بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ حالىققا ەسەپ بەرۋ كەزدەسۋىندە ايتتى, - دەپ حابارلايدى Egemen.kz.
قىزمەت كورسەتۋدىڭ پرواكتيۆتى فورماتى بويىنشا مەملەكەت ازاماتقا قاجەتتى قىزمەتتى كورسەتۋدى ءوزى ۇسىنادى. بۇل رەتتە ازاماتقا قۇجات رەسىمدەۋ نەمەسە ءوتىنىم بەرۋ ءۇشىن ەشقايدا بارۋدىڭ قاجەتى جوق, قاجەتتى اقپاراتتى كەلگەن SMS-حابارلاماعا جاۋاپ رەتىندە جىبەرۋ جەتكىلىكتى.
قازىر مەملەكەتتىك قىزمەتتىڭ 5 ءتۇرى پرواكتيۆتى فورماتتا كورسەتىلەدى. بالانىڭ تۋ تۋرالى كۋالىگىن SMS-حابارلاما جىبەرۋ ارقىلى رەسىمدەۋگە بولادى. سونداي-اق, "التىن القا" جانە "كۇمىس القا" يەلەرى جاردەماقىنى وسى تاسىلمەن رەسىمدەي الادى.
"بۇگىندە قازاقستاندا قىزمەتتىڭ 80%-دان استامى – ەلەكتوندىق قىزمەتتەر. ياعني, ءبىز قىزمەتتەردى پرواكتيۆتى فورماتقا كوشىرۋگە مۇمكىندىك بەرەتىن اۆتوماتتاندىرۋدىڭ وسىنداي دەڭگەيىنە قول جەتكىزدىك. ادامدارعا ەشقايدا بارۋدىڭ قاجەتى جوق, كەلگەن حابارلاماعا جاۋاپ بەرۋ ارقىلى مەملەكەتتىك قىزمەتتەردى الا الادى", - دەدى اسقار جۇماعاليەۆ.
مينيستر ۆەدومستۆوارالىق كوميسسيانىڭ شەشىمىمەن پرواكتيۆتى فورماتتا كورسەتىلەتىن 30 قىزمەت ىرىكتەلگەنىن حابارلادى. ولاردىڭ اراسىندا – جۇكتىلىگى مەن بوسانۋى بويىنشا تولەمدەردى تاعايىنداۋ, مۇگەدەكتىكتى بەلگىلەۋ, مەكتەپكە قابىلداۋ, كوشەلەردى نەمەسە ەلدى مەكەندەردى قايتا اتاۋ كەزىندە مەكەنجاي دەرەكتەرىن وزگەرتۋ, جەرلەۋگە ارنالعان بىررەتتىك تولەمدى تاعايىنداۋ قىزمەتتەرى بار.
"قازىر جۇكتى ايەلدەرگە دەكرەتتىك تولەمدەردى رەسىمدەۋ ءۇشىن حقكو-عا بارۋى كەرەك. بۇل قىزمەت پرواكتيۆتى فورماتقا كوشىرىلگەن سوڭ, ەڭبەككە جارامسىزدىق پاراعىن رەسىمدەگەننەن كەيىن SMS-حابارلاما كەلەدى, سوعان جاۋاپ بەرۋ ارقىلى ولار جاردەماقىنى رەسىمدەي الادى. ەڭ باستىسى – سمس-حابارلاما الۋ ءۇشىن ءموبيلدى ازاماتتار بازاسىندا تىركەلگەن بولۋى ءتيىس", - دەپ ءتۇسىندىردى مينيستر.
پرواكتيۆتى قىزمەتتەردىڭ كوبىن وسى جىلدىڭ سوڭىنا دەيىن ىسكە قوسۋ جوسپارلانعان. بۇل ءۇشىن وسى قىزمەتتەردى كورسەتۋشى مەملەكەتتىك ورگاندار ءوز جۇيەلەرى اراسىندا دەرەكتەر الماسۋدى قامتاماسىز ەتە وتىرىپ, بارلىق قاجەتتى ينتەگراتسيالىق جۇمىستاردى اياقتاۋى ءتيىس.