وتكەن اپتادا فرانتسيا قۇنى 15 ملرد ەۋرو تۇراتىن اەروعارىش سەكتورىن قولداۋ جوسپارىن تانىستىردى. ەل بيلىگى قورشاعان ورتاعا زيانسىز ۇشاقتار ءوندىرىسىن قولعا الۋ ارقىلى كوروناۆيرۋس كەسىرىنەن جۇمىسىنان ايىرىلعان 100 مىڭ ادامعا كومەكتەسۋدى كوزدەيدى.
ۇكىمەت پەن سالا كوشباسشىلارىنىڭ بىرلەسە اتقاراتىن بۇل جوسپارى بويىنشا كومەكتىڭ العاشقى بولىگى – 7 ملرد ەۋرو Air France اۋە كومپانياسىنا بەرىلگەن. سونداي-اق قورعانىس سالاسىنا جۇمسالاتىن قارجى كولەمىن دە ارتتىرۋ قاراستىرىلادى. بۇل جوسپاردى ىسكە اسىرۋ ءۇشىن Airbus پەن Dassault Aviation ۇشاق وندىرۋشىلەرى, قوزعالتقىش وندىرەتىن Safran جانە Thales تەحنولوگيالىق كومپانياسى 1 ملرد ەۋرو كولەمىندە ينۆەستيتسيا قۇيماق.
فرانتسيانىڭ قارجى ءمينيسترى برۋنو لە مەر سالا كوشباسشىلارىنىڭ ءبىرى ەۋروپالىق Airbus كومپانياسى حالىقارالىق نارىقتا امەريكالىق Boeing-قا نە قىتايلىق COMAC ۇشاق ءوندىرۋ كومپانياسىنا ەسە جىبەرمەيتىنىن ايتا كەلە, ەلدەگى اەروعارىش ونەركاسىبىن بارىنشا قولداۋىمىز كەرەك دەدى.
فرانتسيا الداعى ءۇش جىل ىشىندە ەكولوگيالىق تازا تەحنولوگيانى زەرتتەۋگە 1,5 ملرد ەۋرو جۇمساۋدى جوسپارلاپ وتىر. وسىلايشا ەلدىڭ ازاماتتىق اۆياتسيا عىلىمي-زەرتتەۋ كەڭەسىنە (Corac) بولىنگەن قاراجات كولەمى كۇرت وسكەن.
قوماقتى قاراجاتتى قۇيعانداعى ماقسات – ەۋروپادا سۇرانىسقا يە ا320 ۇشاعىنىڭ كومىرتەكتى بەيتاراپ ۇلگىسىن جاساپ شىعارۋ. بۇل دەگەنىمىز ۇشاقتارعا ەنەرگيا كوزى رەتىندە بۇگىنگى مۇناي-گاز تۋربينالارىنىڭ ورنىنا سۋتەگى قولدانىلادى. ەلدىڭ قارجى ءمينيسترى بۇل ۇشاقتى جوسپارلانعان 2050 جىلدان ەرتەرەك 2035 جىلى جاساپ شىعارۋ باستى ماقسات ەكەنىن ايتتى.