپتا ىشىندە ەلىمىزدىڭ ۇلكەن مەگاپوليستەرىندە جۇقپالى اۋرۋلار اۋرۋحاناسىن سالدىق.
اۋرۋحانالار مەن ەمحانالاردى جابدىقتاۋ ايتارلىقتاي جاڭارتىلدى, جوعارى تەحنولوگيالىق مەديتسينالىق كومەكتىڭ قولجەتىمدىلىگى ءوستى.
قازىر حالىق دەنساۋلىعى تۋرالى كودەكس مەملەكەت باسشىسىنىڭ قول قويۋىنا جىبەرىلدى, قۇجاتتا پرەزيدەنتتىڭ تاپسىرماسى بويىنشا قوعامدا مەديتسينا قىزمەتكەرىنىڭ مارتەبەسىن ارتتىرۋ, قۇقىقتارى مەن مۇددەلەرىن قورعاۋ جونىندەگى نورمالار بار. بۇل بارلىعىمىز ءۇشىن, ەڭ الدىمەن ءبىزدىڭ ازاماتتارىمىزدىڭ دەنساۋلىعىن قورعاۋ ءۇشىن ۇلكەن قادام جانە جەتىستىك دەپ سەنىممەن ايتا الامىن.
وسى وزگەرىستەردىڭ بارلىعى سىزدەردىڭ ەڭبەكتەرىڭىز, ارىپتەستەر! تاعى دا اتاپ وتكىم كەلەدى, قازىر ەڭ باستىسى – ەلىمىزدە پاندەمياعا قارسى كۇرەستى جالعاستىرۋ قاجەت, ال ءبىز بىرگە مىندەتتى تۇردە جەڭەمىز!
سىزدەردىڭ ادال ەڭبەكتەرىڭىزدى جوعارى باعالايمىز جانە ونىڭ قادىرىن بىلەمىز. قىزمەتتەرىڭىزگە تابىس, بولاشاققا سەنىم مەن وتباسىلارىڭىزعا اماندىق تىلەيمىن! وزدەرىڭىزگە ساق بولىڭىزدار. دەندەرىڭىز ساۋ بولسىن!", دەپ جازدى ەلجان ءبىرتانوۆ.