كوروناۆيرۋستىڭ شەڭگەلى تاعى ءبىر ادامنىڭ ءومىرىن ءۇزىپ جىبەردى. بۇل جولى جىلىوي اۋدانىنىڭ 48 جاستاعى تۇرعىنى قاۋىپتى ىندەتتەن كوز جۇمعان ءتورتىنشى ادام رەتىندە تىركەلدى, - دەپ حابارلايدى Egemen.kz.
وبلىستىق دەنساۋلىق ساقتاۋ باسقارماسىنىڭ حابارلاۋىنشا, 1972 جىلعى ناۋقاستىڭ 13 ماۋسىمدا دەنە قىزۋى كوتەرىلىپ, تىنىس الۋى قيىنداپ, ازداعان جوتەلمەن جىلىوي اۋداندىق اۋرۋحاناسىنا جۇگىنىپتى. دارىگەرلەر ناۋقاستى پروۆيزورلىق بولىمگە جەدەل جاردەم كولىگىمەن جەتكىزىپتى. ناۋقاسقا جاسالعان كت ساراپتاماسىنىڭ قورىتىندىسىندا وكپەسىنىڭ 50%-ى قابىنعانى راستالىپتى.
"جاعدايىنىڭ اۋىرلىعىنا بايلانىستى ينفەكتسيالىق اۋرۋحانانىڭ بوكس پالاتاسىنا جاتقىزىلىپ, كومەك كورسەتىلدى. وبلىستىق اۋرۋحانا دارىگەرلەرىنىڭ كەڭەسىمەن وكپەنى جاساندى جەلدەتۋ اپپاراتىنا قوسۋ تۋرالى شەشىم قابىلداندى. الايدا, دارىگەرلەر تاراپىنان جاسالعان كومەككە قاراماستان, ناۋقاس 15 ماۋسىم كۇنى قايتىس بولدى", - دەپ حابارلادى وبلىستىق دەنساۋلىق ساقتاۋ باسقارماسىنان.
ناۋقاستىڭ بۇرىن دەنساۋلىعىنا بايلانىستى ەسەپتە تۇرماعانى انىقتالىپ وتىر.
اتىراۋ وبلىسى