بەلگىلى جازۋشى, كينودراماتۋرگ سماعۇل ەلۋباي «Egemen Qazaqstan» گازەتىنىڭ ۇيىمداستىرۋىمەن وتكەن قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان «عاسىر زۇلماتى» اتتى ونلاين دوڭگەلەك ۇستەلىندە زۇلمات جىلدار قۇرباندارىن ەسكە الۋعا بايلانىستى بىرنەشە ۇسىنىس ايتتى.
- اشارشىلىق پەن قۋعىن-سۇرگىن كۇنىن ەكىگە ءبولىپ, اشارشىلىقتى 30 مامىرعا, قۋعىن-سۇرگىندى 31 مامىرعا بۇرىنعى ورنىنا قالدىرعان ءجون. ويتكەنى 15 جىلدىڭ ىشىندە قىرىلعان 5 ميلليونداي قازاققا, سولاردىڭ ارۋاعىنا ۇلكەن قيانات جاساپ وتىرمىز. مۇنداي الاپات اشارشىلىق تۋرالى جانە ونىڭ ۇلىقتاۋ ماسەلەسى بىزدە كەمشىن سوعىپ جاتىر. زۇلماتقا ارنالعان نۇر-سۇلتان مەن الماتى قالاسىندا ەكى ەسكەرتكىش قويىلدى. ەسكەرتكىش جەكە ادامعا دا قويىلادى عوي. ال حالىقتىڭ جارتىسىنان كوبى قىرىلعان بۇل ناۋبەتكە لايىعى – مەموريال كەشەن, - دەدى جازۋشى.
سونداي-اق ول مەموريال كەشەندە تەك 15 جىلدىڭ كولەمىندەگى اقتاڭداقتار ەمەس, جالپى قازاق تاريحىنداعى اقتاڭداقتار زالى جاسالسا دەگەن ۇسىنىسى بارىن جاسىرمادى.
- مۇندا قازاق حالقىنىڭ باستان وتكەرگەن قاسىرەتى ايقىن كورسەتىلسە. قازىرگى كەزدى بالاۋىزدان ءمۇسىن جاسايتىن شەبەرلەر بار. سولاردى شاقىرىپ, ەۋروپالىق ۇلگىدەگى مۋزەيلەر ءتارىزدى تاريحتاعى سۇمدىقتاردى «تىرىلتە» الامىز. مۇنداي مۋزەيدىڭ اسەرى ەرەكشە, تاربيەلىك ءمانى مول بولماق. تاريحتى كوزگە كورسەتكەندەي جاس ۇرپاقتى پاتريوتتىق, تانىمدىق رۋحتا تاربيەلەۋگە بۇدان ارتىق جاساي المايسىڭ, - دەدى ول.