ەكونوميكادا بالىق شارۋاشىلىعى ماڭىزدى ءرول اتقارادى. 2019 جىلى 45 مىڭ توننا بالىق اۋلاندى, بۇل 2018 جىلعى دەڭگەيدەن 23%-عا جوعارى (36,4 مىڭ توننا). سالادا 11 مىڭ ادام جۇمىس ىستەيدى. بۇل تۋرالى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ حابارلادى, - دەپ جازادى Egemen.kz
"ەلىمىزدە بالىق وسىرۋمەن 180 بالىق شارۋاشىلىعى اينالىسادى, وندا 1 مىڭنان استام (1126) ادام جۇمىس ىستەيدى. تاۋارلىق بالىق ءوسىرۋ كولەمىنىڭ ءوسۋى بايقالادى. 2019 جىلى 6,9 مىڭ توننا بالىق وسىرسە, بۇل 2018 جىلعى دەڭگەيدەن 19%-عا جوعارى. وسى جىلعا جوسپار – 7,8 مىڭ توننا", -دەدى مينيستر.
وتكەن جىلى بالىقتى قايتا وڭدەۋ ناتيجەسىندە جالپى سوماسى 60 ملن اقش دوللارى بولاتىن 30 مىڭ توننا ءونىم ەكسپورتتالدى, بۇل 2018 جىلعى دەڭگەيدەن 16,6% - عا ارتىق.
"بالىق سالاسىنداعى وتكىر پروبلەما بالىق ونىمدەرىنىڭ كولەڭكەلى اينالىمى بولىپ تابىلادى. ول بالىق ءوندىرۋدىڭ ورتاشا جىلدىق كولەمىنەن 5 ەسە ارتىق. ونى جويۋ ءۇشىن بالىق اينالىمىنىڭ بارلىق پروتسەسىن سۋ ايدىنىنان سوڭعى تۇتىنۋشىعا دەيىن تسيفرلاۋ قاجەت. بالىقتاردى كولەڭكەدەن شىعارۋ سالىق سالۋ بازاسىن 40 ملرد تەڭگەگە ارتتىرادى", - دەدى م. مىرزاعاليەۆ.
ءمينيستردىڭ ايتۋىنشا, كاسپي تەڭىزىنىڭ رەسۋرستارىن يگەرۋ ەسەبىنەن وتاندىق نارىق كولەمىن 66-دان 120 مىڭ تونناعا دەيىن, بالىق اۋلاۋ 45-تەن 60 مىڭ تونناعا دەيىن, ال بالىق ءوسىرۋ 7-دەن 60 مىڭ تونناعا دەيىن ۇلعايتۋدىڭ جوعارى الەۋەتى بار.