جاقىندا جەنەۆا قالاسىندا بۇۇ ادام قۇقىقتارى كەڭەسىنىڭ 13-ءشى سەسسياسى شەڭبەرىندە بۇۇ ازشىلىقتار ماسەلەسى جونىندەگى تاۋەلسىز ساراپشى گاي ماكدۋگاللمەن ينتەراكتيۆتى ديالوگ ءوتتى. ينتەراكتيۆتى ديالوگ كەزىندە تاۋەلسىز ساراپشى مانداتى شەڭبەرىندەگى جىلدىق جۇمىسىمەن قاتار, ونىڭ قازاقستانعا جانە باسقا دا ەلدەرگە جاساعان ساپارلارىنىڭ قورىتىندىلارى تالقىلاندى.
تاۋەلسىز ساراپشى ەلىمىزدە 2009 جىلى ماۋسىم ايىندا ساپارمەن بولعانىن ايتا وتىرىپ, قازاقستان ۇكىمەتىنە ىنتىماقتاستىق ءۇشىن تەرەڭ ريزاشىلىعىن ءبىلدىردى.
گ.ماكدۋگالل قازاقستاندا 130-دان استام ءتۇرلى ەتنوس تۇرىپ جاتقانىن جانە ۇلتارالىق تاتۋلىقتىڭ ۇلگىسى ەرەكشە ماقتانىشپەن اتاپ ءوتىلۋى ءتيىس ەكەنىن ايتتى. وسى رەتتە, ازشىلىقتار ماسەلەسىنە قاتىستى وڭ باستامالار تۇراقتىلىق پەن ارالۋاندىلىققا دەگەن قۇرمەتتىڭ كەپىلى بولىپ تابىلادى. بۇل ورايدا مەملەكەتتىك ساياسات ءتۇرلى ەتنوستاردىڭ ءوز ءتىلىن ساقتاپ قالۋىنا, ۇلتتىق مادەنيەت پەن ءداستۇرىن دامىتۋ ءۇشىن قاجەتتى ەتنو-مادەني اسسوتسياتسيالاردىڭ قۇرىلۋى جانە قارجىلاندىرىلۋىنا قولداۋ كورسەتىپ كەلەدى.
بۇۇ-نىڭ تاۋەلسىز ساراپشىسى قازاقستان حالقى اسسامبلەياسىنىڭ رولىنە ەرەكشە توقتالىپ, “اسسامبلەيا ازشىلىقتاردى تانۋ جانە ولاردىڭ مادەني مۇراسىن ساقتاپ قالۋدا قازاقستاننىڭ حالىقارالىق قاۋىمداستىق الدىنداعى جاۋاپكەرشىلىگىن كورسەتەتىن ماڭىزدى ۇلتتىق سيمۆولى” دەپ باعا بەردى.
گ.ماكدۋگالل قازاقستان ايتارلىقتاي جاس مەملەكەت ەكەندىگىن جانە ول ءوز مەملەكەتتىلىگىن نىعايتۋدا, قازاق ءتىلىن جانە قازاق مادەنيەتىن جاڭعىرتۋدا قيىندىقتار جوق ەمەس ەكەنىن مويىنداي كەلە, بۇعان قاراماستان, قازاقستان بارلىق ۇلتتار مەن ەتنوستىق توپتارعا قۇشاعى ايقارا اشىق ەكەنىن, سونىمەن بىرگە, وزىنە ءتان ۇلتتىق كۋالىك قالىپتاستىرۋعا كۇش جۇمساپ جاتقانىن مالىمدەدى.
بۇۇ-نىڭ تاۋەلسىز ساراپشىسى ۇلتتىق ازشىلىقتاردىڭ ءوز انا تىلىندە ءبىلىم الۋ ساپاسىن ارتتىرۋ, ءتيىستى وقۋلىقتارمەن قامتاماسىز ەتۋدە شەشىلمەگەن بىرقاتار ماسەلەلەرى بار ەكەنىن قابىلداي وتىرىپ, ۇكىمەتتىڭ بۇل باعىتتاعى وڭ قادامدارىن ودان ارى جالعاستىرۋىن سۇرادى.
گ.ماكدۋگالل قازاقستانداعى ۇلتارالىق تاتۋلىقتى جوعارى باعالاپ قانا قويماي, دىنارالىق توزىمدىلىك پەن ۇيلەسىمدىلىك جانە ءدىني بوستاندىقتىڭ جوعارى دەڭگەيىنە توقتالىپ ءوتتى.
ءوز كەزەگىندە قازاقستان ۇكىمەتىنىڭ وكىلى بۇۇ ادام قۇقىقتارى كەڭەسىمەن جانە بۇۇ تاۋەلسىز ساراپشىسىمەن ودان ارى سىندارلى ىنتىماقتاستىقتى جالعاستىرۋعا دايىندىعىن ءمالىمدەدى.
ينتەراكتيۆتى ديالوگ باراسىندا ادام قۇقىقتارى كەڭەسىنىڭ مۇشەلەرى قازاقستان مەملەكەتىنىڭ قازاق ءتىلىن, مادەنيەتىن قايتا جاڭعىرتۋ جانە باسقا ۇلتتاردىڭ قۇندىلىقتارىن ساقتاپ قالۋداعى تاجىريبەسىن قىزىعۋشىلىقپەن قابىل العاندارىن ايتتى.
“ەگەمەن-اقپارات”.