نيۋ-يورك فەدەرالدىق رەزەرۆتىك بانكىنىڭ پرەزيدەنتى ەكونوميكانى قالپىنا كەلتىرۋ مۇمكىن دەپ ەسەپتەيدى. ول سونداي-اق فەدەرالدىق رەزەرۆتىك جۇيەنىڭ اقش ەكونوميكاسىن قولداۋ ءۇشىن كىرىستىلىك قيسىعىن باقىلاۋدى قولعا الۋى مۇمكىن ەكەنىن ايتادى.
مايكل س. دەربي
Wall Street Journal
نيۋ-يورك فەدەرالدىق رەزەرۆتىك بانكىنىڭ پرەزيدەنتى دجون ۋيليامس كوروناۆيرۋستىڭ سالدارىنان بولعان ەكونوميكالىق قيىندىقتىڭ اياقتالۋى مۇمكىن ەكەنىن "Bloomberg" تەلەارناسىنا ايتىپ بەردى. دەسە دە الدا نە بولارى بەلگىسىز بولعاندىقتان ءالى قيىن كۇندەر كۇتىپ تۇرعانىن جەتكىزدى.
ۋيليامس مىرزا ەكونوميكانى قايتا قالپىنا كەلتىرۋ مۇمكىن ەكەنىنە سەنىمدى. سەبەبى ۇلتتىق بانكتىڭ قازىرگى ساياساتى ەل ەكونوميكاسىن جىل باسىنداعى كورسەتكىشكە قايتا جەتكىزۋگە باعىتتالعان.
اشىق نارىقتاعى وپەراتسيالار جونىندەگى فەدەرالدىق كوميتەتتىڭ ۆيتسە-توراعاسى قىزمەتىن قوسا اتقارتىن ۋيليامس مىرزا فەدەرالدىق رەزەرۆتىك جۇيەنىڭ ەل ەكونوميكاسىن قالپىنا كەلتىرۋدىڭ بارلىق قولجەتىمدى قۇرالدارىن قاراستىراتىنىن ايتتى. ول سونداي-اق ۇكىمەت تاراپىنان تۇراقتى قولداۋ قازىرگى شارالاردىڭ تيىمدىلىگىن ودان ءارى ارتتىرادى دەيدى. داعدارىسپەن كۇرەستە فەدەرالدىق رەزەرۆتىك جۇيە ماقساتتى مولشەرلەمەنى نولگە دەيىن تومەندەتىپ, نەسيە قۇنىنىڭ ءبىراز ۋاقىت تومەن بولاتىنىن مالىمدەدى. بانك ودان بولەك وبليگاتسيالاردى كوپتەپ ساتىپ الا باستاعان جانە ەكونوميكانىڭ ءىرى سەكتورلارىنا نەسيە بەرۋدى قولعا العان.
فەدەرالدىق رەزەرۆتىك جۇيە وزگە دە شارالاردى قاراستىرىپ جاتقان كورىنەدى. ولاردىڭ ءبىرى قارجى داعدارىسىنىڭ سالدارىن باسقارۋ جانە پايىزدىق مولشەرلەمەلەردىڭ بولاشاق باعىتىنا قاتىستى ءتيىمدى جەتەكشىلىكتى قامتاماسىز ەتۋ ءۇشىن قۇرالدار جيىنتىعىن مۇقيات زەردەلەۋ بولىپ وتىر. فرج سونداي-اق كىرىستىلىك قيسىعىن دا ءوز باقىلاۋىنا الماقشى. بۇل دەگەنىمىز ورتالىق بانك ءار ءتۇرلى وتەۋ مەرزىمىنە بەرىلگەن قارىزدارعا قاتىستى شەشىم قابىلداي الادى.
"Bloomberg" تەلەارناسىنا بەرگەن پىكىرىندە ۋيليامس مىرزا الداعى جىلى ينفلياتسيا دەڭگەيى تومەن بولادى دەگەن بولجامىمەن دە ءبولىستى.
ول سونداي-اق, كەلەسى ايدا اشىق نارىقتاعى وپەراتسيالار جونىندەگى فەدەرالدىق كوميتەتتىڭ وتىرىسىندا داعدارىستىڭ ەكونوميكالىق سالدارىمەن قاتار, بازالىق بولجامعا دا قاتىستى ۇسىنىستار ايتىلاتىنىنا توقتالدى.
سارسەنبى كۇنى ونلاين كەزدەسۋدە فەدەرالدىق رەزەرۆتىك جۇيەنىڭ باسشىسى سەنت-لۋيسا دجەيمس بۋللارد بۇل ەكونوميكالىق قيىندىق ءارى قاراي جالعاسا بەرەتىن بولسا سالدارى اۋىر بولۋى مۇمكىن ەكەنىن ايتتى.
بۋللارد مىرزا سونداي-اق ينفلياتسيانىڭ وسۋىنە قاتىستى كۇمان ءبىلدىردى. ونىڭ بولجالدى تۇراقتىلىعى ازىرگە دەفلياتسيا جايىندا اسا الاڭداماۋعا سەبەپ بولا الادى دەيدى.
بۋللارد مىرزا فەدەرالدىق رەزەرۆتىك جۇيەنىڭ شارالارى مەن كىرىس قيسىعىن باقىلاۋ شەشىمىنە دە باعا بەردى. ول ساراپشىلاردىڭ مولشەرلەمەلەر ءالى دە ۇزاق ۋاقىت بويى تومەن بولاتىنىنا سەنىمدىلىگىن العا تارتا وتىرىپ, ورتالىق بانكتىڭ ستاۆكالاردىڭ بولجامىن باسشىلىققا الۋى ءۇشىن ەش نەگىزدىڭ جوقتىعىن اتاپ ءوتتى.
ول ءوز سوزىنەن كەيىن قويىلعان سۇراقتاردىڭ بىرىنە كىرىستىلىك قيسىعىن باقىلاۋ ماسەلەسى ءالى دە زەرتتەۋدى تالاپ ەتەتىنىن ايتىپ, ءدال قازىر بۇل ستراتەگيانى جۇزەگە اسىرۋدى قيسىندى دەپ ەسەپتەمەيتىنىن جەتكىزدى.
دايىنداعان
مەرۋەرت بۇركىتباي,
"Egemen Qazaqstan"