الەمگە تانىمال BoxRec سپورت سايتى كاسىپقوي بوكستا ءار جىلدارى ونەر كورسەتكەن ەڭ مىقتى 10 سپورتشىنى انىقتادى, - دەپ جازادى Egemen.kz.
اتالعان سايتتىڭ مەجەلەۋىنە قاراعاندا جاسى قىرىقتىڭ قىرقاسىنا شىققان امەريكاندىق بوكسشى فلويد مەيۆەدەر تەڭدەسى جوق بىلعارى قولعاپ شەبەرى رەتىندە تانىلسا, كەلەسى ورىندارعا فيليپپيندىك مەنني پاكياو, ارگەنتينالىق كارلوس مونزون تابان تىرەگەن ەكەن. وسىلاردىڭ اربىرىنە توقتالار بولساق:
فلويد مەيۆەدەركاسىپقوي بوكس رينگىندە 21 جىل تەر توگىپ, ءبىر رەتتە جەڭىلىپ كورمەي, 50 رەت جەكپە-جەك وتكىزگەن. ناتيجەسىندە ء«بىر ءداۋىردىڭ ۇلى بوكسشىسى» دەگەن اتاققا يە بولدى. بۇل ازامات 2012-2015 جىلدارى Forbes جۋرنالى تىزىمىندە ەڭ باي سپورتشىلاردىڭ دا كوشىن باستادى.
مەنني پاكياوبۇل بوكسشى جاسى 40-تان اسسا دا بوكس رينگىسىنەن ءالى تۇسپەگەن تارلان. سپورتتىق جولىندا ءارتۇرلى سەگىز ديۆيزيوننىڭ چەمپيونى اتانىپ, بەلبەۋىنە يە بولعان الەمدىگى جالعىز ادام. بىراق 2015 جىلى ۇيىمداستىرىلعان «عاسىر سايىسىندا» اتاقتى فلويد مەيۆەدەرەن جەڭىلىپ قالدى.
كارلوس مونزونارگەنتينالىق اڭىز بوكسشى كارلوس مونزون 1995 جىلى دۇنيەدەن وتكەنگە دەيىن ورتا سالماقتا وعان تەڭ كەلەر الەمدە ادام بولمادى. چەمپيوندىق بەلبەۋدى 7 جىل بويى جان بالاسىنا بەرمەدى. وسى اتاق ءۇشىن 59 دۇركىن رينگكە كوتەرىلىپ بارىندە جەڭىسكە جەتتى.
مۇحاممەد ءاليبۇل سپورتشى تەك بوكس الەمىندە عانا ەمەس, ءوزى ءومىر سۇرگەن قوعامعا وزگەرىس اكەلگەن ساياسي قايراتكەر. 1967-1970 جىلدارى ۆەتنام سوعىسىنا بارۋدان باس تارتقانى ءۇشىن ۇلكەن سپورتتان ءۇش جىل شەتتەتىلگەنى بار. كاسىپقوي بوكسشى رەتىندە 1975 جىلى جو فرەيزەرمەن وتكىزگەن جەكپە-جەگى سپورت تاريحىندا ەڭ تاڭداۋلى سايىس رەتىندە تاريحتا قالدى.
شۋگار رەي روبينسونكاسىپقوي بوكستىڭ جەڭىل, جارتىلاي جەڭىل, ورتا, جارتىلاي اۋىر سالماقتارىندا ونەر كورسەتىپ, بارلىعى 174 دۇركىن جەكپە-جەك وتكىزىپ, ونىڭ 19-ىندا عانا جەڭىلىس تاپقان تاريحتاعى اسا قاجىرلى بىلعارى قولعاپ شەبەرلەرىنىڭ ءبىرى. كاسىپقوي بوكس الەمىندە چەمپيوندىق بەلبەۋدى بەس دۇركىن جەڭىپ العان جالعىز بوكسشى.
بەرنارد حوپكينسبۇگىنگى تاڭدا 55 جاسقا تولعان كاسىپقوي بوكسشى بەرنارد حوپكينس ءوز ومىرىندە 67 دۇركىن جەكپە-جەك وتكىزىپ, ونىڭ 55-ىندە جەڭىسكە جەتىپ جارتىلاي اۋىر سالماقتا الەم چەمپيونى اتانعان ازامات. سونىمەن قاتار 1988-2016 جىلدار ارالىعىندا ۇزدىكسىز 28 جىل تەر توگىپ, كاسىپقوي بوكستا ۇزاق جىل ونەر كورسەتكەن ەرەكشە سپورتشى.
جو لۋيس1937-1949 جىلدار ارالىعىندا كاسىپقوي بوكستىڭ اسا اۋىر سالماق دارەجەسى بويىنشا 25 دۇركىن سايىس وتكىزىپ, بارلىعىندا جەڭىسكە جەتكەن اڭىز تۇلعا. ول اقش-تا ۇلتتىق باتىر دەڭگەيىندە ۇلىقتالعان العاشقى قارا ءناسىلدى سپورتشى.
ارچي مۋربۇل جىگىت اسا اۋىر سالماق بويىنشا الەم چەمپيونى اتاعىنان ايىرىلماي ونى ۇزاق جىل ۇستاعان ەرەكشە تالانت. ياعني, 1952 جىلدىڭ جەلتوقسان ايىنان باستاپ, 1962 جىلدىڭ مامىرىنا دەيىن چەمپيوندىق اتاعىن 10 جىل بويى بىلق ەتپەي قورعاعان مىقتى. بوكسشى رەتىندە سايىس ءستيلى قورعانۋ ارقىلى شابۋىلعا وتەتىن ەرەكشەلىگىمەن تاريحقا تاڭبالاندى. 1998 جىلى دۇنيەدەن ءوتتى.
وسكار دە لا حويا2009 جىلى ءساۋىر ايىندا سپورتتىق كارەراسىن اياقتاعان بۇل ازامات وعان دەيىن ەشكىمگە دەس بەرمەدى. قازىرگى تاڭدا 47 جاسقا تولعان كاسىپقوي بوكسشى ءارتۇرلى 6 ديۆيزوندا ونەر كورسەتىپ, 10 دۇركىن الەم چەمپيونى تيتۋلىن يەلەنگەن ساناۋلى تالانتتىڭ ءبىرى. بەس جاسىنان باستاپ بوكسپەن شۇعىلدانعان سپورتشى قازىرگى تاڭدا تانىمال بيزنەسمەن.
حۋليو سەزار چاۆەسبۇل سپورتشى مەكسيكالىق بوكسشىلار سويىنان ويىپ ورىن العان تالانت. 1980-2005 جىلدارى ءۇش ديۆيزوندا ونەر كورسەتىپ, بارلىعىنىڭ چەمپيوندىق اتاعىنا يە بولعان. قازىر 57 جاسقا تولىپ وتىرعان بوكسشى ءوزىنىڭ چەمپيوندىق تيتۋلىن 27 دۇركىن قورعاپ رەكورد ورناتقان جالعىز ادام. 1994 جىلى فرەنكي رانداللمەن كەزدەسىپ جەڭىلىس تاپقانعا دەيىن 87 جەكپە-جەك وتكىزىپ, بارلىعىن جەڭىسپەن اياقتاعان ەكەن.