قاراعاندىدا باستالعان مارافون ماسكەۋدە اياقتالادى
الىس قاشىقتىقتارعا جۇگىرۋدى ماشىق ەتكەن جاندار ىشىنەن ىرىكتەلىپ الىنعان 17 قاراعاندىلىق ساپار كەستەسى بويىنشا بۇگىندە اتباسار-ەسىل ارالىعىندا جورتىپ بارا جاتۋعا ءتيىس. ودان ءارى امانقاراعايدان قوستانايعا اسىپ, چەليابىنى باسىپ, ۋفانى كوكتەپ, قازانعا سوعىپ, تومەنگى نوۆگورودتان ءوتىپ, 17 ساۋىردە ماسكەۋدىڭ مانەج الاڭىنداعى گ.ك.جۋكوۆ ەسكەرتكىشى تۇبىندە مارە ءتۇيىستىرۋ ءۇشىن اسىعىس جەلىپ بارادى. جەڭىستىڭ 65 جىلدىعىنا ارنالعان بۇل حالىقارالىق مارافوندى “نۇر وتان” حدپ مەن قازاقستان حالقى اسسامبلەياسى وبلىستىق فيليالدارىنىڭ قولداۋىمەن “سپارتاك” سپورت قاۋىمداستىعى, “فەكدەنيكس-سپارتاك” جۇگىرىس سۇيەرمەندەرىنىڭ كلۋبى, نيكولاي ستاروستين اتىنداعى سپورت قوعامى ۇيىمداستىرىپ وتىر. ءساۋىردىڭ 1-ىندە قاراعاندىداعى ن.ءابدىروۆ ەسكەرتكىشى الدىندا قالا جۇرتشىلىعى وكىلدەرى شىعارىپ سالعان جەلاياقتار بۇگىن التىنشى كۇن جورىق ۇستىندە. ولار 3070 شاقىرىمدى 17 كۇندە ەڭسەرىپ وتپەك.
مارافونشىلار كومانديرى ولەگ سەلەزنەۆتىڭ ايتۋىنشا جۇگىرىس جىلدامدىعى ساعاتىنا 11-12 شاقىرىمعا ەسەپتەلگەن. كوماندا مۇشەلەرى اۋىسىپ وتىرا تاۋلىگىنە 200 شاقىرىمدى الۋدى كوزدەيدى. ءسويتىپ, ءساتىن سالسا, مەجەلى جەرگە بەلگىلەنگەن مەرزىمدە جەتۋلەرىنە سەنەدى.
74 جاستاعى تانىمال مارافونشى پاۆەل سيروتيننەن باستاپ ءبارى الىس قاشىقتىقتارعا جۇگىرۋگە ابدەن ىسىلعاندار. سولاردىڭ ءبىرى زەينوللا سەيىتوۆ زاعيپتىعىنا قاراماستان, ەشقايسىسىنان ولقىسوقپايدى. جەڭىل اتلەتيكا بويىنشا سپورت شەبەرى ول قاتارىنان ءۇش رەت پاراوليمپيالىق ويىندارعا قاتىسۋشى. 34 جىلدان بەرى وسىناۋ سۇيىكتى ماشىعىن ومىرىنە سەرىك ەتىپ كەلەدى.
مىڭداعان شاقىرىمعا شىدامدى جەلاياقتار اراسىندا ايەلدەر دە بار. بەيبىتگۇل اسىلبەكوۆا مۇنىڭ الدىندا قاراعاندى-قارقارالى, تەمىرتاۋ-قاراعاندى, استانا-قاراعاندى باعىتىنداعى مارافوندارعا قاتىسقان بولسا, ەندى سوناۋ ماسكەۋگە دەيىن جۇگىرىپ بارۋعا بەل بۋى سپورتتىق جولىنداعى العاشقى تاۋداي تالپىنىس. 50 جاسىندا نيەتتەستەرى قاتارىنا قوسىلعان گالينا پاۆلەنكوعا دا بۇل ءبىرىنشى بيىك ماقسات.
جەلاياقتار ورتاسىنداعى ەڭ جاسى قۋانبەك ناسرال. قىتايدا دۇنيەگە كەلگەن جىگىت جەڭىل اتلەتيكامەن 11 جاسىنان شۇعىلدانادى. وقۋشىلار اراسىندا بۇكىلقىتايلىق ويىنداردىڭ جەڭىمپازى بولعان. اتا-بابا جەرىنە ورالعاندا دا جۇگىرۋدەن قول ۇزبەگەن باۋىرىمىز 10 شاقىرىمدىق مارافوننان ەلىمىز چەمپيونى. بۇگىندە ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ستۋدەنتى. ونىڭ ارمانى 3 مىڭ شاقىرىمدى كومكەرگەن ۇلكەن مارافونشى اتانۋ.
ال بۇرىنعى شاحتەر, حالىقارالىق 35 كلاسسيكالىق مارافونعا قاتىسۋشى تولەۋتاي سمايىلوۆ بۇل جولعى جۇگىرىسىن ەكىنشى جاھاندىق سوعىستا ەرلىكتەرىمەن كوزگە تۇسكەن نەمەرە اعاسى ەگىنباي سمايىلوۆتىڭ قۇرمەتىنە ارنايدى.
قاراعاندىلىق جەلاياقتار مارافون اياقتالعان سوڭ ماسكەۋلىكتەرمەن كەزدەسۋلەر وتكىزىپ, جەرگىلىكتى سوعىس ارداگەرلەرى جايلى جازىلعان كىتاپپەن تانىستىرادى.
ايقىن نەسىپباي.
قاراعاندى.