الماتىدا قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى (قازمۇببۋ) نەگىزىندە مەدبيكەلەر (مەداعالار), فەلدشەرلەر مەن اكۋشەرلەر دايارلايتىن جاڭا مەديتسينالىق كوللەدج اشىلدى. كوللەدج ەلىمىزدىڭ دەنساۋلىق ساقتاۋ سالاسى ءۇشىن باسەكەگە قابىلەتتى بىلىكتى قىزمەتكەرلەردى دايارلاۋ سالاسىندا وقىتۋدىڭ فلاگمانى بولۋعا ءتيىس, - دەپ حابارلايدى Egemen.kz.
"قازمۇببۋ" – قازاقستاننىڭ ءبىلىم بەرۋ نارىعىندا ساپالى مەديتسينالىق ءبىلىم بەرەتىن, جارتى عاسىردان اسقان تاريحى بار بەدەلدى جوعارى وقۋ ورنى. كوللەدجدىڭ اشىلۋىمەن ەندى 9 جانە 11 سىنىپ تۇلەكتەرى مەديتسينا سالاسىندا ۇزدىكسىز ءبىلىم الۋ مۇمكىندىگىنە يە بولادى.
"جاڭا كوللەدجدىڭ باسقالاردان ەرەكشەلىگى - مەديتسينالىق مامانداردى دايارلاۋدا جىلدار بويى ۋنيۆەرسيتەت نەگىزىندە جاسالعان تەوريالىق جانە پراكتيكالىق تاجىريبە قولدانىلادى. اتاپ ايتقاندا, پروفەسسورلىك-وقىتۋشىلار قۇرامى, ۋنيۆەرسيتەتتىڭ كلينيكالىق بازالارى ءبىزدىڭ مەديتسينالىق كوللەدجدىڭ دە وقۋ-تاربيە پروتسەسىنە ەنگىزىلەدى.
سونداي-اق, ءبىزدىڭ كوللەدجدىڭ تۇلەكتەرى وزدەرىنىڭ دەنساۋلىق ساقتاۋ سالاسىنىڭ مامانى رەتىندە قالىپتاسۋىنداعى وقۋىن ۋنيۆەرسيتەتتىڭ كەلەسى دەڭگەيلەرى – باكالاۆريات, ينتەرناتۋرا, رەزيدەنتۋرا, ماگيستراتۋرا جانە دوكتورانتۋرا دەڭگەيلەرىندە جالعاستىرا الادى", – دەيدى قازمۇببۋ رەكتورى قايىرجان ابدىحالىقوۆ.
وقۋ ورنى العاشقى ءبىلىم الۋشىلاردى 2020-2021 وقۋ جىلىنا قابىلدايدى.
الماتى