ارمەنيادان اكەلىنگەن كولىكتى قالاي تىركەيدى؟

الماتى قالاسىنداعى پوليتسيا دەپارتامەنتىندە تىركەلۋ شارتتارى تۋرالى بارلىق قاجەتتى اقپاراتتى الۋ ءۇشىن Call-ورتالىق جۇمىس ىستەيدى: 8-747-080-01-56; 298-50-71. «شۇعىل جەلى» جۇمىس كەستەسى: 9.00-دەن 19.00-گە دەيىن.

– ۇكىمەت قاۋلىسى بويىنشا قازاقستاندىقتار ارمەنيادان 2020 جىلدىڭ 1 اقپانىنا دەيىن اكەلىنگەن اۆتوكولىكتەردى تىركەي الادى. ەكىنشىدەن, وسى جىلدىڭ 1 ماۋسىمى مەن 1 قىركۇيەگى ارالىعىندا تىركەۋ جۇرگىزۋ قاجەت. ۇشىنشىدەن, تەك سول جاقتاعى باسقارۋ ەلەمەنتتەرى بار اۆتوكولىكتەر تىركەۋگە جاتادى. تورتىنشىدەن, ءۇش تولەممەن شەكتەۋ تۋرالى شەشىم قابىلداندى: تىركەۋ جارناسى – 695 تەڭگە, تىركەۋ كۋالىگى ءۇشىن تولەم – 3 مىڭ 473 تەڭگە جانە مەملەكەتتىك تىركەۋ ءنومىرى ءۇشىن – 7 مىڭ 778 تەڭگە. تولەمدەردىڭ جالپى سوماسى 11 مىڭ 946 تەڭگەنى قۇرايدى, – دەپ ءتۇسىندىردى الماتى قالالىق پد باسشىسىنىڭ ءبىرىنشى ورىنباسارى نۇرلان الماسبەكوۆ.

سونىمەن قاتار, سپيكەر كولىك قۇرالدارىن تىركەۋ ءۇشىن كەلەسى قۇجاتتاردى ۇسىنۋ قاجەتتىگىن ايتىپ ءوتتى:

1) جەكە باسىن كۋالاندىراتىن قۇجات;

2) مەملەكەتتىك تىركەۋ الىمىنىڭ تولەنگەنى تۋرالى قۇجاتتار قر سالىق كودەكسىنىڭ 615-بابىنا سايكەس ايلىق ەسەپتىك كورسەتكىشتىڭ جانە مەملەكەتتىك باجدىڭ 0,25% مولشەرىندە;

3) ارمەنيا رەسپۋبليكاسىنىڭ ۋاكىلەتتى ورگانى شىعارعان كولىك قۇرالدارىنا ارنالعان سرتس جانە متنب;

4) اۆتوكولىك قۇرالدارىن تىركەۋگە ۇسىنىلعان, مەملەكەتتىك نەمەسە ورىس تىلدەرىنەن باسقا تىلدە جاسالعان قۇجاتتار مەملەكەتتىك نەمەسە ورىس تىلدەرىنە اۋدارىلعان جانە اۋدارمانىڭ دالدىگى تۋرالى نوتاريۋستىڭ نەمەسە وسىنداي ارەكەتتەردى جاساۋعا ۋاكىلەتتىك بەرىلگەن باسقا ادامنىڭ قولتاڭباسى بولۋى كەرەك;

5) ارنايى جازبالارعا كەلەسى جازبالار ەنگىزىلەدى: «Tسرا» جانە «باسقا تۇلعا ءۇشىن تىركەۋگە جاتپايدى»;

6) قازاقستان رەسپۋبليكاسىندا شىعارىلعان كولىك قۇرالىندا سرتس نەمەسە متنب جوعالعان جاعدايدا, ولاردىڭ جوعالۋ جاعدايلارى جازباشا تۇردە كورسەتىلەدى;

7) متنب جوعالعان جاعدايدا, كوشىرمەسىن بەرۋ بىرىڭعاي اقپاراتتىق جۇيەگە وزگەرىستەر ەنگىزبەستەن ولاردى جاساۋ ارقىلى جۇزەگە اسىرىلادى.

«قازاقستانعا 2020 جىلدىڭ 1 اقپانىنان كەيىن اكەلىنگەن كولىك قۇرالدارىن تىركەۋگە رۇقسات ەتىلمەيدى. سونىمەن قاتار, ارمەنيا رەسپۋبليكاسىنىڭ ۋاكىلەتتى ورگانى بەرگەن تىركەۋ قۇجاتتارىندا مەنشىك يەسى رەتىندە كورسەتىلمەگەن ادامدارعا تىركەۋ جۇرگىزىلمەيدى», – دەدى ن.الماسبەكوۆ.