بۇگىنگى تاڭدا جامبىل وبلىسىنان ەلىمىزدىڭ جۇمىس كۇشى تاپشى وڭىرلەرىنە 57 وتباسى, ياعني 163 ادام قونىس اۋدارعان. ونىڭ ىشىندە پاۆلودار وبلىسىنا 11 وتباسى, قوستاناي وبلىسىنا 20 وتباسى, سولتۇستىك قازاقستان وبلىسىنا 20 وتباسى جانە شىعىس قازاقستان وبلىسىنا 6 وتباسى بار.
قونىس اۋدارۋشى ازاماتتار تولىعىمەن قابىلداۋشى ءوڭىردىڭ كۆوتاسىنا ەنگىزىلىپ, كوشىپ بارعان وتباسىلاردىڭ بارلىق مۇشەلەرىنە سۋبسيديالار تولەنگەن جانە ولار جالدامالى تۇرعىن ۇيمەن قامتىلعان. بۇل رەتتە جامبىل وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ قونىس اۋدارۋشىلارعا قارالعان جەڭىلدىكتەردى دە اتاپ ءوتتى.
«وتباسى مۇشەلەرىنە, سونداي-اق, وتباسىلىق جاعدايىنا قاراماستان جالعىزباستىلارعا ءبىر رەت 35 ايلىق ەسەپتىك كورسەتكىش مولشەرىندە, كوشۋگە ماتەريالدىق كومەك وتاعاسىنا جانە ءاربىر وتباسى مۇشەسىنە بەرىلەدى. ون ەكى اي بويى اي سايىن تۇرعىن ءۇيدى جالعا الۋ جانە كوممۋنالدىق قىزمەتتەرگە اقى تولەۋ بويىنشا شىعىستاردى وتەۋگە بەلگىلەنگەن مولشەردە ماتەريالدىق كومەك كورسەتىلەدى. قالالىق جەرلەرگە قونىس اۋدارعاندار ءۇشىن ءبىر ادامعا 20 ايلىق ەسەپتىك كورسەتكىش مولشەرىندە, وتباسى مۇشەلەرىنىڭ سانى ەكەۋدەن تورتەۋگە دەيىن بولسا 25 ايلىق ەسەپتىك كورسەتكىش مولشەرىندە, ال وتباسى مۇشەلەرىنىڭ سانى بەسەۋ جانە ودان كوپ بولعان كەزدە 30 ايلىق ەسەپتىك كورسەتكىش مولشەرىندە تولەنەدى. سونىمەن قاتار, اۋىلدىق جەرلەرگە قونىس اۋدارعاندار ءۇشىن ءبىر ادامعا 15 ايلىق ەسەپتىك كورسەتكىش مولشەرىندە, وتباسى مۇشەلەرىنىڭ سانى ەكەۋدەن تورتەۋگە دەيىن بولعان كەزدە 18 ايلىق ەسەپتىك كورسەتكىش مولشەرىندە, ال وتباسى مۇشەلەرىنىڭ سانى بەسەۋ جانە ودان كوپ بولعان كەزدە 21 ايلىق ەسەپتىك كورسەتكىش مولشەرىندە تولەنەدى», دەيدى جورابەك باۋبەكوۆ.
جامبىل وبلىسى