پاكىستاندا ۇشاق قۇلادى

ۇشاق لاحوردان ۇشىپ شى­عىپ, كاراچيگە قونار تۇستا اۋە­جاي ماڭىنداعى ۇيلەردىڭ بىرى­نە قۇلاعان. پاكىستان دەنساۋلىق ساق­تاۋ ءمينيسترى ءباسپاسوز حاتشى­سىنىڭ مالىمدەۋىنشە, اپاتتان ەكى ادام امان قالعان.

قازىرگى تاڭدا قازا بولعان­دار­دىڭ دەنەسى كاراچيدەگى ەڭ ۇلكەن مەملەكەتتىك اۋرۋحانا – Jinnah مەديتسينالىق ورتالىعى مەن ازاماتتىق اۋرۋحاناسىنا جەتكىزىلگەن. ارنايى كوميسسيا قازا تاپقانداردىڭ كىم ەكەنىن زەرتتەپ جاتىر. ازىرگە 19 ادام عانا انىقتالعان.

پاكىستاندىق بۇقارالىق اقپارات قۇرالدارىنىڭ حابارلاۋىنشا, ۇشاق بورتىندا 99 جولاۋشى جانە 8 ەكيپاج مۇشەسى بولعان. قازا تاپقاندار اراسىندا قيراعان ۇيلەردىڭ تۇرعىندارى دا بار. ازىرگە ەل بيلىگى قازا تاپقاندار سانىن ناقتى ايتا الار ەمەس. ويتكەنى ءۇيىندى استىندا قانشا ادام جاتقانى بەلگىسىز.

الدىن الا دەرەك بويىنشا, PK-8303 باعىتىنداعى Airbus A320 ۇشاعى تەحنيكالىق اپاتقا بايلانىستى قۇلاعان. پاكىستان تەلەارنالارى اقىرعى ساتتە  بولعان پيلوت پەن اۋە ديسپەتچەرى اراسىنداعى اڭگىمەنى جاريالادى. وندا ۇشقىشتىڭ قوزعالتقىش ىستەن شىققانىن ايتقانى ەستى­لەدى. اۋە ديسپەتچەرىنىڭ اۋە كە­مەسىن دوڭعالاقسىز قوندىرۋ ىقتيمالدىلىعىن سۇراعان ساۋالىنا پيلوت جاۋاپ بەرمەگەن كورىنەدى. كەيىننەن بايلانىس ءۇزىلىپ كەتىپتى.

«ۇشاعىمىز لاحوردان كارا­­چيگە كەلىپ قونۋى ءتيىس ەدى. پي­لوت سوڭعى سوزىندە قونار كەزدە تەح­نيكالىق ماسەلە تۋىنداپ, اۋە كەمەسىن قايتا كوككە كوتە­رىپ, ءبىر اينالىپ كەلۋگە شە­شىم قابىلدادى», دەيدى «پاكىس­تان حالىقارالىق اۋە جولى» كومپانياسىنىڭ باسشىسى ار­شاد ماليك.

الەۋمەتتىك جەلىلەردە تارا­عان ۆيدەولاردا ۇشاقتىڭ تۇرعىن ۇيلەردى جاپىرا قۇلاعانى كورى­نەدى. اۋە كەمەسىنىڭ كەي بولىكتەرى كوشەلەردە شاشىلىپ جاتىر. سونداي-اق كوشەدە بىرنەشە كولىك ورتەنگەن.

اپاتتان امان قالعان مۇحام­مەد زۋباير جەرگىلىكتى تەلەار­نا­لارعا سۇحبات بەرىپ, وقيعانىڭ جاي-جاپسارىن حابارلادى. ونىڭ ايتۋىنشا, اۋە كەمەسى ءبىر مارتە قونۋعا تالپىنعان. كەيىننەن كوك­كە كوتەرىلىپ, 10-15 مينۋتتان كەيىن قۇلاعان. پەرىشتەسى قاق­قان شىعار, زۋبايرعا اسا قاتتى زاقىم كەلمەپتى.

«ۇشاق قۇلايدى دەپ ەشكىم ويلاعان جوق. ول باياۋ قالىقتاپ كەلە جاتقان ەدى. جەرگە سوعىلعان كەزدە ەسىمدى جوعالتتىم. ەسىم­دى جيعاندا اينالادان ىڭىر­سىعان, ايقايلاعان داۋىستار ەستىدىم. ۇلكەندەر دە, بالالار دا كومەك سۇراپ جاتتى. جان-جاعىم وتقا ورانعان. قاۋىپسىزدىك بەلدىگىن شەشىپ العا ۇمتىلدىم. الىستان جارىق كورىندى. سوعان قاراي ۇمتىلا بەردىم. ۇشاقتان شىعۋ ءۇشىن ءۇش مەتر بيىكتەن سەكىرۋگە تۋرا كەلدى», دەيدى ول.

پاكىستان كوروناۆيرۋس پاندەمياسىنا بايلانىستى توقتاپ قالعان ەلدەگى اۋە قاتىناسىن تاياۋدا عانا ىسكە قوسقان-دى. جالپى, كەيىنگى جىلدارى وسى ەلدە ۇشاقتار ءجيى قۇلاپ ءجۇر. ماسەلەن, 2010 جىلى Airblue كوم­پانياسىنىڭ لاينەرى يسلاماباد ماڭىندا قۇلاپ, بورتتاعى 152 ادام تۇگەلدەي مەرت بولدى.

2012 جىلى راۆالپيندي قا­لاسى ماڭىندا Bhoja Air كوم­پانياسىنىڭ «بوينگ-737» اۋە كەمەسى كوككە كوتەرىلە الماي, 127 ادام قازا تاپتى. 2016 جىلى «پاكىستان حالىقارالىق اۋە جو­لى» كومپانياسىنىڭ ۇشاعى اۋە­دە جانىپ كەتىپ, 47 ادام باقيعا اتتاندى.