ەڭ ۇزدىك سۋرەتتەر "ابايدىڭ قارا سوزدەرى" مەرەيتويلىق كىتابىنا باسىلادى

بايقاۋعا مۇرىندىق بولعان "BAURZHAN foundation" جەكە قورى شىعارماشىلىق جارىستىڭ ناتيجەسىن "بالالار الەمدى بەينەلەيدى" قق جانە "Samruk-Kazyna Trust" الەۋمەتتىك جوبالاردى دامىتۋ قورىمەن بىرلەسە وتىرىپ شىعاردى. ەڭ ۇزدىك سۋرەتتەر اباي قۇنانباەۆتىڭ 175 جىلدىعىنا ارنالعان "قارا سوزدەر" كىتابىنىڭ يلليۋستراتسيالانعان باسىلىمىندا جاريالانادى.

وسىلايشا, ويشىل اقىننىڭ مەرەيتويى قارساڭىندا ءجۇرىپ جاتقان شارالار قاتارىنا "قارا سوزدەر" سۋرەت بايقاۋى دا قوسىلدى. اتى ايتىپ تۇرعانداي, بايقاۋ – اباي قۇنانباەۆتىڭ 45 وسيەت اڭگىمەسى مەن فيلوسوفيالىق تراكتاتتارىنان تۇراتىن "ابايدىڭ قارا سوزدەرىنە" نەگىزدەلگەن. ءدال وسى اڭگىمەلەر بالالاردىڭ شىعارماشىلىق جۇمىسىنىڭ وزەگىنە اينالدى.

بايقاۋعا بارلىعى بۇكىل قازاقستاننىڭ جاس سۋرەتشىلەرىنەن 300-گە جۋىق جۇمىس كەلىپ ءتۇستى.  ابايدىڭ قارا ءسوزىن ءتۇسىنىپ, ونى بەينەلەۋ – جەڭىمپازداردى تاڭداۋدىڭ نەگىزگى ولشەمى بولدى. ناتيجەسىندە كاسىبي سۋرەتشىلەردەن تۇراتىن ساراپشىلار قازىلار القاسى: يلليۋستراتور جانە جازۋشى اسىلگۇل بايدارالينا, شىنى, كەراميكا جانە اكۆارەلدى كەسكىندەمە شەبەرى مەرەي يبراگيموۆ, سۋرەتشى-گرافيك مۇرات ءدىلمانوۆ, قق "بالالار الەمدى بەينەلەيدى" ديرەكتورى ءمولدىر بەكجان جانە BAURZHAN قورىنىڭ جوبا-مەنەدجەرى سايدا يبراگيموۆا ۇزدىك 45 جۇمىستى ىرىكتەپ الدى.

بايقاۋدىڭ باستى ەرەكشەلىگى – جەڭىمپازداردىڭ جۇمىستارى تۇساۋكەسەرى وسى جازدىڭ سوڭىنا جوسپارلان "ابايدىڭ قارا سوزدەرى" اتتى جاڭا مەرەيتويلىق كىتاپ باسىلىمىنا ەنەدى. كىتاپتار ەلدەگى بارلىق كىتاپحانالارعا تاراتىلاتىندىقتان قولجەتىمدى بولادى.

"ابايدىڭ قارا سوزدەرى" بايقاۋىنىڭ نەگىزگى ماقساتى – بۇل ارينە, اباي قۇنانباەۆ قالدىرعان قۇندىلىقتارىنىڭ ارقىلى وسكەلەڭ ۇرپاققا ءوزىنىڭ شىعارماشىلىق الەۋەتىن اشۋعا كومەكتەسۋ. ءبىز جاڭا سۋرەتتى كىتاپ قازىرگى جاستار شىعارماشىلىعى مەن ۇلكەندەردىڭ دانالىعىنىڭ سيمۆولىنا اينالاتىنىنا سەنىمدىمىز, - دەيدى BAURZHAN قورى جوباسىنىڭ مەنەدجەرى سايدا يبراگيموۆا.

الماتى