جاقىندا وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە اباي قۇنانباي ۇلىنىڭ 175 جىلدىعىنا وراي «اباي جانە الەمدىك وركەنيەت» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. ەلدەگى قالىپتاسقان جاعدايعا بايلانىستى ونلاين-رەجىمدە ۇيىمداستىرىلعان شاراعا تۇركيا, نيدەرلاند, پولشا مەملەكەتتەرىنىڭ عالىمدارىمەن قاتار ەلىمىزدەگى كورنەكتى ابايتانۋشىلار قاتىسىپ, ويلارىن ورتاعا سالدى.
وسكەمەندەگى «ابايتانۋ» عىلىمي-زەرتتەۋ ينستيتۋتىنىڭ ديرەكتورى ايجان كارتاەۆا مودەراتورلىق ەتكەن كونفەرەنتسيانى ۋنيۆەرسيتەت رەكتورى مۇحتار تولەگەن كىرىسپە سوزىمەن اشىپ, ابايتانۋدىڭ بىلگىرى, كورنەكتى عالىم مەكەمتاس مىرزاحمەت ۇلىن 90 جاسقا تولعان مەرەيتويىمەن قۇتتىقتاپ, قۇرمەتتەپ ءسوز كەزەگىن ۇسىندى. مەكەمتاس مىرزاحمەت ۇلى ابايدىڭ باتىسىنان شىعىسى باسىم ەكەندىگىن ناقتى تۇجىرىمدارمەن دالەلدەي وتىرىپ اقىننىڭ «تولىق ادام» ىلىمىنە كەڭىنەن توقتالدى. عالىمنىڭ پىكىرىنشە, بۇل ەڭبەكتى تەك قازاق حالقى ەمەس, الدىمەن تۇركى الەمى, كەيىن بۇكىل ەۋروپا ىزدەپ ءجۇرىپ وقيتىن بولادى. تۇركيانىڭ فىرات ۋنيۆەرسيتەتىنىڭ پروفەسسورى ەرجان الكايا « ۇلى اباي تۇركى الەمىندە» تاقىرىبىندا تۇششىمدى بايانداما جاساپ, اباي قۇنانباي ۇلىنىڭ تۇركى الەمى ادەبيەتىندەگى ورنى تۋرالى ءسوز قوزعادى. تۇركياداعى ھاكىم اتىنداعى مەكتەپتەر, كوشەلەر, ساياباقتار مەن ەسكەرتكىشتەر, ءومىرى مەن شىعارماشىلىعى تۋرالى جارىق كورگەن كىتاپتار, جازىلعان ديسسەرتاتسيالار مەن ماقالالاردى تانىستىردى. بۇگىندە نيدەرلاند ەلىندە تۇراتىن PhD دوكتور, پروفەسسور زيفا مۇراتقىزى اۋەزوۆا اباي ولەڭدەرى مەن اندەرىنىڭ اعىلشىن تىلىنە اۋدارىلۋى جايىن ءسوز ەتتى. عالىمنىڭ ايتۋىنشا, ۇلى اقىن شىعارمالارىن وزگە تىلدەرگە اۋدارعاندا ورىس تىلىنە قاراعاندا, تۇپنۇسقامەن جۇمىس ىستەۋ قازاق ياعني تىلىندەگى نۇسقاسىن اۋدارۋ ءتيىمدى. پولشانىڭ ۆارشاۆا ۋنيۆەرسيتەتىنىڭ ساياسي عىلىمدار جانە حالىقارالىق قاتىناستار فاكۋلتەتىنىڭ دوكتارانتى جاندوس قارىنباەۆ «قۇنانباي اۋلەتى جانە پولياك زيالىلارى: كوپقىرلى بايلانىستاردىڭ جىلناماسىنا شولۋ» تاقىرىبىندا بايانداما وقىپ, سول ەلدەگى قازاقتارعا, سونىڭ ىشىندە شىعىس قازاقستانعا, قۇنانباي اۋلەتىنە قاتىستى جيناقتالعان دەرەكتەردى كورەرمەن نازارىنا ۇسىندى.
وسكەمەن