قازاقستانعا كەلە جاتىر
دۇنيەجۇزىلىك فۋتبول دوداسىنىڭ ەڭ باستى جۇلدەسىنىڭ قازاقستانعا ات باسىن تىرەۋىنە “Coca Cola” كومپانياسى ىقپال ەتىپ وتىر. ويتكەنى, بۇل كومپانيا سوناۋ 1950 جىلدان باستاپ الەمدىك تەڭبىل دوپ دودالارىندا جارناما جاساپ قانا قويماي, اۋەسقوي فۋتبولدان باستاپ بارلىق دەڭگەيدە وتەتىن جارىستاردىڭ باستى دەمەۋشىسى بولىپ تابىلدى.
اتالمىش كومپانيا ۇيىمداستىرىپ وتىرعان ايتۋلى شارا ءبىزدىڭ ەلىمىزدەن دە بولەك, 9 اي بويى 225 ءتاۋلىكتىڭ ىشىندە الەمنىڭ 86 ەلىنىڭ 89 قالاسىندا وتپەك. ءFىFA الەم كۋبوگىنىڭ تاريحتاعى ەڭ ءىرى ساپارىنىڭ ۇزاقتىعى 134 017 شاقىرىمعا سوزىلاتىن بولادى. بۇل – جەر شارىن ءۇش رەت اينالىپ شىعۋعا بولاتىن قاشىقتىق.
سوم التىننان قۇيىلعان كۋبوكتىڭ بيىكتىگى 36,8 سانتيمەتر, جالپى سالماعى 6 كيلو 175 گ. قازاقستانعا كەلە جاتقان كۋبوك ونىڭ جاساندى كوشىرمەسى ەمەس, ءداپ ءوزى.
مىنە, وسىنداي ناعىز باس جۇلدەنىڭ ەڭ ءىرى تاريحي ساپارى وتكەن جىلدىڭ قىركۇيەگىندە ءFىFA-نىڭ شتاب-پاتەرىنەن باستالعان-دى. الەم كۋبوگى جوعارىدا اتاپ وتكەندەي, 86 مەملەكەتتى كەزەگىمەن ارالاپ, ۇستىمىزدەگى جىلدىڭ 4 مامىرىندا چەمپيونات وتەتىن وڭتۇستىك افريكاعا تابان تىرەيدى.
ايتقانداي, كۋبوكتىڭ ساياحاتى شتاب-پاتەردەن باستاپ, بۇكىل باعىت بويىمەن دىتتەگەن جەرىنە جەتكەنشە اسا جوعارى قاۋىپسىزدىك شارالارىمەن قامتاماسىز ەتىلۋدە, ويتكەنى, تاريحتا ايگىلى تروفەيدى ۇرلاۋعا ەكى رەت ارەكەت جاسالعانى بەلگىلى.
ءداستۇرلى تۋر ءFىFA جانە ءFىFA-نىڭ ەڭ بايىرعى سەرىكتەسىنىڭ ءبىرى “Coca Cola” كومپانياسىمەن ەرەكشە ىنتىماقتاستىقتا جۇزەگە اسىپ وتىر. بۇل تۋر 2006 جىلى وتكىزىلگەن العاشقى الەمدىك ساپاردىڭ جالعاسى, ول كەزدە كۋبوك 29 ەلدىڭ 31 قالاسىنا ات باسىن تىرەپ, 102 570 شاقىرىم جولدى ءجۇرىپ ءوتىپ, فۋتبولدىڭ ميلليونداعان جانكۇيەرى الەمنىڭ ەڭ تانىمال ءجۇلدەسىن جاقىننان تاماشالاۋعا ءمۇمكىندىك العان-دى.
ال قازىرگە قازاقستانعا تيەسىلى وقيعالار لەگى مىناداي. ناۋرىزدىڭ ورتاسىندا ءFىFA الەم كۋبوگى ءبىزدىڭ ەلگە كەلە جاتقانى تۋرالى العاشقى ءباسپاسوز ءماسليحاتى وتسە, ءساۋىردىڭ 2-ءسى كۇنى الماتىداعى اباي داڭعىلىنداعى ورتالىق ستاديونعا كىرە بەرىستە ارنايى تابلونىڭ تۇساۋكەسەر ءراسىمى بولىپ ءوتتى. بۇل كەرى ەسەپتەۋ تابلوسى كۋبوكتىڭ قازاقستانعا كەلۋىنە قانشا كۇن قالعانىن ايگىلەپ تۇر.
اتالمىش كومپانيا كۋبوكتىڭ قازاقستانعا ساپارىنا وراي, استانالىق “لوكوموتيۆ” فۋتبول كلۋبىنىڭ شابۋىلشىسى ءارى قازاقستان ۇلتتىق قۇراماسىنىڭ مۇشەسى سەرگەي حيجنيچەنكونى ەرىكتى ەلشى رەتىندە تاڭداعان.
سونىمەن, ءFىFA الەم كۋبوگىنىڭ تۇپنۇسقاسى كەزەكتى رەت الدا وڭتۇستىك افريكانىڭ يوحاننەسبۋرگ قالاسىنداعى “Soccer ءCىty” ستاديونىندا وتكەن دودادا جەڭىپ شىققان ەلدىڭ قۇراماسىنا تاپسىرىلادى. جەڭىمپازدار كەيىنگى جارىسقا دەيىن ونى وزدەرىندە ساقتايدى جانە ماراپاتقا تازا التىننان جاسالعان كۋبوكتى ەمەس, ونىڭ جۇقا التىننان جاسالعان كوشىرمەسىن الادى.
تابانىنا ەكى قابات مالاحيت سالىنعان تروفەيدىڭ تۇبىنە 1974 جىلدان بەرى فۋتبولدان الەم كۋبوگىنا يە بولعان ەلدەردىڭ اتتارى مەن جىلدارى ويىپ جازىلعان. ال بيىل اقتىق سىنعا جولداما العان 32 كوماندا تۇڭعىش رەت افريكا قۇرلىعىندا باس تروفەي ءۇشىن بارلارىن سالاتىن بولادى. ولاردىڭ قايسىسىنىڭ اتى كۋبوكتىڭ تابانىنا ماقتانىشپەن قاشالاتىنىن الداعى ۋاقىت كورسەتەدى.
ايناش ەسالي.
الماتى.