باتىس قازاقستاندا ەكى كۇندە ەكى بالا تەرەزەدەن قۇلادى

"10 ماۋسىم كۇنى ساعات 14.58.-دە ورال قالاسىنىڭ سولتۇستىك-شىعىس شاعىن اۋدانىنداعى 5 قاباتتى تۇرعىن ۇيدە اتا-اناسىنىڭ قاراۋىنسىز قالعان 2017 جىلى تۋعان ۇل بالا تەرەزەدەن قۇلاپ, اۋرۋحاناعا جاتقىزىلدى. 11 ماۋسىمدا ساعات 11.04.-دە ۆوكزال كوشەسى بويىنشا ورنالاسقان 5 قاباتتى ۇيدە اتا-اناسىنىڭ قاراۋىنسىز قالعان 2019 جىلعى قىز بالا دا تەرەزەدەن قۇلاپ, اۋرۋحاناعا جەتكىزىلدى" دەپ حابارلايدى باتىس قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.

بالالار جاراقاتتانىڭ الدىن الۋ جونىندە وڭىرلىك توتەنشە جاعدايلار دەپارتامەنتى مەن ونىڭ اۋماقتىق بولىمشەلەرى جاقىندا عانا "قاۋىپسىز بالالىق شاق" جانە "تۇرمىستاعى قاۋىپسىزدىك" اتتى پروفيلاكتيكالىق جانە يميدجدىك بەينەروليكتەر ازىرلەپ تاراتقان بولاتىن. اسىرەسە كوپ پاتەرلى تۇرعىن ۇيلەردىڭ تەرەزەسىنەن بالالار قۇلاپ كەتپەۋىن ساقتاندىراتىن اقپارات-جادىنامانى ورال قالاسىنداعى كوپ پاتەرلى تۇرعىن ۇيلەردىڭ 1096 كىرەبەرىسىنە جەلىمدەپ شىققان.

بۇل اكتسياعا باتىس قازاقستان وبلىسى قازاقستان حالقى اسسامبلەياسىنىڭ "جاڭعىرۋ جولى" جاستار بىرلەستىگى بەلسەنە قاتىسىپ, بيىك ۇيدە تۇراتىن كوپ بالالى, از قامتىلعان وتباسىلاردىڭ ءتىزىمىن انىقتادى.

"وسى چەللەندج اياسىندا 11 وتباسىنىڭ پاتەرىنە تەرەزەنى قاۋىپسىز ەتەتىن قۇرىلعى ورناتىلدى. كاسىپكەرلەر بولاشاقتا 100-دەن استام وتباسىنىڭ پاتەرىنە وسىنداي قاۋىپسىزدىك قۇرىلعىسىن ورناتۋدى جوسپارلاپ وتىر", دەيدى باتىس قازاقستان وبلىستىق توتەنشە جاعدايلار دەپارتامەنتى جانە ازاماتتىق قورعاۋ سالاسىنداعى باقىلاۋ باسقارماسىنىڭ باس مامانى, ازاماتتىق قورعاۋ پودپولكوۆنيگى تالعات تەمىرعاليەۆ.

باتىس قازاقستان