ورتالىق كوممۋنيكاتسيالار قىزمەتىندە وتكەن ونلاين بريفينگتە ەلورداداعى كوروناۆيرۋستىق ينفەكتسيانىڭ اعىمداعى جاعدايى, سونداي-اق كارانتين رەجىمىن ساقتاۋ شارالارى تۋرالى ايتىلدى.
نۇر-سۇلتان قالالىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەڭ الدىمەن باس قالاداعى ەپيدەميولوگيالىق جاعدايعا توقتالدى. «قازىرگى ۋاقىتتا قالالىق اۋرۋحانالاردا 1022 ناۋقاس ەم قابىلداۋدا. ولاردىڭ 67%-ى – كوروناۆيرۋس جۇقتىرعاندار. سوڭعى اقپاراتقا سايكەس, ەلوردادا كوروناۆيرۋستى 1287 ادام جۇقتىرعان. ونىڭ 84-ءى – 18 جاسقا دەيىنگى بالالار. ناۋقاستاردىڭ 62%-ى ەر كىسىلەر بولسا, 38%-ى – ايەلدەر. جاستارىنا قاراي قاراستىرساق, ۆيرۋس جۇقتىرعانداردىڭ ەڭ كوبى 18 جاستان 49 جاس ارالىعىنداعىلار (76%) بولىپ وتىر. 16%-ى 50-69 جاس شاماسىنداعى كىسىلەر بولسا, 70 جاستان اسقان قارتتار – 2%, ال بالالار 6%-دى قۇراپ وتىر. ۆيرۋس جۇقتىرعانداردىڭ 47%-ى جازىلىپ, 14 كۇندىك ءۇي كارانتينىنە جىبەرىلدى», دەدى ول.
باسقارما باسشىسى وسى ۋاقىتقا دەيىن ەلوردادا 75 مىڭ پتر-تەستىلەۋ, 32 مىڭ ەكسپرەس-تەستىلەۋ جۇرگىزىلگەنىن حابارلادى. «مامىردىڭ العاشقى اپتاسىندا كوروناۆيرۋس ينفەكتسياسىنىڭ 376 جاعدايى تىركەلگەن ەدى. ورتاشا ءوسىم ول كەزدە 6,4 پايىزدى قۇراعان. مامىردىڭ ەكىنشى اپتاسىندا 185 ادام انىقتالدى. ورتاشا ءوسىم 2,3 پايىزدى كورسەتتى. جاڭا جاعدايلاردىڭ ەكى ەسە تومەندەگەنى بايقالادى», دەدى س.قيسىقوۆا.
ەلورداداعى كوروناۆيرۋس ينفەكتسياسى دەڭگەيىنىڭ وڭ ديناميكاسىنا قاراماستان سانيتارلىق-ەپيدەميولوگيالىق تالاپتار قاتاڭ ساقتالۋى كەرەك. كارانتين شارالارىنىڭ بوساڭسۋى ۆيرۋستىڭ كەز كەلگەن ۋاقىتتا قايتا ورشۋىنە اكەپ سوعۋى مۇمكىن. وسىنى ايتقان نۇر-سۇلتان قالاسىنىڭ باس سانيتارلىق دارىگەرى جاننا پىراليەۆا ەلورداداعى ءىرى ويىن-ساۋىق ورتالىقتارىنىڭ جۇمىسى ەرتەڭنەن باستاپ قالپىنا كەلەتىنىن اتاپ ءوتتى. ياعني بۇعان قاتىستى ءتيىستى قاۋلىنىڭ دايىندالىپ جاتقانىن جەتكىزگەن ول رۇقسات ەتىلگەن نىسانداردا سانيتارلىق نورمالاردىڭ تالاپتارىن تەك سۋبەكتىلەردىڭ وزدەرى عانا ەمەس, كەلۋشىلەر دە قاتاڭ ساقتاۋى ءتيىس ەكەنىن ايتتى. «قالاداعى ەپيدەميولوگيالىق جاعدايدى ەسكەرە وتىرىپ, ۆەدومستۆوارالىق كوميسسيادا 2020 جىلدىڭ 20 مامىرىنان باستاپ ءبىزدىڭ قالادا ساۋدا-ويىن-ساۋىق ورتالىقتارىنىڭ (ونىڭ ىشىندە ويىن-ساۋىق جانە ويىن ورتالىقتارىنسىز, فۋدكوردسىز, كينوتەاترسىز) جانە قوعامدىق مونشالاردىڭ (ساۋنالاردىڭ باسسەينسىز), ازىق-ت ۇلىكتىك ەمەس ساۋدا ورتالىقتارى مەن ساۋدا ۇيلەرىنىڭ جۇمىسىن قايتا باستاۋ جۇمىسى جۇرگىزىلىپ جاتىر. بۇل ماسەلەنى قازىر ءبىزدىڭ تاراپىمىزدان قاراستىرىپ جاتىرمىز», دەدى ج.پىراليەۆا.
ال نۇر-سۇلتان قالاسىنىڭ جەرگىلىكتى پوليتسيا قىزمەتىنىڭ باسشىسى عۇسمان جاكين قالا ماڭىنداعى 6 بلوك-بەكەتتەن وتە الاتىن ادامداردىڭ ءتىزىمى كەڭەيتىلگەنىن جەتكىزدى. اتاپ ايتقاندا, ولارعا قالا ومىرىنە قاتىستى ۇيىمداردا ەڭبەك ەتەتىن جۇمىسشىلار; توتەنشە جاعداي رەجىمىنەن كەيىن جۇمىسى جاندانعان جۇمىس ورىندارىنىڭ قىزمەتكەرلەرى; ساياجاي اۋماعىنا جانە قالا شەتىندەگى ۇيلەرگە بارا جاتقان ادامدار; مەديتسينالىق انىقتاماسى مەن رۇقساتناماسى بار ادامدار; كوكتەمگى ەگىس جۇمىستارىنا بارا جاتقان ادامدار; تسەلينوگراد, ارشالى, شورتاندى, قورعالجىن اۋدانىنىڭ تۇرعىندارى; باسقا ايماقتا تىركەلگەن, الايدا كارانتين اۋماعىنان شىعىپ بارا جاتقان ازاماتتار; كىسى جەرلەۋگە كەتىپ بارا جاتقان ادامدار; شەت مەملەكەتتەردىڭ ازاماتتارى; ءجاسوسپىرىم بالاسىنا بارا جاتقان ادامدار; ناۋقاس تۋىسىنا قاراۋ ءۇشىن بارا جاتقان ادامدار; نۇر-سۇلتاندا تۇرۋعا قاجەتتى قاراجاتى جوق ازاماتتار; اۋە رەيستەرىنە, اۋە بيلەتتەرى بويىنشا بارا جاتقان ازاماتتار; تۇركىستان وبلىسىنا كومەككە بارا جاتقان ازاماتتار; ازىق-ت ۇلىك نەمەسە ازىق-ت ۇلىككە جاتپايتىن كەرەك-جاراقتاردى اكەتىپ بارا جاتقان ازاماتتار; ترانزيت بويىنشا باعىت العان ازاماتتار جاتادى.
ونىڭ ايتۋىنشا, كارانتين ەنگىزىلگەلى بەرى 5 مىڭعا تارتا ازامات ءارتۇرلى اكىمشىلىك جاۋاپكەرشىلىككە تارتىلعان. ال كارانتين اۋماعىن كەسىپ وتكەن ادامداردىڭ بارلىعى «سەرگەك-بلوكپوست» اقپاراتتىق بازاسىندا تىركەلەدى.