بىلتىر وسىمدىك شارۋاشىلىعىن سۋبسيديالاۋعا 9,5 ملرد تەڭگە بولىنسە دە, ءونىم كولەمى كوڭىل كونشىتپەدى. ەليتا تۇقىمداردىڭ ۇلەسى ارتقانىمەن ناتيجە ويداعىداي ەمەس. دەگەنمەن, ىرىسىن ءتورت ت ۇلىكتەن ىزدەگەن قازاقتىڭ مال شارۋاشىلىعىنا كەلگەندە تاسى ورگە دومالاي باستاعان سىڭايلى. بۇرناعى جىلدارمەن سالىستىرعاندا ءونىمى دە ءتاۋىر. بۇل تۋرالى اۋىل شارۋاشىلىعى ءمينيسترى ساپارحان وماروۆتىڭ ەسەپ بەرۋ جيىنىندا ايتىلدى.
تۇتاستاي العاندا, اۋىل شارۋاشىلىعىنىڭ جالپى ءونىم كولەمى بىلتىر 0,9%-عا ارتىپ, 5,2 ترلن تەڭگەنى قۇراعان. ەڭبەك ونىمدىلىگى ءبىر جۇمىسكەرگە شاققاندا – 2,4 ملن تەڭگە. بۇل تارتىلعان ينۆەستيتسيانىڭ زايا كەتپەگەنىن اڭعارتاتىنداي.
– 2019 جىلى اۋىسپالى ەگىستى ساقتاي وتىرىپ, رەنتابەلدىلىگى جوعارى داقىلدار الاڭىن ۇلعايتۋ ماقساتىندا مايلى جانە بۇرشاقتى داقىلدار القابى ۇلعايدى. شامامەن 470 مىڭ توننا مينەرالدى تىڭايتقىش سەبىلدى. الايدا بۇل جەتكىلىكسىز. سوندىقتان بيىل سالادا تىڭايتقىشتى عىلىمي ۇسىنىمدارعا ساي ەنگىزۋ ءۇشىن مينەرالدى تىڭايتقىشتاردى سۋبسيديالاۋ سوماسى 26 ملرد تەڭگەگە دەيىن كوبەيدى. ماشينا-تراكتور پاركىن جاڭارتۋ قارقىنى 4%-عا دەيىن ارتتى. 12 مىڭعا جۋىق تەحنيكا ساتىپ الىندى, – دەدى س.وماروۆ.
ونىڭ ايتۋىنشا, وسىمدىك قورعاۋ قۇرالدارىن سۋبسيديالاۋ كەڭەيتىلىپ كەلەدى. ەندى گەربيتسيدتەر عانا ەمەس, پەستيتسيدتەردىڭ باسقا دا تۇرلەرى سۋبسيديالانادى. سۋبسيديالاردى كۇنتىزبەلىك جىل شەڭبەرىندە ەمەس, تۇقىم, تىڭايتقىش, پەستيتسيد ساتىپ العان كۇننەن باستاپ 12 اي ىشىندە الۋعا مۇمكىندىك جاسالدى.
جالپى, وتكەن جىلى قازاقستاندىق ونىمدەر الەمنىڭ 72 ەلىنە ەكسپورتتالدى. اگروونەركاسىپتىك كەشەن ونىمدەرىن ەكسپورتتاۋعا ناقتىراق توقتالساق, قىتايعا جىبەرىلگەن ءونىم كولەمى 50,5%-عا ۇلعايدى. پارسى شىعاناعى ەلدەرىنە ەكسپورت – 3,2 ەسە ءوستى. ەكسپورتتىڭ 7,4%-ى ورتالىق ازيا ەلدەرىنە, 8,2%-ى ەۋرازيالىق ەكونوميكالىق وداق ەلدەرىنە جىبەرىلگەن.
ءباسپاسوز ءماسليحاتى بارىسىندا مەملەكەتتىك قولداۋدىڭ ناتيجەسىندە ءسۇت وڭدەۋ كولەمى 7%-عا, ەت وڭدەۋ 8%-عا ارتقانى ايتىلدى. بۇل رەتتە ءسۇت زاۋىتتارىنىڭ جۇكتەمەسى 18%-عا, ەت كومبيناتتارىنىڭ جۇكتەمەسى 21,6%-عا ۇلعايدى.
– مال شارۋاشىلىعىن دامىتۋعا «قازاگرو» بىلتىر 156,5 ملرد تەڭگە باعىتتادى. قۇنى 53 ملرد تەڭگە بولاتىن 82 مىڭ باس ءىرى قارا, 12,3 ملرد تەڭگەگە 374 مىڭ باس ۇساق مال ساتىپ الۋ قارجىلاندىرىلدى. سونداي-اق باعاسى 19,1 ملرد تەڭگە بولاتىن 16 جاڭا ينۆەستيتسيالىق جوبا جۇزەگە استى. وسىلايشا, مال شارۋاشىلىعىندا 64,3 ملرد تەڭگەگە 54 ينۆەستيتسيالىق جوبا ەنگىزىلدى. بيىل تاعى دا 178 مىڭ ءىرى قارا مەن 250 مىڭنان استام ۇساق مال اكەلۋ جوسپارلانۋدا. يمپورت الماستىرۋ شەڭبەرىندە 46 مىڭ توننا ءسۇت پەن 30 مىڭ توننا قۇس ەتىن ءوندىرۋ جوبالارىن ىسكە اسىرۋ كوزدەلگەن, – دەدى س.وماروۆ.
وسى جيىندا ايتىلعانداي, بۇگىندە مينيسترلىك ەلدىڭ ەپيزووتيالىق جانە فيتوسانيتاريالىق سالاماتتىلىعىن قامتاماسىز ەتۋ جانە قازاقستاندىق اۋىل شارۋاشىلىعى ونىمدەرىن وتكىزەتىن ەكسپورتتىق نارىقتار اشۋ بويىنشا جۇيەلى جۇمىس جۇرگىزۋدە. كوروناۆيرۋس پاندەمياسى سالدارىنان ورىن العان داعدارىسقا قاراماستان, اعىمداعى جىلدىڭ 4 ايىنىڭ قورىتىندىسى بويىنشا اگروونەركاسىپتىك كەشەنى سالاسىندا جاعداي تۇراقتى.