PGL Astana 2026 حالىقارالىق ءتۋرنيرى Counter-Strike 2 ديستسيپليناسى بويىنشا استانادا ءساتتى باستالدى. Barys Arena ارەناسىندا ءوتىپ جاتقان جارىستىڭ العاشقى ويىن كۇنى شامامەن 7 مىڭ كورەرمەن جينالدى, دەپ حابارلايدى Egemen.kz.
ءتۋرنيردىڭ جارتىلاي فينالىنا MOUZ, Team Spirit, Magic جانە Falcons كوماندالارى شىقتى. العاشقى كۇننىڭ وزىندە كورەرمەن تارتىستى ماتچتاردى, جارقىن ويىن ساتتەرىن جانە ءىس-شارانىڭ جوعارى دەڭگەيدە ۇيىمداستىرىلعانىن تاماشالادى.
جانكۇيەرلەردىڭ ەرەكشە نازارى قازاقستاندىق ويىنشىلاردىڭ ونەرىنە اۋدى. ولار كيبەرسپورتشىلاردىڭ ءاربىر ءساتتى ارەكەتىن قولداپ وتىردى.
تۋرنير قوناقتارىنىڭ قاتارىندا داۋرەن قىستاۋباەۆ, FURIA Esports ويىنشىسى دانيل گولۋبەنكو, ستريمەر سلاۆا بۋستەر, PGL تۋرنيرلەرىنىڭ جۇرگىزۋشىسى دجەيمس بانكس, سونداي-اق الەم چەمپيونى گابريەل تولەدو بولدى.
«Barys Arena-داعى اتموسفەرا كەرەمەت بولدى, كيبەرسپورت توڭىرەگىندە مۇنداي قىزىعۋشىلىقتى كوپتەن بەرى كورمەپپىن. تريبۋنالاردا ناعىز ەنەرگيا سەزىلدى. ادامدار كوماندالاردى قولداپ, ۇرانداپ, ءاربىر راۋندقا شىنايى جانكۇيەر بولدى. وسىنداي تۋرنيرگە قاتىسا العانىما وتە قۋانىشتىمىن», دەدى جانكۇيەرلەردىڭ ءبىرى.
ۇيىمداستىرۋشىلار مەن ساراپشىلاردىڭ ايتۋىنشا, مۇنداي تۋرنيرلەردى وتكىزۋ وقيعالىق ءتۋريزمدى دامىتۋعا جانە استانانىڭ ءىرى حالىقارالىق كيبەرسپورتتىق ءىس-شارالاردى قابىلدايتىن الاڭ رەتىندەگى بەدەلىن نىعايتۋعا ىقپال ەتەدى. شەتەلدىك قوناقتار ءتۋرنيردىڭ جوعارى دەڭگەيدە ۇيىمداستىرىلعانىن, ەلوردانىڭ زاماناۋي ينفراقۇرىلىمىن جانە قازاقستان جاستارىنىڭ كيبەرسپورتقا قىزىعۋشىلىعى ارتىپ كەلە جاتقانىن اتاپ ءوتتى.
جۇلدە قورى – 1,6 ملن دوللار: ەلوردادا PGL Astana 2026 حالىقارالىق ءتۋرنيرى باستالدى
بۇگىن, 16 مامىر كۇنى, تۋرنير ەكىنشى ويىن كۇنىنىڭ ماتچتارىمەن جالعاسادى. جانكۇيەرلەردى مىقتى كوماندالاردىڭ جاڭا كەزدەسۋلەرى مەن ۇلكەن كيبەرسپورت مەرەكەسىنىڭ ەرەكشە اتموسفەراسى كۇتەدى.