قازاقستاندا تۇرمىستىق زورلىق-زومبىلىق 25 پايىزعا ارتتى. بۇل تۋرالى ىشكى ىستەر ءمينيسترى ەرلان تۇرعىمباەۆ حالىق الدىندا ەسەپ بەرۋ كەزدەسۋىندە ايتتى, - دەپ حابارلايدى Egemen.kz.
"تۇرمىستىق زورلىق-زومبىلىق 25 پايىزعا ءوستى. توتەنشە جاعداي رەجيمى كەزىندە ازاماتتار وقشاۋلانىپ, ۇيدە وتىرعاندا داعدارىس ورتالىقتارىنىڭ شۇعىل جەلى نومىرىنە كومەك سۇراپ, قوڭىراۋ شالۋشىلار كوبەيدى. ولار وتباسىنداعى تۇرمىستىق زورلىق-زومبىلىق تۋرالى شاعىمدانعان. وكىنىشكە قاراي, مۇنداي جاعدايدا زارداپ شەككەن 10 ادامنىڭ ەكەۋى عانا پوليتسياعا جۇگىنۋگە كەلىسەدى", - دەدى ەرلان تۇرعىمباەۆ.
سونداي-اق ول جىل باسىنان بەرى ەلدەگى قىلمىس سانى 38 پايىزعا تومەندەگەنىن اتاپ ءوتتى. ۇرلىق-قارلىق, بۇزاقىلىق, توبەلەس سىندى قىلمىستار سانى ازايعان.