كوكتەم بويى بەتپەردە كيگەننەن كەيىن بە, قۇلاعىم ازداپ قالقيا باستاعان سىڭايلى. جوق, الدە بۇرىننان وسىنداي ما ەدى. ايناعا قاراعان سايىن ويىن ۇرەي بيلەگەن بوتەن بىرەۋدى كورگەندەي بولامىن. باياعى القام-سالقام قالپىمنىڭ جۇقاناسى دا جوق. كەشەگى «مەن» قايدامىن, ءوزى؟ وسى سۇراق ءجيى مازالايتىن بولىپ الدى. بۇل كوكتەم دە بۇرىنعى كوكتەمگە ۇقسامادى. انە, تەرەزەدەن جاز سىعالاپ تۇر. مامىق جاۋعان ماۋسىم. ونىڭ دا بويىندا قورقىنىش بار سەكىلدى.
تەرەك باسىنان قۇلاعان اق ۇلپا استانا اسپانىندا ىرعالا بيلەيدى. جاپالاقتاپ جاۋعان قاردىڭ ەلەسىندەي نازىك تە ناۋمەز. اناسى شاقتاپ تىككەن بەتپەردەدەن ماڭدايى عانا جارقىراپ كورىنەتىن اۋلاداعى بالالار كوككە الاقاندارىن توسادى. قۇدايعا قولىن جايعان مۇريدتەي كىناسىز كەيىپتە. قۇس قاۋىرسىنىنداي تەربەلگەن اعاشتىڭ اپپاق مامىقتارى بۇردىرشىندەر قۋعان سايىن قاشادى. ۇمسىنادى, ۇستاتپايدى. جەلمەن جارىسا جۇگىرگەن بۇزىقتار وڭاي بولدىرا قويا ما؟ قايتا سوڭىنان جۇگىرەدى. بۇل جولى دا ناتيجەسىز. ايتسە دە ولار ارمانشىل. سامالدى بوگەمەك بولادى, قالقالايدى. ءبارىنىڭ مۇددەسى ءبىر. قاراڭىزشى, اقىرى بىرەۋى الاقانىنا قوندىردى. ەندى, تىلەك ايتىپ, قايتا ۇرلەمەك. انە, كەلەسىسى دە سويتۋدە. نە تىلەدى ەكەن, ءا. پەرىشتەلەردىڭ تىلەۋى قابىل بولادى دەۋشى ەدى. ولاردىڭ جانى تازا عوي. مىنا داڭعايىر دۇنيەنىڭ كىرشىكسىز ءموپ-ءمولدىر تۇرعىندارى سولار عانا سياقتى. ءومىردىڭ سۇلۋلىعىن سولار عانا سەزەتىندەي.
اپپاق مامىقتار. اق تەرەكتەردىڭ جەمىسى مە, كوز جاسى ما؟ اعاشتار جىلاي ما وسى؟ تاستاردىڭ تولقيتىنى نەسى؟ كوكتىڭ الاسۇراتىنى؟ جەردىڭ شايقالاتىنى شە؟ سوندا جاراتقان جانسىز زاتقا دا جۇرەك بەرگەنى مە؟ ولاردىڭ جۇرەگى ادامداردىڭ جۇدىرىعىنداي كىشكەنتاي ما؟ جو-جوق, ۇلكەن. ۇلكەن دەيمىن. ءتىپتى ءباس تىگۋگە بارمىن. ولار – الىپ جۇرەكتىڭ يەسى. ناعىز مەيىرىم مەن ىزگىلىكتىڭ كوركەم كورىنىسى. ءبىز قانشا قاستاندىق جاساساق تا كەشىرۋدەن جالىققان ەمەس. كەشىرۋدەن... ءسىز وزگەنىڭ قاتەلىگىنە قالاي جاۋاپ قايتاردىڭىز؟ جاۋىزدىقتى ۇمىتا الدىڭىز با؟ بىلەم, الدەبىرەۋدىڭ انتەك ارەكەتىنە ءالى دە نازالىسىز. سودان عوي, ۇزاق ءومىر سۇرمەيتىنىمىز. ال مىناۋ جاسىل الەم ەشكىمگە وكپەلمەيدى. ول – ماڭگى. ويتكەنى جۇرەگى ۇلكەن.
نەمەرەسىن كەشكى سەرۋەنگە الىپ شىققان قاريا تەرەكتىڭ كولەڭكەسىندە وتىر. ساسكە تۇسە سايالايتىن ادەتى. جاپىراقتار تەربەلگەن سايىن, مامىقتار سەبەلەيدى. قۇددى اسپان باقباق گ ۇلىن ۋىستاپ الىپ جەرگە توككەندەي. قىسقا عۇمىردىڭ قىزىعىن الدىندا ويناپ جۇرگەن بالاپانىنا بالايتىن اقساقال ءار مامىققا ۇزاق قارايدى. تەرەك تاعى گۇلدەدى. جاڭاردى, جاساردى. وتكەن كۇندەردىڭ ساۋلەسىندەي. اينالا سۇتتەي اپپاق. انە, بىرەۋ ۇيىلگەن مامىقتى ورتەپ جاتىر...