دومبىرا
دويىر قامشىسىمەن دومبىرانى قاعىپ جىبەردى. قاسيەتتى توعىز پەرنەنىڭ ۇكىلى باسىنا جۋان ءورىم سارت ەتە ءتۇستى... اققۋدىڭ قاناتىنا ساباقتالعان سالتاناتتى ءان ساپ تىيىلدى. ابەس قىلىققا پۇشايمان قوشەمەتشىل القا سىلتىدەي تىنعان. ۇزاققا سوزىلعان ۇعىنىقسىز ۇنسىزدىكپەن بىرگە اسقاقتاعان داۋىس اۋلاققا ءسىڭىپ جوق بولدى.
سول قىساستان كەيىن الگى جارمەڭكەگە ەشكىم ءان باپتامادى. جاعاسىنا قارا قۇندىز ۇستارتقان وقالى شاپاندار مۋنديرلەرگە اۋىستى, ءساندى پاۋەسكەلەر پۋشكالارعا اينالدى.
جوق, ءان سالىنباي قالعان جوق, تەك ءساندى ساحنالار دابىرا داڭعازالارعا تولدى. دومبىرانى دوربا-دوربا اقشا ىعىستىردى. جانسىز داۋىستار جۇرتتىڭ الدىن كەس-كەستەدى.
الەمگە ايگىلى امەريكالىق روك-مۋزىكانت رونني دجەيمس ديو ءبىر سۇحباتىندا فونوگراممامەن ءان ايتاتىن «جاساندى جۇلدىزدارعا» ىزا بولىپ: «زا پەنيە پود فونوگراممۋ نۋجنو پلاتيت كسەروكوپيامي دەنەگ», دەپتى. ديونىڭ ويىن وداعايلاپ, ادەيى ورىس تىلىندە بەردىك. قازەكەم دە ءدال تاۋىپ ايتادى عوي: «ەرىنبەگەن ەتىكشى, ۇيالماعان ءانشى بولادى».
دويىر قامشى دوعارعان ءان ەندىگى جەردە ارقانى انمەن قىرعان سال-سەرىلەردىڭ كومەيىنەن ەمەس, «جاساندى جۇلدىزداردىڭ» جارق-جۇرق ەتكەن البومدارىنان ەستىلىپ جاتتى.
البەتتە ءبىر پاراسى جەراستى جولدارىندا, بازارلاردىڭ قاقپالارىندا بۋلىعىپ تۇراتىن...
گيتارا
جەراستى جولدارىنداعى قايناعان ءومىر جيىرما ءتورت ساعات بويى ەشقاشان ۇزىلمەس ەدى. قالجىراعان قالا قايتسە دە قالعىپ كەتۋى مۇمكىن, الايدا جەراستى جولدارىندا تىرشىلىك كەشىپ جاتقان حالىقتىڭ كوز ىلگەنىن كورمەيسىز.
ەش جەردە جازىلماعان زاڭداردى ىزدەسەڭىز دە, ەشقايدا شىرقالماعان اندەردى ەسىڭىزگە الساڭىز دا, مۇقتاج جاندارعا سوزىلعان مەيىرىمدى قولداردى قىسقىڭىز كەلسە دە, ادال ەڭبەكتىڭ ماڭدايىنان اققان تەر مەن ءبىر-بىرىنە پانا قوعامدى كورگىڭىز كەلسە دە سول جەراستى جولدارىنا باعىت الار ەدىڭىز.
جەراستى جولدارىندا ءبارى بار: جوعالعان تىلدەر, اينالىمنان باياعىدا شىعىپ قالعان ەسكى اقشالار, الدەقاشان ساننەن الىنىپ تاستالعان جۇپار اتىرلەر, ەڭ عاجايىپ گۇلدەر, ەڭ قىمبات كىتاپتار, ەڭ ىزگى اندەر, ەڭ ءتاتتى توقاشتار, ءتىپتى ەڭ ارزان ش ۇلىقتار.
سەڭدەي سوعىلىسقان سول ءنوپىردىڭ اراسىندا كەتىپ بارا جاتقان ول انەۋ بۇرىشتا التى شەكتى گيتاراسىن اسىنىپ الىپ, قازاقتىڭ قوڭىر ءانىن قويۋ كەشكە ارالاستىرا شىرقاپ تۇرعان جاس انشىگە جالت بۇرىلدى!
كولىكتەردەن شىققان شۋلى داۋىستاردىڭ اراسىمەن, تەلەديدارلاردان ەستىلىپ جاتاتىن ارزان ازىلدەردىڭ ۇستىمەن, الەۋمەتتىك جەلىلەردەن جەلدەي ەسكەن اششى سوزدەردىڭ جەلكەسىن شارپي كوتەرىلگەن جاڭا داۋىسقا, وزگەشە ورنەككە, بولەك ماقامعا مويىن بۇرماي ءوتۋ مۇمكىن ەمەس ەدى.
تىڭداۋشىنىڭ كوزىنەن ىستىق جاس ىرشىپ كەتتى. بۋلىققان ىزا مەن كەكتى ەسەنىڭ كوز جاسى بەتىن جۋدى. تالانت پەن تاعدىرعا دەگەن تۋىس كوز جاسى كوكىرەگىنەن اقتارىلدى. قازاقشا ءان ايتپاق تۇگىلى, قازاقشا سويلەۋگە ۇيالاتىن ءزاۋلىم-ءزاۋلىم ءساندى كەڭسەلەر مەن قالىڭ الەۋمەت ساپىرىلىسقان كوشەلەردە جەتىمسىرەگەن انا ءتىلىنىڭ وگەيدەن تارتقان ازابىن ارقالاعان كوز جاسى لىقسىدى.
جاس ونەرپاز «جايلاۋكول كەشتەرىن» شىرقاپ تۇر. التىگەنىنەن (گيتاراسىنان) كەڭىستىككە شاشىراعان شۋاق جۇرەگىڭىزدى قاپسىرا قۇشاقتاعانداي جىپ-جىلى سەزىلەدى... كىرىسپەسى عاشىق تۇيسىكپەن ورنىققان داۋىس قايىرماسىن سونداي مۇڭدى ءتۇسىردى.
ءانشىنىڭ الدىندا ايقارا اشىق جاتقان گيتارا قورابىنا وتكەن-كەتكەن جۇرگىنشىلەردىڭ ءىلتيپاتتارى, ىقىلاستارى, لەبىزدەرى, قوشەمەتتەرى سىلدىر-سىلدىر ەتەدى...
سودان كەيىن جاس ءانشىنى ەشكىم كورگەن جوق. ءبىر دوسى ونى «قۋ تىرلىككە باعىنباي, گيتاراسىنىڭ التى شەگىنەن قازاق ءۇشىن شۋاق اۋلاپ باسقا جاققا كەتتى» دەيدى, ءبىر دوسى ونى «كوستيۋم-شالبارلى شەنەۋنىك قوعام» بۇيىرىنەن سولق ەتكىزىپ ىرەپ تاستادى دەيدى...
ول ءالى دە ءبىز كورگەن جەراستى جولىندا «جايلاۋكول كەشتەرىن» شىرقاپ تۇرعانداي.
اككوردەون
ەسكى بازاردىڭ شىعىس قاقپاسىنان شىققان ەرەكشە اۋەنگە البەتتە جاقىن وتەر ەدىڭىز. سىرلى سىرنايدان توگىلگەن ءاننىڭ قاسىنان بەيعام ءوتىپ كەتۋ ءتىپتى مۇمكىن ەمەس. ءيا, قالتاڭىزدا قالعان سوڭعى تيىندى زاعيپ اككوردەونشىنىڭ تەمىر قالبىرىنا قاڭعالاقتاتا لاقتىراسىز. ءسىزدىڭ سۇلۋ ءاندى قانشالىقتى باعالاعانىڭىزدى البەتتە ول تيىن-تەبەن ولشەمەيتىنى بەلگىلى. وندايدا عارىپ ونەرپاز دا سىزگە ريزاشىلىعىن بىلدىرگەن كەيىپپەن بىرقالىپتى ويناپ تۇرعان ءانىن جۇلقىپ كەپ قالادى. ونىسى ءسىزدىڭ الگى «مەيىرىمدى» مونەتالارىڭىزعا بىلدىرگەن ماەسترونىڭ مەزىرەتى.
سوقىر اككوردەونشىعا اقىن جازعان ولەڭ وڭەشىڭىزگە تىعىلادى.
«وتەدى جۇرگىنشى جۇرت تيىن تاستاپ, بۇتىنا قىسىپ الار قالبىرىنا» (سەرىك ساعىنتاي).
الايدا اككوردەونشى سول جىگىت ەكى مىڭىنشى جىلداردىڭ باسىنان كەشەگە دەيىنگى قانشاما جاس ۇرپاقتى ەستى اندەرىمەن تاربيەلەپ كەلگەنىن ەشقانداي كابينەتتەر بىلگەن ەمەس. زاعيپ تالانتتىڭ ءانى قازاقتىڭ بەينەت باسقان قاباعىن بۇگىنگە دەيىن باعىپ كەلگەنىن ەشكىم تۇسىنگەن ەمەس.
ءتىپتى, ونىڭ سەرگەك تە قىراعى اندەرى ءبىزدى قازىر دە قالت جىبەرمەي قاداعالاپ, بايقاتپاي سىرتىمىزدان كۇزەتىپ تۇرعانداي.