سالتاناتتى راسىمنەن كەيىن مەملەكەت باسشىلارى كەلىسسوزدەر جۇرگىزىپ, ونىڭ بارىسىندا ساياسي, ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرىن قاراستىردى. بۇل تۋرالى اقوردا.kz حابارلادى.
سونداي-اق, نۇرسۇلتان نازارباەۆ پەن البەر II سەرىكتەستىكتىڭ بارلىق سپەكترىن دامىتۋ جونىندەگى كەلىسىمدەردى ىسكە اسىرۋ ۇدەرىسىن, ەكى مەملەكەت باسشىسىنىڭ بىرلەسكەن دەكلاراتسياسىندا كورىنىس تاپقان باستى باعىتتاردى تالقىلادى.
مەملەكەت باسشىسى اتاپ وتكەندەي, قازاقستان موناكونى وڭتۇستىك ەۋروپاداعى پەرسپەكتيۆالىق سەرىكتەسى رەتىندە قاراستىرادى جانە ەكونوميكالىق, ينۆەستيتسيالىق ءوزارا ءىس-قيمىل اياسىن كەڭەيتۋ ءۇشىن بارلىق العىشارتتار بار.
موناكو كنيازىنىڭ ەكىجاقتى ىنتىماقتاستىقتىڭ نەگىزىن قالاعان, وتكەن جىلى قاراشادا قازاقستانعا جاساعان العاشقى رەسمي ساپارىنان كەيىن ەكى ەل اراسىنداعى ىسكەرلىك بايلانىستار جاندانا تۇسكەنى اتاپ ءوتىلدى.دەگەنمەن, ساۋدا-ەكونوميكالىق بايلانىستار دەڭگەيى ءالى دە ەكى مەملەكەتتىڭ الەۋەتىنە ساي ەمەس. ونى دامىتۋ جولىنىڭ ءبىرى قازاقستان-موناكو ىسكەرلىك كەڭەسىن قۇرۋ بولىپ تابىلادى.
موناكو كومپانيالارىن قازاقستان يننوۆاتسيالىق جوبالارعا, اسىرەسە, ەنەرگيالىق جاعىنان ءتيىمدى قۇرىلىس, جاڭارتىلاتىن ەنەرگەتيكا, تۋريزم يندۋسترياسى, سەرۆيستىك يندۋستريا, فارماتسەۆتيكا جانە ەلەكترونيكا سالالارىن قامتيىن, مەملەكەت تاراپىنان باسەكەلەستىك ارتىقشىلىقتارعا يە سالالارعا تارتۋعا مۇددەلى.
قازاقستان كەدەن وداعىنا مۇشە بولا وتىرىپ, ءوز كەزەگىندە موناكو بيزنەسى ءۇشىن اۋقىمدى نارىقتىق پەرسپەكتيۆالار ۇسىنادى.موناكا ينفلياتسيانىڭ, سونداي-اق جۇمىسسىزدىقتىڭ ءىس جۇزىندە نولدىك دەڭگەيى ساقتالۋى جاعدايىندا جالپى ىشكى ءونىمنىڭ ءوسۋىنىڭ ورنىقتى قارقىنىن كورسەتە وتىرىپ, ءتيىمدى ەكونوميكا قۇرۋدىڭ جانە قولايلى الەۋمەتتىك ورتا قالىپتاستىرۋدىڭ ۇلگىسى بولىپ سانالادى. شەكتەۋلى كولەمدەگى رەسۋرستار جاعدايىندا قۋاتتى ەكونوميكالىق كورسەتكىشتەردى قامتاماسىز ەتۋگە مۇمكىندىك بەرەتىن قولايلى ىسكەرلىك احۋال قالىپتاستىرۋداعى موناكونىڭ تاجىريبەسى زور قىزىعۋشىلىق تۋدىرادى. جان باسىنا شاققانداعى جالپى ىشكى ءونىم ءتارىزدى ينديكاتور جونىنەن موناكو كوشباسشىلىق ورىننىڭ بىرىنە يە (2012 جىلى 163 مىڭ دوللار).
بۇل مەملەكەت ءۇشىن قورشاعان ورتانى قورعاۋ – ەرەكشە باسىمدىق. وسى سالاداعى ءوزارا ءىس-قيمىل قازاقستان پرەزيدەنتى مەن موناكو كنيازى تاراپىنان «جاسىل ەكونوميكا» سالاسىنداعى «جاسىل كوپىر» سەرىكتەستىك باعدارلاماسىمەن, سونداي-اق استانادا ەكسپو-2017 كورمەسىنە دايارلىق جانە ونى وتكىزۋ ماسەلەلەرىمەن قوسا تالقىلاندى.
ەكى ەلدىڭ تۋريزم سالاسىنداعى ىنتىماقتاستىعى قازاقستان ازىرلەپ جاتقان جوبالار مەن اتالعان سالاداعى موناكونىڭ بىرەگەي تاجىريبەسىن ەسكەرگەندە, زور قىزىعۋشىلىق تۋعىزادى. بۇعان قوسا, كەلىسسوزدەر بارىسىندا تاراپتار مادەني-گۋمانيتارلىق ىنتىماقتاستىقتى دامىتۋ مۇمكىندىگىن قاراستىردى. وعان «موناكو حانىمى گرەيس كەلليدىڭ ءداۋىرى» كورمەسىنىڭ استانادا اشىلۋى سەرپىن بەردى. «استانا وپەرا» وپەرا جانە بالەت تەاترى مەن «وپەرا مونتە-كارلو» اراسىنداعى ىنتىماقتاستىق ونى بۇدان ءارى نىعايتۋ باعىتتارىنىڭ ءبىرى بولىپ تابىلادى.سونىمەن قاتار, موناكو تۇرعىندارى كەلەسى جىلى قازاقستاننىڭ فرانتسياداعى مادەنيەتى ماۋسىمى اياسىندا قازاق مادەنيەتىمەن تانىسۋ مۇمكىندىگىنە يە بولماق.
كەزدەسۋ كەزىندە حالىقارالىق ۇيىمدار, ەڭ الدىمەن بۇۇ اياسىندا ءوزارا ءىس-قيمىلدى دامىتۋ ماسەلەسى دە قارالدى. ەكى مەملەكەتتىڭ نەگىزگى حالىقارالىق پروبلەمالارعا كوزقاراسى ۇقساس ەكەندىگى اتاپ ءوتىلدى.سونداي-اق, مەملەكەتتىك ناگرادالار الماسىلدى. البەر II قازاقستان پرەزيدەنتىنە اۋليە كارل وردەنىن تاپسىردى. ءوز كەزەگىندە موناكو كنيازى I دارەجەلى «دوستىق» وردەنىمەن ماراپاتتالدى.
كەزدەسۋ قورىتىندىسىندا قازاقستان رەسپۋبليكاسى ۇكىمەتى مەن موناكو كنيازدىگى ۇكىمەتى اراسىنداعى تۋريزم سالاسىنداعى ىنتىماقتاستىق تۋرالى كەلىسىمگە قول قويىلدى.
مەملەكەت باسشىسى نۇرسۇلتان نازارباەۆ موناكوعا رەسمي ساپارى اياسىندا كنيازدىكتىڭ ۋربانيستيكالىق جانە قارجىلىق دامۋىنىڭ تانىستىرىلىمىنا قاتىستى.
تانىستىرىلىم بارىسىندا مەملەكەتتىك مينيستر م.روجە, ەكونوميكالىق دامۋ جانە قارجى ءمينيسترى م.كاستەليني, الەۋمەتتىك ماسەلەلەر مەن دەنساۋلىق ساقتاۋ ءمينيسترى س.ۆالەري, قورشاعان ورتانى قورعاۋ جانە قالا قۇرىلىسى ءمينيسترى م.پ.گراماليا مەملەكەت باسشىسىنا ءتيىستى سالانى دامىتۋدىڭ جاي-كۇيى مەن كەلەشەگى تۋرالى اقپاراتتى, اتاپ ايتقاندا, گرەيس حانىمى ەمحاناسىنىڭ قۇرىلىس جوسپارىن, سونداي-اق شەكتەۋلى اۋماققا يە كنيازدىكتىڭ قالا قۇرىلىسىن ودان ءارى جۇرگىزۋدىڭ باعىتتارىن تانىستىردى.
قازاقستان پرەزيدەنتى تانىستىرىلىمنىڭ مەيلىنشە مازمۇندى بولعانىن اتاپ ءوتىپ, وسى ساپارعا شاقىرعانى ءۇشىن تاعى دا العىسىن ايتتى.– البەر II-ءنىڭ وتكەن جىلعى ساپارى, گرەيس حانىمعا ارنالعان قازاقستانداعى كورمە جانە مەنىڭ بيىلعى ساپارىم – ءبىزدىڭ حالىقتارىمىز بەن مەملەكەتتەرىمىزدىڭ ءوزارا قارىم-قاتىناستارىنىڭ العاشقى تاريحي بەتتەرى, – دەدى نۇرسۇلتان نازارباەۆ.
مەملەكەت باسشىسى ءبىلىم بەرۋ, دەنساۋلىق ساقتاۋ سالالارىنا باسا نازار اۋدارۋدىڭ, سونداي-اق قۇرىلىستى بەلسەنە جۇرگىزۋدىڭ ەكى ەلگە دە ورتاقتىعىن اتاپ ءوتتى.– ءبىر ەرەكشەلىگى, بۇل ماسەلەلەردى موناكو ەكى شارشى شاقىرىم, ال قازاقستان ەكى ميلليون جەتى ءجۇز مىڭ شارشى شاقىرىم اۋماقتا جۇزەگە اسىرادى. موناكونىڭ كوپعاسىرلىق تاريحى بار, بۇكىل الەمنىڭ تاجىريبەسىن جيناقتاپ وتىر, ءبىز بولساق ەندى عانا ءوز دامۋ جولىمىزدى باستاپ وتىرمىز جانە ۇيرەنەتىن نارسەلەرىمىز جەتەرلىك, – دەدى قازاقستان پرەزيدەنتى.
نۇرسۇلتان نازارباەۆ موناكونىڭ سىرتقى قارىزى نولدىك دەڭگەيدە ەكەنىنە توقتالدى. قازاقستاننىڭ قازىرگى ۋاقىتتا جالپى ىشكى ءونىمىنىڭ 4-5 پايىزى كولەمىندە مەملەكەتتىك قارىزى بار جانە بيۋدجەت تاپشىلىعى 3,5 پايىز كولەمىندە. بىراق بۇل رەتتە ەلدىڭ ۇلتتىق رەزەرۆى 90 ميلليارد دوللاردى قۇرايدى, بۇل بيۋدجەت تاپشىلىعىنىڭ جانە قارىزىنىڭ جوقتىعى تۋرالى ايتۋعا دا مۇمكىندىك بەرەدى.وسى ورايدا مەملەكەت باسشىسى موناكونىڭ بانك جۇيەسىن زەرتتەۋ قاجەتتىگىنە نازار اۋداردى, ونداعى شەتەلدىك بانكتەر ۇلەسى 95 پايىز جانە بۇل ونىڭ ورنىقتى ءارى قارقىندى دامۋىنا كەدەرگى كەلتىرمەيدى.
قازاقستان پرەزيدەنتى ەكى ەلدىڭ ىنتىماقتاستىعىن ۇلعايتۋدىڭ ءوزارا ءتيىمدى الەۋەتى زور ەكەنىن اتاپ ءوتتى.– اۋماعى اسا ۇلكەن ەمەس شاعىن مەملەكەتتىڭ وسىنداي وراسان مىندەتتى شەشۋگە ۇمتىلىپ وتىرعانى سۇيسىنتەدى. ءبىز موناكومەن اسىرەسە مەديتسينا, ءبىلىم بەرۋ, سونداي-اق قۇقىق جۇيەنى دامىتۋ سالاسىنداعى ىنتىماقتاستىق اياسىن كەڭەيتۋگە ۇمتىلاتىن بولامىز, – دەدى مەملەكەت باسشىسى.بۇعان قوسا, نۇرسۇلتان نازارباەۆ موناكونىڭ مەملەكەتتىك ءمينيسترى م.روجەمەن كەلىسسوزدەر جۇرگىزە وتىرىپ, ونىمەن ەكىجاقتى قارىم-قاتىناستاردىڭ وزەكتى ماسەلەلەرىن تالقىلادى.