الاكولدە تۋريستىك ماۋسىم اشىلدى

ازىرگە قوناقۇيلەر دەمالۋشىلاردىڭ 50 پايىزىن قابىلدايدى

تورتكۇل دۇنيەنى الەككە سالعان ىن­دەتكە بايلانىستى بيىل الاكولدەگى دەمالىس ۇيلەرىنىڭ يەلەرىنە دە قاتاڭ تالاپتار قويىلىپ, ۇلكەن جاۋاپكەرشىلىك جۇكتەلىپ وتىر. جۇقپالى دەرت وبلىس­ اۋماعىندا ازايماي تۇرعاندىقتان ولار­عا ازىرگە دەمالۋشىلاردىڭ تەك 50 پايى­­زىن قابىلداۋعا رۇقسات بەرىلگەن.

جا­قىندا الاكولدىڭ تۋريستىك ماۋسىمعا دايىندىعىن تەكسەرۋگە وسكەمەننەن ارنايى كەلگەن وبلىس اكىمى دانيال احمەتوۆ كاسىپكەرلەرمەن كەزدەسۋ وتكىزگەندە دەمالۋشىلاردىڭ قاۋىپسىزدىگى ءبىرىنشى ورىندا تۇرۋى كەرەكتىگىن قاداپ تاپسىردى. «دەمالىس ۇيلەرىمىز اشىلماي قالا ما دەپ الاڭداپ وتىرعاندارىڭىزدى دا تۇسىنەمىز. ەگەر 13-23 ماۋسىم ارالى­عىندا كول جاعالاۋىندا كوروناۆيرۋس ينفەكتسيا­سى تىركەلمەسە, دەمالىس ورىن­دارىنىڭ باسشىلارىنا قوناقۇيلەردىڭ جوبالىق سىيىمدىلىعىنا سايكەس 75 پايىزعا دەيىن ادامداردى ورنالاستىرۋعا رۇقسات ەتىلەدى. ودان كەيىنگى ۋاقىتتا جاعالاۋداعى جاع­داي تۇراقتى بولسا, بارلىق نىسان 1 شىل­دەدەن باستاپ تولىق جۇمىسقا كىرىسەدى. ءبىز ءوز تاراپىمىزدان بار­لىق جاعدايدى جاساپ وتىرمىز. ەندى سىزدەر وزدەرىڭىزگە جۇكتەلگەن مىندەتتى لايىقتى دەڭگەيدە اتقارۋلارىڭىز قاجەت. ەڭ ماڭىزدىسى, حا­لىقتىڭ دەنساۋلىعى. سوندىقتان بار­لىق سانيتارلىق تالاپتار ساقتالۋى ءتيىس» دەيدى ايماق باسشىسى.

سانيتارلىق تالاپتار دەمەكشى, كول جاعالاۋىنداعى دەمالىس ۇيلەرىنىڭ بارلىعى تەكسەرۋدەن وتكىزىلگەن. 5 ماۋسىم­نان باستاپ ارنايى ءۇش موني­تورينگتىك توپ الاكولدە جۇمىس ىستەۋدە. ولار كول جاعاسىنداعى 175 قوناقۇيدىڭ دا­يىندىعىن, سانيتارلىق تالاپتاردى قان­شالىقتى ورىنداپ جاتقاندىعىن تەكسەرۋدە. «12 ماۋسىمداعى رەيد قو­رى­تىندىسى بويىنشا 60 دەمالىس ورنىنىڭ ءىشىنارا دايىن ەكەنىنە كوز جەت­كىزدىك. قازىر وسى 60 دەمالىس ورنىندا سانيتارلىق-ەپي­­دەميالىق نور­مالاردى ساقتاۋ جۇ­مىستارى جۇرگى­زىلۋدە. 14 دەمالىس ورنىنا «تۋريستەردى قابىلداۋعا دايىن» دەگەن اكتى بەرىلدى. اتالعان دەمالىس ورىندارىندا كەلۋ­­شىلەردىڭ 50 پايىزى (712 ادام) ور­­نا­لاسا الادى. 101 دەمالىس ورنى دا­يىندىقتى ازىرشە باستاعان جوق. سەبەبى بۇل دەمالىس ورىندارىنىڭ دەنى 2-3 جاعالاۋلاردا ورنالاسقان. ساي­كەسىنشە, ولار 20 ماۋسىمعا تامان اشىلادى» دەيدى وبلىستىڭ باس سانيتار دارىگەرى مارات يسمايلوۆ.

الاكولدە تۋريستەردى قابىلداۋعا ەڭ ءبىرىنشى بولىپ رۇقسات قاعازىن ال­عان «پارۋس» دەمالىس ورنىنىڭ يەسى جاننا رامازان بارلىق سانيتارلىق-ەپيدەميالىق تالاپتاردى ورىن­داۋعا دايىن ەكەندىكتەرىن ايتادى. «رەس­مي تۇردە جۇمىس ىستەۋگە رۇقسات الدىق. ءار­بىر شىعابەرىس ەسىكتە سانيتايزەرلەر قو­يىلىپ, الەۋمەتتىك قاشىقتىق ساق­تالعان. قورعانىس قۇرالدارى دا بار. قازاقستاندىقتارعا ايتار ءوتىنىشىمىز, جە­دەل تەستتەن وتكەنىڭىز تۋرالى انىقتا­ما­نى ۇمىتپاي الا كەلۋلەرىڭىزدى سۇراي­مىز» دەيدى ول.

ءيا, كاسىپكەرلەر جاۋاپكەرشىلىك جۇگى سالماقتى ەكەندىگىن ءتۇسىنىپ وتىر. «دەمالىس ورنىن اشپاستان بۇرىن ار­نايى دەزينفەكتسيالىق قۇرالدار, دەزينفەكتسيالىق كىلەمدەر, قولعا ارنال­عان انتيسەپتيكتەر, ماسكالار مەن باس كيىمدەر الىندى. سونىمەن قاتار دەمالۋشىلار قاۋىپسىزدىك شارالارىن ءبىلسىن دەپ جادىنامالار شىعاردىق. ءبىزدىڭ باس­تى مىندەت – ادامداردىڭ دەنساۋلىعىن ساق­تاۋ. ءبىز ءۇشىن ادامداردىڭ ەمىن-ەركىن دەمالۋى ماڭىزدى» دەيدى «راسسۆەت» دەمالىس ورنىنىڭ اكىمشىسى تاتيانا كالۋگينا.

وبلىس اكىمى كاسىپكەرلەرمەن كەزدەسۋدە مونيتورينگتىك توپ قۇرامىنا دەمالىس ۇيلەرىنىڭ يەلەرى دە كىرىپ, سا­نيتارلىق-ەپيدەميالىق تالاپتاردىڭ ساق­تالۋىن تەكسەرە الاتىندىعىن ايت­قان بولاتىن. «كەزدەسۋدە ايماق باس­شى­سى مونيتورينگتىك توپپەن بىرگە جۇ­مىس ىس­تەۋدى ۇسىندى. قازىر ءبىز توپ مۇ­شە­لەرىمەن بىرگە دەمالىس ورىندا­رى­نىڭ قوناقتاردى قارسى الۋعا قان­شا­لىقتى دايىن ەكەنىن تەكسەرىپ جاتىرمىز. ويتكەنى دەمالۋشىلار مەن قىز­مەتكەرلەردىڭ دەنساۋلىعى ءبىز ءۇشىن ءبىرىنشى ورىندا» دەيدى ء«ىنجۋ» جانە «الاكول اراسان» دەمالىس ورىندارىنىڭ يەسى انار باتىموۆا.

ءۇرجار ۇلگىلى اۋدانعا اينالادى

سوڭعى جىلدارى الاكولدىڭ شىعىس بولىگى ايتارلىقتاي وزگەرگەنى بەلگىلى. اسىرەسە جاعالاۋدى اباتتاندىرۋ جۇمىس­تارى قارقىندى تۇردە جۇرگىزىلۋدە. «كول جاعالاۋىن اباتتاندىرۋعا 2016 جىل­دان بەرى 6,2 ملرد تەڭگە قاراجات جۇمسالدى. بيىل بۇل باعىتقا تارتىلعان ين­ۆەستيتسيا كولەمى 3,9 ملرد  تەڭگەنى قۇراپ وتىر. كول جاعالاۋىندا 345 كاسىپ­كەرلىك نىسان تىركەلگەن. 11 مىڭنان اس­تام ورىنعا شاق­تالعان 175 دەمالىس ءۇيى, 36 قوعامدىق تاماقتانۋ ورنى, 27 دۇكەن, 104 دۇڭگىرشەك, 3 ءدارىحانا بار. بيىل 8 دەمالىس ورنى سالىندى. 11-ءى اۋماعىن كەڭەيتتى. ءسويتىپ قوسىمشا 650 ورىن پايدا بولدى. سونىمەن قاتار 200 ورىندىق «Alakol love» تۋريستىك كەشەنىنىڭ قۇرىلىسى باستالدى. بۇدان بولەك «جۇمىسپەن قامتۋدىڭ جول كارتاسى» باعدارلاماسى بويىنشا ەكى اۋقىمدى جوبا قولعا الىندى. جوبا اياسىندا سۋ جانە ەلەكتر جەلىلەرى تارتىلادى. بيىلعى جاڭالىق, جالپى اۋماعى 2,5 شاقىرىمدى قۇرايتىن ۆەلوجول مەن 5 جاڭا ءمودۋلدى ساۋدا پاۆيلوندارىنىڭ قۇرىلىسى اياق­تالدى. جاقىندا كول جاعالاۋىندا جاڭا دارەتحانالار, كيىنۋگە ارنالعان كابينالار, قۇتقارۋشى بەكەتتەرى ىسكە قوسىلادى» دەيدى ءۇرجار اۋدانىنىڭ اكىمى نۇرجان توقسەيىتوۆ.

الاكولگە ينۆەستيتسيا قۇيىپ, دەمالۋ­شىلارعا ارنالعان جاڭا نىساندار تۇرعى­زىپ جاتقان كاسىپكەرلەر دە از ەمەس. سو­­لار­دىڭ ءبىرى – ارمان احمەتقانوۆ. كاسىپ­كەر اشىق اسپان استىندا 3,5 مىڭ ادام سياتىن ALAZONE ARENA اتتى شاعىن قالاشىق سالۋدى جوسپارلاپ وتىر. يۋرمالا قالاشىعىنىڭ ۇلگىسىمەن بوي كوتەرەتىن نىساندا ساحنا, قوناقۇي, قوي­ما, اس ءۇي, بي الاڭى, VIP تەراسسا, بالالار الاڭى, بار, كاسسا, اۆتوتۇراق, كورەرمەن الاڭى, كاراوكە, جاسىل گازون, دەمالۋ اي­ماعى بولادى. «وبلىس اكىمىنىڭ باستاماسىمەن ينۆەستور رەتىندە ءساۋىر ايىندا جۇ­مىستى باستاپ كەتتىك. ماقساتىمىز – الاكولدەگى تۋريزم دەڭگەيىن كوتەرۋ, دەمالۋشىلار سانىن كوبەيتۋ. جوبا ەكى جىل كولەمىندە جۇزەگە اسادى» دەيدى كاسىپكەر.

بۇدان بولەك تاعى ءبىر ينۆەستيتسيالىق جوبا قولعا الىنباق. وبلىستىق تۋ­ريزم جانە سىرتقى بايلانىستار باس­قار­ماسى باسشىسىنىڭ ورىنباسارى ينارا بودۋكوۆانىڭ ايتۋىنشا, جوبا اياسىن­دا ءتورت جۇلدىزدى قوناقۇي بوي كوتەرمەك. قازىرگى ۋاقىتتا ونىڭ قۇرىلىس جۇمىستارى باستالىپ تا كەتكەن. تۋريستىك نىساندا دەمالۋشىلارعا قاجەتتى بارلىق جاعداي جاسالادى. سونداي-اق وندا باسسەين مەن بالالارعا ارنالعان ويىن الاڭى سالىنادى.

الاكولگە جاساعان جۇمىس ساپارى بارىسىندا وبلىس اكىمى دانيال احمەتوۆ تەك كول جاعالاۋىنا عانا ەمەس, الداعى ۋاقىتتا اۋدان ورتالىعى – ءۇرجار اۋى­لىنا ەرەكشە كوڭىل بولىنەتىنىن جەت­كىزدى. ء«ۇرجاردى قالاي اباتتاندىرامىز؟ ەڭ اۋەلى ۇرجارداعى اۋەجايدا قاي­تا جوندەۋ جۇمىستارى جۇرگىزىلەدى. ۇشۋ-قونۋ جولاعى ۇزارتىلادى. بۇل ءوز كە­زەگىندە كەز كەلگەن ۇشاقتىڭ مۇندا ۇشىپ كەلۋىنە مۇمكىندىك بەرەدى. وسى باعىتتاعى جۇمىستار كەلەر جىلدىڭ سوڭىنا دەيىن جۇزەگە اسىرىلادى. ال ءۇرجار اۋىلىن اباتتاندىرۋعا 2,2 ملرد تەڭگە بولىنەدى. ءۇش جىلدان كەيىن ءۇرجار ادام تانىماس­تاي وزگەرەدى» دەيدى ايماق باس­شىسى.

شىعىس قازاقستان وبلىسى,

ءۇرجار اۋدانى