بيىلعى ءتورتىنشى توقسان بۇرىنعىدان وزگەرەك باستالعانى بەلگىلى. سوعان ساي ەندى بولەكشە ءبىتىپ جاتىر. ونىڭ ءبىر بەلگىسى بولار, سوڭعى قوڭىراۋ بيىل قاشىقتان سوعىلدى.
«بيىلعى سوڭعى قوڭىراۋدىڭ ءۇنى مەن سىرى دا ەرەك. سەبەبى وقۋ جىلىنىڭ اياقتالۋىنا وراي ۇيىمداستىرىلعان مەرەكەلىك شارا ونلاين-رەجيمدە ءوتتى. «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ فيليالى «نۇر-سۇلتان قالاسىنداعى حالىقارالىق مەكتەپتە» سوڭعى قوڭىراۋ شاراسى باستاۋىش مەكتەپتە سىنىپ ساعاتتارى, ال نەگىزگى مەكتەپتە شاڭىراق ساعاتتارى فورماتىندا ونلاين رەجيمدە MS Teams پلاتفورماسىندا وتكىزىلدى», دەپ حابارلايدى نزم ءباسپاسوز قىزمەتى.
قازاقستان رەسپۋبليكاسىنىڭ مەملەكەتتىك ءانۇرانىنان باستاۋ العان سوڭعى قوڭىراۋ شاراسى نۇر-سۇلتان قالاسىنداعى حالىقارالىق مەكتەپ ديرەكتورى عاليا سىزدىقوۆانىڭ بەينەقۇتتىقتاۋىمەن جالعاسىن تاپتى. مەكتەپ باسشىسى مەرەكەلىك شاراعا قاتىسۋشىلاردى وقۋ جىلىنىڭ اياقتالۋىمەن قۇتتىقتادى:
«وسىناۋ قاجىرلى جۇمىسىمىزدىڭ تاعى ءبىر بەلەسى 2019-2020 وقۋ جىلى دا ءوز مارەسىنە جەتتى. بۇل وقۋ جىلى ارقايسىمىز ءۇشىن ءوز وقيعالارىمەن, ءوز جەتىستىكتەرىمەن ەستە قالدى. كەزدەسكەن قيىندىقتارعا قاراماستان, ءبىز ءۇشىن وقۋ جىلى جەمىستى بولعانىن زور سەنىممەن ايتا الامىن. بۇل ءسوزىمدى ءبىزدىڭ وقۋشىلارىمىزدىڭ وقۋ ۇلگەرىمىنىڭ جوعارى كورسەتكىشتەرى دالەلدەيدى. 2019-2020 وقۋ جىلى اياسىندا مەكتەبىمىز حالىقارالىق باكالاۆرياتتىڭ ديپلومدىق باعدارلاماسى بويىنشا اۆتوريزاتسيا الدى. سونداي-اق, CIS حالىقارالىق مەكتەپتەر كەڭەسىنىڭ مۇشەلىگىنە قابىلداندى. ۇستازدارىمىز حالىقارالىق جانە رەسپۋبليكالىق دەڭگەيدەگى پەداگوگيكالىق شەبەرلىك بايقاۋلارىنىڭ جەڭىمپازدارى اتاندى. اتالعان جەتىستىكتەردىڭ قاتارىن وقۋشىلارىمىزدىڭ جەڭىستەرى تولىقتىرا تۇسەدى. بۇل دەگەنىمىز, وقۋ جىلىنىڭ تابىستى اياقتالعاندىعىنىڭ دالەلى. بۇگىنگى بارلىق العىس پەن جىلى سوزدەر قۇرمەتتى ۇستازدار قاۋىمىنا ارنالادى, ويتكەنى ءدال سىزدەردىڭ ارقالارىڭىزدا بالالار عاجايىپ ءبىلىم الەمىنىڭ ەسىگىن اشادى. ارينە, بۇل رەتتە بىزگە ءاردايىم قولداۋ كورسەتىپ, جەتىستىككە بىرگە جەتەلەگەن اتا-انالاردىڭ دا ەڭبەگىن ايتپاي كەتۋگە بولماس. ءبىز جىل بويى سىزدەردىڭ قولداۋلارىڭىزدى, رياسىز كوڭىلدەرىڭىزدى, قامقورلىقتارىڭىزدى سەزىندىك. ءبىز بۇل بەلەستىڭ اياقتالىپ, الداعى وقۋ جىلىندا مەكتەپ قابىرعاسىندا قايتا قاۋىشامىز دەگەن ۇمىتتەمىز», دەيدى عاليا سىزدىقوۆا.
اتالعان ۆەدومستۆو وكىلىنىڭ حابارلاۋىنشا, بالالاردىڭ «ۇستازىم» اتتى انىنە تۇسىرىلگەن «ۇستاز اتى بيىك ءارى ماڭگىلىك» تاقىرىبىنداعى بەينەجولداۋلارى سوڭعى قوڭىراۋ شاراسىنا وزگەشە ءبىر رەڭك بەردى.